Namibian Sun

Omutumba ngoka ogwa kaliwa kiilyo ya thika pe 118 konima yomiyelo dha patwa, na inamu pitikilwa iikundaneki.

Okopi yomanyenyeto giilyo mbyoka oya holola kutya, onkalo yopashimaliwa yehangano ndyoka otayi nayipala kohi yelelo epe lyehangano, na okwa pumbwa okukatukwa oonkantu dhomeendelelo.

“Nonando okwa ningwa omakunkililo ogendji Meatco onkene ta tsikile nokupungula oomiliyona momapungulo kaage na iiyemo yasha, naashoka otashi tula moshiponga onakuyiwa yehangano.”



Iilyo mbyoka oya popi kutya omatokolo ngoka taga ningwa kelelo lyehangano ndyoka, otaga tula moshiponga onkalo yopashimaliwa yehangano.

Iilyo mbyoka yi li momalimbililo oya pula elelo opo li ya pe oompangela dhomilandu ndhoka tadhi ka longithwa kehangano, opo ya kale ye na einekelo muyo.

Oya hala woo oompangela dhopangeshefa ndhoka tadhi vuli ishewe okuyambulapo ongeshefa yehangano ndyoka, ngaashi sha kala nale.

Natango iilyo mbyoka oya pula elelo lyehangano opo li ya pe omusholondondo gwelongitho lyiimaliwa yehangano gwomvula yo 2018/19. Oya pula opo yapewe iizemo ye yo komeho kombinga yonkalo ndjoka muule wiiwike ihamano.

Pauyelele wolopota ndjoka ya gandjwa kiilyo, pokati komvula yo 2014/15 oshowo 2017 no 2018 meatco okwa kala ta longo e li momudhingoloko gwepingakanitho lyiimaliwa gu li nawa.



Oya popi kutya onkalo ndjoka oya gandja uuwanawa kehangano ndyoka, opo li vule okumona iiyemo ya thika poopresenda 40.

Nonando ongaaka, Meatco okwa kanitha iiyemo .

Okwa hololwa kutya momvula yo 2014/15 sigo 2017/18 osha monika mo kutya onkalo yiiyemo yehangano ndyoka oya kala tayi gu pevi noonkondo, ihe iifuta yiilyo yelelo oshowo elongitho lyiimaliwa mehangano oya kala tayi yi pombanda noonkondo.

Ehangano olya kala nokukunkililwa kombinga yonkalo ndjoka tayi vulu okutula ehangano moshiponga, ihe inali gandja oompangela nenge kutya otali kambadhala ngiini okuhupitha ehangano nokukutha momalimbililo aanafaalama mboka yiikolelela mehangano, mokumona iiyemo yawo.

“Iiholelwa oyindji ongaashi ekaleko lyomutumba gwiilyo opo yi vule okuhogolola iilyo iipe yelelelo lyehangano. Euvaneko lya ningwa kiilyo yelelo kutya otaku ka ningwa omutumba opo ku hogololwe aakomeho aape, ihe euvaneko ndyoka inali gwanithwa po na osha etitha ominista yuunamapya yi hogolole yoyene iilyo yeleleo.”

Elelo olya uvaneke natango oomvula mbali dha piti kutya otali ka gandja iifuta yolupandu kaanafaalama mboka yeli iilyo ihe euvaneko ndyoka inali gwanithwa po. Pethimbo lyomutumba ngoka gwa ningwa, omunashipundi gwelelo lyaMeatco

Martha Namundjebo-Tilahun okwa popi kutya oshilongo osha taalela onkalo yopaliko ya dhigupala mwa kwatelwa woo oshikukuta oshowo eshuno pevi lyomwaalu gwiimuna mbyoka tayi vulu okutomwa.

Omushipundi okwa tsikile kutya onkalo yomalanditho gonyama oya taalela omukundu omunene moshilongo, ta popi woo kombinga yomukalo gwokutuma momalanditho pondje yoshilongo iinamwenyo.

Okwa popi kutya mvula ya piti, oongombe dhi li po 315 198 odha tumwa pondje yoshilongo okuyeleka noongombe 164 220 ndhoka dha tumwa momvula yo 2016.



Okwa popi kutya ngele onkalo ndjoka oya tsikile otayi londeke pombanda onkalo yokwaahe na iilonga, oluhepo oshowo okwaaha thike pamwe paliko moshilongo.

Ngoka ta longo pehala lyOmunambelewa Omukuluntu gwehangano ndyoka, Jannie Breytenbach okwa lopota kutya oongombe dha thika po 81 984 odha tomwa momumvo gwa piti.

Ehangano olya mono iiyemo yoobiliyona 1.425 oshowo ekanitho lyoomiliyona 51.2.

Iiyemo oya shuna pevi noopresenda 15.91 naashoka osha etithwa komwaalu guli pevi gwiimuna mbyoka tayi tomwa moshilongo oshowo ekondopalo lyiimaliwa yaNamibia okuyeleka niimaliwa yiilongo iinankondo pashimaliwa muuyuni.



Meatco okwa futa aanafaalama oshimaliwa shoomiliyona N$899.852 , nomwaalu ngoka ogwa londo pombanda noopresenda 20.04, okuyeleka noomiliyona 749.617 ndhoka dha futwa aanafaalama momvula ya pitile.

Pethimbo lyomutumba ngoka iilyo yaMeatco oya holola woo omaiyuvo kombinga yuukwashili mekalepo lyiilyo iipe yehangano na oye wete kutya inaya pewa ompito nuuthemba okuhogolola iilyo yelelo yoyene.

ELLANIE SMIT