Amukoto ta katukilwa oonkatu

Amukoto okwa popi pethimbo lyomutumba gwa ningwa noshigwana kOmupresidende Hage Geingob mOmuthiya omwedhi gwa pi kutya, Nashongo oshowo Uusiku oyo taya dhana onkandangala onene muulingilingi mondoolopa ndjoka.

Nonando Geingob okwa pula Amukoto opo ka taandelithe omalundililo ita vulu okugakalela po, Amukoto okwa ndjiki oonyala mevi nokutsikila okupopya.

“Mayola gwaMuthiya oha longo uulingilingi, oku na ooplota dhi vulithe putano ina futa sha omanga omunashipundi gwelelo lyaMuthiya naye oha longo uulingilingi. Omuntu ngoka ta vulu okukoleka shika Omunambelelwa Omukuluntu gwelelo lyondoolopa. Inandi tila sha na onda pyakudhukilwa kehe shoka tashi ya,” Amukoto a popi.

Nashongo okwa popi kutya otaka katukila Amukoto oonkatu, ihe ina tumbula kutya oonkatu dholudhi luni.

Nashongo ota lundilwa kutya okwa longitha oonkondo dhe dhopambelewa mokukondjitha ekuto miilonga lyamenindjela gwiiyemo noonzo dhopauntu, ngoka e ya omutiyali okuza mokakonaakono, niitsa yoopresenda 66.6 omanga omuntu gwotango a zi mo niitsa 77.8.

“Ohatu kutu miilonga twiikwatelela kompumbwe yelelo ihe kashi shi kutya ongele tu shi omuntu. Otandi ka kwashilipaleka kutya edhina lyandje olya yelekwa na itandi mwena otandi ka katukila Amukoto oonkatu,” Nashongo a popi.

Oshifokundaneki shoNew Era osha lopota kutya Omunambelewa Omukuluntu gwElelo ndyoka, Samuel Mbangi ngoka ta thigi po iilonga, momukanda ngoka a shangele ominista yeyambulepo lyoondoolopa niitopolwa, Peya Mushelenga okwa tothamo kutya Uusiku, omupeha gwe Heskiel Nanyeni, Nashongo oshowo oshilyo shokomitiye yelelo Enos Shipahu otaya longitha pambambo oompito dhawo miilonga omolwa uuwanawa wopaumwene.

Okomisi yoAnti-Corruption Commission (ACC) otayi konaakona iipotha yuulingilingi mOmuthiya sha landula sho iilyo yimwe yoSwapo ya ningi omanyenyeto.

Momasiku 22 gaJuni nuumvo ongundu tayi iyithana Swapo Party Members, Supporters, Veterans and Sympathisers moshikandjo shaMuthiya, tayi kwatelwa komeho komukwatakanithi gwongundu moshikandjo shaMuthiya, Magnus Nangombe oya gandja omukandanyenyeto gwawo komukwatakanithi gwongundu yoSwapo moshitopolwa shaShikoto, Armas Amukwiyu, taya nyenyeta elelo lyondoolopa yaMuthiya.

Amukwiyu naye okwa kwatelwa mo momanyenyeto ngoka kutya okwa longo uulingilingi, sho e li gumwe gwomiilyo yokomitiye yokugandja ootendela.

Momukandanyenyeto ngoka gwa pewa Amukwiyu, ongundu oya popi kutya ope na uulingilingi nomaihumbato omawinayi taga ningwa kookansela yaheyali mboka ya kalela po ongundu yoSwapo mOmuthiya, nomaihumbato ngoka otaga teya po ethano lyongundu na otaya pula Amukwiyu a gune ookansela mboka.



Omalundilo

Ongundu otayi lundile mayola gwondoolopa Katrina Uusiku mokuhwahwameka elelo li kute miilonga omusamane gwe Thomas Uusiku, nonando ineshi enditha nawa mokakonaakono.

Natango ongundu oya popi kutya mayola okwa hwahwameke opo omusamane gwe a tumwe komadheulo gokuhinga eshina lyograder koSouth Afrika kongushu yoshimaliwa shooN$100 000 iimaliwa ya futwa kelelo lyondoolopa.

Natango aniwa mayola ngoka oku na ooplota odhindji mondoolopa moka, nonando ina futa oshimaliwa sha sha mokulanda ooplota ndhoka.

Omupeha mayola gwondoolopa Hisikiel Nanyeni, ngoka a li nale mayola okwa popiwa kutya naye okwiipe oplota ndjoka ina futila sha mondoolopa moka.

Omunashipundi gwokomitiye yelelo lyondoolopa, Beata Nashongo, ota lundililwa uukombunda mokukuta miilonga aaniilonga yelelo lyondoolopa.

Kansela Enos Shipahu ota lundililwa ekwatelo komeho lyelanditholyehala lyoSwapo Party Women's Council property, lyonomola 2 mOmuthiya Proper, konima sho a Shaina oombaapila dhelanditho lyoplota ndjoka onga ombangi. Shipahu natango ota lundila kutya okwiikuthile ooplota odhindji mondoolopa inedhi futila.

Kansela Samuel Shivute, omunashipundi nale gwokomitiye yelelo lyondoolopa ndjoka, ota lundililwa ekwatelo komeho lyelanditho lyoplota yongundu yoSwapo, natango ota lundililwa woo egandjo lyooplota kaakwanezimo ye omanga a li omunashipundi gwokomitiye yelelo.

ILENI NANDJATO