Namibian Sun

Omukithi gwoHepatitis E oshowo omaso taga etithwa komukithi ngoka oga londo pombanda muule woomvula dha piti, sho ngashiingeyi kwa lopotwa iipotha yipo 6 280 okuya momasiku 25 gaAguste nuumvo omanga kwa lopotwa omaso geli po55 okuya mesiku ndyoka.

Oyendji mboka ya ningi iihakanwa yomukuthi ngoka, AaNamibia mboka kaye na iilonga na otaya lumbu momalukanda. Olopota ompe ndjoka ya pitithwa oya holola kutya iipotha iipe yomukithi ngoka ya thika po 3 726 oya dhidhilikwa.

Iipotha yomukithi ngoka yi li po 2 554 oya lopotwa konima nkene omukithi ngoka gwa tukuka lwotango muSepetemba gwomvula yo 2017 sigo omomasiku 29 gaJuli mo 2018.

Okuya momomasiku 25 gaAguste nuumvo, iipotha yi li po 6 280 oya lopotwa.

MuSepetemba gwo 2017 sigo 29 Juli 2018, omaso ge li 24 oga lopotwa nomaso ngoka oga londo sigo opo 55 okuya muAguste gwonuumvo.

Olopota ompe ndjoka ya pitithwa oya holola kutya momaso 55 ngoka ga lopotwa oyendji yomwaamboka ya hulitha aakiintu yathika po 35 omanga aalumentu teli po 20. Natango aakiintu o 23 mboka ya hulitha oya li ye na omategelelo, kwa hololwa kutya o 12 oya hulitha omanga ye li momategelelo omanga 10 ya hulitha konima sho ya pulumutha nomukiintu gumwe okwa kanitha etegelelo omanga ina hulitha.

Olopota ndjoka oya holola kutya aantu 1 929 mboka ya kwatwa komukithi ngoka oomboka kaaye na iilonga omanga 4 745 oomboka haya longitha oopomba dhaayehe, noopresenda 55 oya li iikulya mbyoka hayi landithwa momapandanda.

Mwaayehe mboka ya kwatwa oopresenda owala 9 ya pumbwa okukalekwa moshipangelo.

Olopota kombinga yonkalo ndjoka oya holola kutya okwa dhidhilikwa e yo pevi lyetaandelo lyomukithi ngoka miiwike iyali ya piti pokati komasiku 12 oshowo 25 gaAuguste, okuyeleka niiwike mbyoka ya piti.

Pokati komasiku 12 no 25 Auguste, iipotha iipe yomukithi gwo hepatitis yi li 158 oya lopotwa okuyeleka niipotha 163 mbyoka ya lopotwa pokati ko29 Juli sigo 11 Auguste. Iipotha oyindji iipe ya thika po 57 oya lopotwa moshitopolwa shaKhomas moka konena mwa lopotwa iipotha yi li 3 956, moshitopolwa shErongo omwa lopotwa iipotha yi li 32 iipe sha landulwa kiitopolwa iyali yaKavango moka mwa lopotwa iipotha 32.

Konima nkene omukithi ngoka gwa tukuka moshilongo konyala oomvula mbali dha piti ogwa taandele miitopolwa ya yooloka moshilongo nokuguma unene aakalimo yomomalukanda. Oyendji mboka ya gumwa komukithi ngoka aantu yoomvula 20 sigo 39, naalumentu ya thika po 3 807 oya kwatwa komukithi oshowo aakiintu ye li po 2 551.

Natango okwa lopotwa iipotha yomukithi gwohepatitis A moshitopolwa shaMusati moka mwa lopotwa iipotha yi li po 98 oku ya konena. Iipotha yoSporadic yi li po 58 oya lopotwa woo momahala gamwe.

JANA-MARI SMITH