Eteleleni iipundi yeni koskola

Omolwa ompumbwe yiikwaniipangitho poNkurenkuru Combined School moshitopolwa shaKavango West, aanaskola yamwe ohaya faalele iipundi yawo koskola opo ya yande oku kuutumba pevi.Metitano lya piti ongendjo yoskola oya dhenge po 11:30, opo aanaskola ya shune komagumbo nomvula oya li tayi loko noonkondo moNkurenkuru.Gumwe gwomaanaskola poskola ndjoka okwa monika ta tondoka uuka komweelo gwoskola a humbata oshipundi peke.Omulongi gumwe okwa popi kutya: “Tala okamati hoka taka tondoka. Shoka oshipundi shemwene he ya nasho nokushuna nasho kegumbo Omaandaha sigo etitano.”Onkalo yoongulu dhoskola poskola ndjoka oyi li monkalo ya nayipala noonkoondo naanona oyendji poskola ndjoka ohaya kuutumba kiipundi ooyaali nenge ya kuutumbe pevi. Gumwe gwomaanaskola ngoka a adhika a kuutumba pevi okwa popi kutya: “Onde ya nda lata nena koskola na kandi shi kutya olye a kutha po oshipundi shandje.”Omukuluntuskola poskola ndjoka, Frans Ngoma ina vula okumonika opo a tye sha kombinga yonkalo ndjoka mu na oskola yawo.Aalongi yamwe oya popi kutya onkalo ndjoka oya etithwa komwaalu gwaanona oyendji moongulu dhoskola, sho oongulu dhimwe dhi na aanona ya thika po 65.Oskola ndjoka oyi na aalongi yeli 38 oshowo aanaskola yeli 1 213 okuza pondondo onti 4 sigo 10.Aalongi oya popi kutya andola pamulandu gwoskola, mongulu yoskola omu na okukala aanaskola 35, ihe poskola yawo oye na moongulu dhawo aanaskola yeli pokati ko 48 no 50.“Onkalo ndjoka oyo ya etitha oskola yi kale kayi na iikwaniipangitho ya gwana molwaashoka otu na omwaalu gwaanona oyendji moongulu noonkondo. Ngele owa yalula aanona 35 noongulu 25 poskola nena otashi ku pe 875, ihe tse otu na aanona 1 213. Shoka osho sha eta uupyakadhi,” gumwe gwomaalongiskola a yelitha.Aalongiskola oya gandja uusama kelelo lyoshikondo shelongo moshitopolwa shaKavango West. Oya popi kutya oskola oya li ya tseyithilwa opo yi taambe aanona oyendji na oya pewa omauvaneko kutya otaya ka pewa iikwaniipangitho ihe shoka inashi ningwa. Oya tsikile kutya oya kala ya tegelela iikwaniipangitho mbyoka uule woomvula odhindji, na oya pula kutya uuministeli owa tegelela ngiini aalongi ya kwashilipaleke kutya aanona oya pita, ngele otaya longelwa monkalo yi li ngaaka.Oskola ndjoka inayi taalela owala ompumbwe yiipundi ihe nomambo woo goskola.Epngelo olya tula miiloonga omusindalongo omupe, ihe aalongi poskola ndjoka oya popi kutya oya yakula owala embo limwe moshilongwa kehe. Aalongi ohaya longitha omambo ngoka mokulongekidhila ootundi dhawo omanga aanaskola kaye na sha.“Katu wete ngele ooskola adhihe moshilongo odhili monkalo yi li ngaaka. Omolwashike taye tu ningi ngaaka? Pehulilo lyesiku iizemo yetu otayi yelekwa niizemo yooskola dhilwe moshilongo.”Mekokaakono lyokomumvo lyondondo onti 10, oskola ndjoka oyali tayi lalakanene epito noopresenda 50, ihe oopresenda owala 30 dha piti. Oskola ndjoka kayi na omandoloma goku ekelahi iiiyagaya, niiyagaya otayi monika kehe pamwe.Aalongi oya popi kutya kaye shi kutya oshike sha holoka po molwaashoka opwa li ehangano ndyoka lya pewa otendela yokukutha po iiyagaya poskola ihe ehangano ndyoka olya hulitha po okukala tali kutha po iiyagaya mbyoka etimbo ele lya piti ngashiingeyi.Etungo lyoombelewa poskola ndjoka, eshona noonkondo, niigongi ohayi ningwa aantu ya thikama.“Otu na ongulumambo, ihe otwali twa kunkililwa opo katu ningile iigongi yetu mongulu djoka, nangashiingeyi ohatu ningile iigongi mombelewa twa thikama molwaashoka kamu na ehala,” omulongi gumwe a popi.Aalongi oya popi kutya kaye na ombelewa yokukala uuna kaye na ootundi. Omukomeho gwelongo moKavango West, Theopolina Hamutumua, okwa uvaneke okuyamukula komapulo goNamibian Sun ngoka a ningilwa, momukokomoko goshiwike shika. KENYA KAMBOWE

Eteleleni iipundi yeni koskola

Comments

Namibian Sun 2025-07-07

Please login to leave a comment

Eteleleni iipundi yeni koskola

Comments

Namibian Sun 2025-07-07

Please login to leave a comment

Login