Namibian Sun

OGONE TLHAGE

OVENDUKA



Omalelo naakwashigwana yomOmbaye konima yehuliloshiwike lyomananathano ga nika oshiponga oya tokola opo omudhimba gwanakusa gwotango moNamibia omolwa oCovid-19 gu fumbululwemo sigo kwa monika ehala epe mpoka tapu kala tapu fumbikwa mboka taya hulitha kombuto ndjoka.

Shoka osha landula sho aakalimo yomoNarraville mEtitano ya yi moshipala efumbiko lyomuntu omutiyali ngoka a hulitha natango ko Covid-19, mehala ndyoka lya hogololwa komalelo tali adhika popepi nehala lyolukalwa lwaakwashaigwana.

Namibia monena okwa lopota omaso gaali omolwa oCovid-19, naantu ayehe mboka oya za mOmbaye.

Ngoloneya gwaMbaye, Neville Andre pamwe naaleli yalwe oya ningi omutumba gwomeendelelo mOlyomakaya noshigwana shoka sha li sha lya moonyandi.

Shoka osha landula sho oshigwana sha tindi opo omuntu omutiyali a fumbikwe pehala ndyoka, sha landula sho omuntu gwotango a fumbikwa.

Aakwashigwana oya yi moshipala aanambelewa yepangelo opo ya ninge efumbiko ndyoka uusiku wEtitano.

Aakwashigwana oya pula kutya omolwashike aantu mboka taya fumbikwa pehala ndyoka li li poNarraville na oya popi kutya aantu mboka otaya vulu okufumbikwa pomayendo ngoka ge li nale mondoolopa ndjoka.

Aakwashigwana oya pula kutya omolwashike omalelo ga hala okufumbika aantu pehala mpoka hapu dhanwa kaanona, taya gwedha po kutya ehala ndyoka oli li owala oshinano shoometa dha thika po 400 okuza pomagumbo gawo.

Aakwashigwana oya ningi omapulaapulo momukalo moka mwa fumbikwa omuntu gwotango.

Sho a ningilwa omapuoo koNamibian Sunn, Omukomeho muuministeli wuundjolowele, Ben Nangombe okwa pula engungumano moshigwana, ta popi kutya oshi li muundjolowele woshigwana opo omuntu a fumbikwe mbala.

“Osha simana omudhingoloko gu katuke oonkatu muundjolowele woshigwana. Shoka osha ningwa osha ningwa muuwanawa wuundjolowele woshigwana,” Nangombe a popi.

Nangombe okwa popi kutya oshi li omaipulo kutya omuntu omutiyali ina fumbikwa natango,nEhangano lyUundjolowele mUuyuni oya gandja omuntu a fumbikwe muule woowili 48.

Aakwashigwana oya pula omuntu gwotango ngoka afumbikwa mpoka opo a fumbulwepo.

“Inatu hala omidhimba mpaka, sha pu, kape na oonkundathana. Gu kuthenipo e ta mu gu fala palwe. Otamu e tha ngiini omudhimba ngoka gu kale mpoka, gu kutheni po,” omukalimo gumwe gwomoNarraville, a lombwele Andre. Gumwe okwa igidha: “Ombila ndjoka nayi kuthwepo, kongeni omukalo.”

Sho a pulwa kombinga yaashoka tashi pulwa kaakwashigwana, Nangombe okwa popi kutya itashi kala mondjila okufumbulamo omudhimba ngoka.

“Natu kale nolukeno kofamili yanakusa. Kandi wete tashi kala mondjila okukutha po omudhimba ngoka,” Nangombe a popi.