Ombaanga yiikulya otayi andjakanekwa noshilongo ashihe muJuni

Omanga Uuministeli wOkukondjtha Oluhepo wa gandja ombili omolwa ekateko megandjo lyoondya okupitila mopoloyeka yOmbaanga yiikulya moshilongo ashihe momwedhi nguka, owa koleke kutya okuya moomwedhi twa taalela, opoloyeka ndjoka otayi ka kala yi li miilonga moshilongo ashihe.

Omupopiliko gwuuministeli mboka, Lot Ndamanomhata, okwa popi kutya eyandjakaneko lyopoloyeka ndjoka moshilongo otali pula nawa komeho na otaya ka kala ya andjakaneka opoloyeka ndjoka moshilongo ashihe okuya muJuni gwonuumvo.

Metiyali lyoshiwike shika, omunambelewa omukomeho guuministeli mboka, Esther Lusepani okwa pititha omukanda moka a yelitha kombinga yekateko lyetopolo lyiikulya pomahala gamwe po omwedhi gwa piti .

Okwa popi kutya etopolo ndyoka otali ka tsikila ngaashi shito okuza mEtitatu lyoshiwike shika.

Ndamanomhata okwa popi kutya konima nkene opoloyeka ndjoka ya tulwa miilonga muJuni gwo 2016 omwaalu gwoonakumona omayambidhidho mopoloyeka ndjoka ogwa londo pombanda sigo opaantu 17 000 moshitopolwa shaKhomas, Hardap, //Karas, Kavango West, Kavango East, Kunene oshowo Ohangwena.

Moshikako shomvula ya piti, opoloyeka ndjoka oya tulwa miitopolwa ihamano oshowo moondoolopa hetatu dhiitopolwa mbyoka.

Omahala ngoka onga tumbulwa kutya oMariental moshitopolwa shaHardap, Keetmanshoop oshowo Lüderitz moshitopolwa sha //Karas, Kavango West (Nkurenkuru), Kavango East (Rundu), Kunene (Khorixas oshowo Opuwo) oshowo moshitopolwa shaHangwena (Eenhana). Okwa popi kutya otaku ningwa omashango moshitopolwa shaZambezi omanga aanambelewa yopoloyeka ndjoka yali ya ningi oonkundathana noongoloneya oshowo ookansela miitopolwa ngaashi Oshikoto, Oshana nOmusati momwedhi Januari nuumvo.

Ndamanomhata okwa popi kutya otaku ka ningwa oonkundathana miitopolwa mbyoka ya hupako ngaashi Omaheke, Otjozondjupa oshow Erongo.

JANA-MARI SMITH