Namibian Sun

Aantu oyendji oya li ya nyanyukwa okuhogolola ihe omakateko momulandu gwomahogololo oge ya tindile ompito ndjoka yokuholola uuthemba wawo wopaundemokoli.

Shoka osha pelwa ombedhi omulandu gwokuhogolola tagu ende kashona oshowo aanambelewa yokuhogololitha mboka ya ndopa okuya pomahala gokuhogolola pethimbo.

Moshitopolwa shaShana, aahogololi pOmaalala Primary School oshowo Panguleni Primary school moshikandjohogololo shaNgwediva oya tegelele sigo oowili dhokwatoka lela, sho aanambelewa yokuhogololitha ye ya pomahala ngoka.

Pahapu dhamwene gwomukunda Ekolyanaambo number 2, Tomas Kamutufe, oya li ya tseyithilwa kutya aanambelewa otaya kala poPanguleni okuza potundi onti 16:00 ihe oye ya po kongulohi.

“Sho nda yi pehala lyokuhogololela lwopotundi onti 13:00 onda adha aantu oyendji ye li nale momikweyo ya pyakudhukwa okuhogolola. Okuya potundi onti 16:00 aanambelewa inaya thika natango na oye tu lombwele kutya oye li mondjila ihe oye ya owala uusiku. Onda hogolola potundi onti 00:12 na opwa li aakokele oyendji natango mboka ya kala ya tegelela opo ya hogolole nokutula moshiponga oomwenyo dhawo momalweendo gawo gokushuna komagumbo,” Kamutufe a popi.

“Shika osha sitha aantu uunye sho potundi onti 18:00 unene aanyasha ya tameke okuthiga po ehala lyomahogololo na inaya galuka we. Sho aanambelewa ya thiki pehala opwa li owala aantu aashona.”

Pehala lyokuhogololela pOmaalala aanambelewa yomahogololo oya thiki po potundi onti 22:00, naasho aantu aashona ya hogolola olusheno olwa guko. Okwa li woo taku lokwa.

Omunambelewa gwomahogololo moshikandjohogoolo shaNgwediva, Albertina Alweendo, okwa popi kutya oya katekwa komwaalu omunene gwaahogololi ngoka hago gwa li gwa tegelelwa ihe oya kwashilipaleke kutya aantu ayehe mboka ya li momukweyo oya hogololo.

“Otwa mono aahogololi oyendji poosasiyona dhopakathimbo, okuyeleka nomiyalu dhoka dha li dha tegelelwa.

Moshitopolwa shaHangwena ongundu yaanambelewa aagameni yomaliko oya thigi po ehala lyokuhogolola inaya hogolola, sho aanambelewa ye ya tindile ompito yokuhogolola tango.

Elias Ndume okwa popi kutya oya li miilonga uusiku na oya li ye na einekelo kutya otaya pewa ompito ya hogolole tango opo ya ye komagumbo ya ka fudhepo yo ya vule oku ka lala miilonga, ihe oya adha po omukweyo omule pOngeleka yaRoman Catholic mOshikango.

Ndume okwa popi kutya molwaashoka oya lala miilonga na otaya shuna miilonga konguloshi oya pula ompito kaanambelewa opo andola ya vule okuhogolola tango, ihe inashi pitikwa molwaashoka omulandu gwokuhogolola otagu ende kashona dho omikweyo omile.

“Katu na nkene otwa yi komagumbo tu ka vululukwe opo tu vule ishewe okuya kiionga. Otwa li twa hala okuhogola ihe itatu vulu woo okwiitula moshiponga shokukanitha iilonga. Ongiini mbela ngele omukomeho gwetu okwa adha twa kotha miilonga molwaashoka inatu vululukwa?”

Omunambelewa gwomahogololo, Elizabeth Joseph okwa popi kutya omahogololo ogali taga ende kashona omolwa eshina lyovoter verification device (VVD), ndyoka lya kala itali longo nawa na oya longo koonyala.

Moshitopolwa shaShikoto namo omwa dhidhillikwa omaupyakadhi poomandiki gokuhogololela naanambelewa aapangeli yoECN oya hingi iinano iile ya ka kandule po omaupyakadhi ngoka omanga omayalulo gomawi gaahogololi inaga tameka. Shoka aniwa osha etitha ekateko megandjo lyiizemo okuza kiikandjohololo yimwepo.

ILENI NANDJATO