Hage a yi moonkundathana naakwashigwana yomoBaumgartsbrunn

JEMIMA BEUKES

Osha li enyanyu enene momudhingoloko gwaBaumgartsbrunn, nonando enyanyu ndyoka inali kala ethimbo ele shOmupresidende Hage Geingob a talelepo aakwashigwana yomomudhingoloko gwaBaumgartsbrunn.

Elelakano lyetalelepo ndyoka okuya moonkundathana naakwashigwana nokutala konkalo yoshikukuta moshitopolwa.

Nonando oyuuviteko kutya omupresidende okwa li eendelela, aakwashigwana inaya nyanyukwa sho omuleli a kala owala nayo uule woominute ooshona.

Baumgartsbrunn olukanda talu adhika oshinano shookilometa 21 muuzilo waVenduka, naakalimo oyendji aakwashigwana yomuhoko gwaa|Khomanîn mboka haya longo moofaalama dhaatiligane momudhingoloko ngoka.

Mboka oya li yategelela nomukumo etalelepo lyomupesidende. Omukwashigwana gumwe, Absalom Gereseb ngoka a kala uule woomvula 18 moBaumgartsbrunn okwa popi kutya inaya mona nale omupresidende momudhingoloko gwawo na oya li ya nyanyukwa noonkondo okumona omuleli gwoshilongo.

Okwa popi kutya oyali ya nyanyukwa ihe andola oya pandula unene ngele omupresidende okwa li a talelepo omagumbo gawo nokumona kutya otaya lumbu monkalo yi li ngiini.

Katrina Swartbooi okwa popi kutya ina nyanyukwa molwaashoka okwa yi mbala.

“Nda nyanyukwa molwaashoka okwe ya kutse ihe ha ominute ntano.”





Mwene gwofaalama Rida Jakobs okwa popi kutya oya landitha po oopresenda 70 dhiimunna yawo omolwa oshikukuta, okwa popi kutya ye na uupyakadhi womeya niimuna yawo otayi ningi po iishona.

Ondjele yoluhepo oyi li pombanda moBaumgartsbrunn sho aanona konyala ya gwile momulilo shoka taya kondjele oshiyaha shosopa nuukuki konima sho omupresidende a yi.

Osopa oyali ya longekidhwa kugumwe gwomaaleli yomomudhingoloko ngoka, Erna Kharuxas ya nuninwa aakalimo mboka kaye na sha. Konyala aantu ayehe oya yi momukweyo okumona osopa ndjoka nuukuki.

Pahapu dhaKharuxas aakwashigwana mboka oya pewa oondya dhoshikukuta oomwedhi ntano dha piti, na otaya ka pewa owala momwedhi ta twaalela.

Odile Auchas gumwe gwomwaamboka ya yi momukweyo ya ka mone osopa okwa popi kutya kuyamwe ngoka ogwo owala omusha nuulalelo wawo wesiku, ta popi kutya ihaya mono omayakulo gasha okuza kepangelo.

Paul Kock, okwa popi kutya okuuva nayi sho omupresiende ina kala ethimbo ele momudhingoloko gwawo, ta popi kutya aaniilonga yamwe osha li oshidhigu okumona epitiko okuza kaahona yawo.





Aakwashigwana mboka oya popi kutya otaya hupu nuudhigu omolwa okwaahena iiyemo sho aanyasha oyendji kaye na iilonga, naaniimuna otaya kanitha iimuna yawo omolwa oshikukuta.

Sho a popitha aakwashigwana mboka, Geingob kwa popi kutya oshikumungu shevi osha pumbwa okukundathanwa meendelelo, ta popi kutya aakalimo yomoBaumgartsbrunn aanelago sho mwene gwofaalama ndjoka e ya pitika opo ya kale mofaalama ndjoka.

Okwa popi kutya aantu yamwe kaye shi aanelago molwaashoka ooyene aape yofaalama oye ya tidha mo mofaalama dhawo konima sho yedhi landako, nangashiingeyi ohaya zi momapandanda.

ShoNamibian Sun a pula kutya shoka otashi ka ningwa uunake ano ekundathano kombinga yoshikumungu shevi, Geingob okwa yamukula kutya “Tegeleleni tumu tseyithike tse ihatu kundathana oondjodhi.”

Okwa pula aakwashigwana yemu hiye natango momutumba moka taya ka kundathana omaupyakadhi ngoka ya taalela.

Okwa popi kutya otaya yi ethimbo kehe ya hiwa molwaashoka ngashiingeyi inaya hiwa na okwa pandula mwene gwofaalama ndjoka sho a pitika aantu ya kale mofaalama ye, na ineya tidha mo.