Epangelo olya ndopa okugandja omeya ga yogoka koshigwanaa

Ompumbwe yomeya ga yogoka nuukalinawa unene momalukanda ogendji mOvenduka otashi yi pondje uuthemba woomuntu, naangoka omaiyuvo gwomunaveta gwehangano lyoLegal Assistance Centre.
Kakele koshilongo ashihe, “mOvenduka omo amuke omu na nale omikalo odhindji dheyopambambo lyuuthemba womuntu,” Corinna Van Wyk a lombwele oNamibian Sun.
Van Wyk okwa yelitha kutya oopoloyeka dhomapekaapeko dhoLAC odha nuninwa okulonga AaNamibia kutya okukala nomeya ga yogoka nuukalinawa oshi li uuthemba womuntu.
“Ito vulu okupopya kutya oto tyapula uuthemba wopauntu omanga ku na omeya ga yogoka,” Van Wyk a yelitha.
Opoloyeka ndjoka oya totwapo opo tu tale kutya oshigwana osha pumbwa shike opo shi kale sha nongela kombinga yuuthemba washo mokukala nomeya ga yogoka opo shi tyapule uuthemba wopauntu.
Okwa yelitha kutya nonando okukala nomeya ga yogoka osha talikako onga uuthembna wopaliko, shoka inashi tothwamo mompango yuuthemba womuntu mekotampango, e yo pondje lyuuthemba wokukala nomeya ga yogoka otali patanekwa mOntopolwa 3 yekotampango.
Okwa pulaapula woo sho sha monika molopota yo-2013 kombinga yokukala nomeya ga yogoka mokati kAaNamibia, olopota ndjoka ya popi kutya konyala oopresenda 87 dhaaNamibia odhi na omeya.Omapekaapeko ngoka ga ningwa uule woomvula mbali mOmalukanda gaVenduka, otaga pataneke uukwashili womuyalu ngoka gwa gandjwa molopota ndjoka.
Van Wyk okwa popi kutya aakwashigwana mboka taya lumbu momalukanda gaVenduka kaye na omeya ga yela oshowo iikwaniipangitho yuukalinawa.
Van Wyk okwa tothamo omuyalu gwiinima mbyoka tayi imbi opo aakwashigwana ya kale nomeya kutya, epato lyopomba dhomeya naashoka osha thiminike aakwashigwana yeende iinano iile mokukakonga omeya.
Okwa popi kutya aantu otaya ende uule woominute 45 okukakonga omeya.
Okwa popi kutya, omidhingoloko dhimwe kadhi na uundjugo nenge uundjugo mboka ihawu longo nenge wa patwa naashoka otashi dhiminike aantu ya longithe iihwa naashoka oshi na uupyakadhi wopaundjolowele unene kaakiintu naanona mboka haya ende iinano iile okuya kwiihwa uuna eshito lya ithana.
Van Wyk okwa gandja uusama omolwa okwaaha tula miilonga nokuninga oshilalakanenwa shotango okugandja iipumbiwa mbyoka koshigwana. Okwa gwedha ko kutya eyo pombanda lyoondando moshilongo olya ningitha opo omahangano ngaashi NamWater li tule pombanda ondando yomeya nokukala itayi vulika kaathigona moshilongo.

JANA-MARI SMITH