Coronavirus: Aochamub otashi vulika a lalekwe oshiwike shika

TOIVO NDJEBELAOVENDUKA Omukalelipo gwaNamibia koFrance, Albertus Aochamub okwa popi kutya ota tipo hwepo okuza komukithi gwocoronavirus na otashi vulika a lalekwe mo moshipangelo oshiwike shika konima sho a taambelwa moshipangelo momasiku 15 gaMaalitsa.Aochamub, ngoka a li nale omunambelewa omupopiliko gwOmupresidende Hage Geingob, okuli OmuNamibia gwotango ngoka a tseyika kutya okwa kwatwa kombuto ndjoka, kwa lopotwa ya tukuka moChina muDecemba gwomvula ya piti. Namibia monena okwa lopota iipotha yomukithi ngoka yi Ii 11.Okuya mOmaandaha, aantu ya thika po 40 174 oya kwatwa komukithi ngoka moFrance omanga omaso 2 606 ga lopotwa. Aantu yeli po 7 200 oyeeluka komukithi ngoka.Aochamub, ngoka a longa onga omukomeho gwehangano lyoNamibia Broadcasting Corporation (NBC) omanga ina wayimina Egumbo lyEpangelo mo 2015 okwa popi kutya okuli mombete ye yoshipangelo iikalekelwa. Okwa popi kutya omakonaakono gopaunamiti ngoka a ningilwa otaga holola kutya ota ti po hwepo nawa. Na okwa tegelela natango omakonaakono ga ningwe opo ku monike ngele ota lalekwa muule wesiku nenge omasiku gaali. Omunadiplomate ngoka a li moNamibia kuyele nuumvo okwa popi kutya ke na ontseyo kutya okwa kwatwa ngiini komukithi ngoka, unene sho ha longo nokuya mekwatathano naantu oyendji, na okwa popi kutya pethimbo ndika shoka hash osha pumbwa okukala oonkundathana. Okwa tsikile kutya konima sho a dhidhilike omadhidhiliko gopetameko gomukithi ngoka ngaashi oshivu oshowo uuwehame mepunda okwiikaleke kokule naantu ayehe, mwakwatelwa aaniilonga pamwe nofamili ye. Okwa tsikile kutya ina mona nenge a papatele ofamili yandje muule wiiwike itatu monena. Okwa popi kutya omukulukadhi gwe ngoka ngoka a li omundungiki nale moUniversity of Namibia okwe mu yambidhidha noonkondo pethimbo ndika sho ye kemo megumbo, sho e li woo ta longo aanona yawo pamilandu ya pewa koskola sho aanona itaya vulu manga okuya koskola.Aochamub okwa popi kutya okwa kala a tala omeho kiilonga nonando okuli moshipangelo. Elongitho lyuutekinika olye shi ningitha oshipu opo a vule okukala ta kutha woo ombinga miilonga ye nonando okuli mombete yuuvu. Okwa tsikile kutya nonando ongaaka ota tula woo miilonga omalombwelo goondohotola opo a vululukwe nawa.

Coronavirus: Aochamub otashi vulika a lalekwe oshiwike shika

Comments

Namibian Sun 2025-07-16

Please login to leave a comment

Coronavirus: Aochamub otashi vulika a lalekwe oshiwike shika

Comments

Namibian Sun 2025-07-16

Please login to leave a comment

Login