Emino lyoTantalite lya tameke moWarmbad

Sha landula etamekitho lyiilonga yomina yokumina otantalite moWarmbad, mwene gwomina ndjoka oshowo omukwateli komeho gwiilonga yomina Kennedy Mineral Resources ota pangele okuyambulapo emino ndyoka, pakutula miilonga eshina epe lyiilonga opo ya vule okuyambulapo elanditho lyotantalite muuyuni.

Ehangano lyoKennedy Minerals nuumvo momwedhi Maalitsa olya tula miilonga eshina epe ndyoka tali kwathele emino lyoshilongomwa shoka momina tayi adhika moshitopolwa sha

//Karas . Omukomeho gwehangano ndyoka, Larry Johnson okwa holola euvo lye lyonawa sho ehangano lyoKennedy Minerals lye shi pondola okwaadha omwaalu gwiilonga omunene muule wethimbo efupi, omina ndjoka ya kala miilonga.

Omunambelewa ngoka okwa popi kutya oye shi pondola okulonga oshindji muule wethimbo efupi, na otaya tsikile nokulonga nuudhiginini opo ya vule okulonga oTantalum Ore yongushu yopombanda.

Ehangano okwa holola kutya oli li moonkundathana naapunguli oshowo naalandi yoshilongomwa shoka okuza koChina oshowo United States, pauyelele mboka wa tulwa kepandja lyomakwatathano gopainternet lyehangano ndyoka.

Ehangano lyoKennedy Minerals, olya popi kutya otantalite ohayi longithwa mokulonga iitopolwa yiikwamalusheno oshowo iilongomwa yilwe ngaashi oongodhi dhopeke, oolaptop nookompiuta, omathano gokuthaneka oshowo omathano guuvideo.

OGONE TLHAGE