ACC ta konaakona otendela ya gandjwa kuuministeli wiilonga

CATHERINE SASMAN

Omukomeho gwomakonaakono moAnti-Corruption Commission, Nelius Becker, okwa koleke kutya ACC ota konaakona otendela yoomiliyona 2.4 ndjoka ya pewa ehangano lyoADDI Investment Africa opo ku tewe po ohotela tayi adhika pondingandinga yondoolopa yaKahandja.

Egandjo lyotendela ndjoka okwa hololwa lya e ta omananathano pokati komupeha minista James sankwasa oshowo omunambelewa omukomeho muuministeli mboka Willem Goeiemann, na okwa holoka woo omalundilathano gohokwe yopaumwene motendela ndjoka.

Becker okwa popi kutya ACC otaka konaakona omapopyo kutya otendela ndjoka oya gandjwa koADD shaaheli pamilandu.

Omunambelewa ngoka okwa popi kutya otaku hololwa kutya inaku ningwa etseyitho lyotendela ndjoka ngaashi tashi hololwa kompango ompe yoPublic Procurement Act. Okwa popi kutya natango otaya ka konaakona ekwatathano pokati kaamboka taya kutha olunyala motendela moka, oshowo ofuto ndjoka yi li pombanda noonkondo.

Sankwasa okwa lopotwa a talelepo ehala ndyoka tali tewa po mOlyomakaya yomasiku 9 gaMaalitsa na okwa pula iilonga mbyoka yi thikame meendelelo, ta pula woo opolisi yi hulithepo iilonga mbyoka.

Okuza mokavideo hoka taka topolelwathana komapandja goWhatsApp, Sankwasa, ngoka a thiki pehala ndyoka nohauto ye yiilonga yomashete yomwaala oluluudhe, okwa pula kutya osha ende ngiini sho okambapila kekoleko lyiifuta okuza koADDI Investmentka thiki muuministeli momasiku ga 6 gaMaalitsa ihe niilonga oya pitikwa nale yi tameke mesiku ndyoka.

Omukomeho gwoADDI Investment, John John, okwa tindi okuthikameka iilonga mbyoka ta pula ekoleko li li pamushangwa.

Sankwasa okwa popi kutya itaka gandja omukanda gwa sha kehangano ndyoka na okwa popi kutya otaka patululila ehangano ndyoka oshipotha.

John okwa pula ngele Sankwasa oku na ohokwe yopaumwene metungo ndyoka, ta popi kutya okwa li a talelepo ehala ndyoka nomupunguli gwaMalaysia, na oya hala okuninga po ouniversiti mondoolopa ndjoka.

Otiivi yoNBC oya li ya lopota uyelele kutya aatalelipo ya za koMalayisia koshiputudhilo shoLimkokwing University of Creative Technology, mboka ya talelepo Omupresidende Hage Geingob megumbo lyepangelo oya holola ohokwe yokutotapo oshiputudhilo shouniversti melongelokumwe lyepangelo oshowo noshikondo shopaumwene.

Olopota oya holola kutya oshiputudhilo shoka osho tashi ka futa iifuta ayihe tayi ka kalapo metulo miilonga lyopoloyeka ndjoka.

Aapunguli mboka pethimbo lyetalelepo ndyoka ya ningi oya popi kutya oya talela po endiki lyoNational Youth Service (NYS) moGrootfontein, ihe oya holola okwuuva nayi kwawo omolwa omakateko.

Oya holola nduno ishewe ohokwe mokutota po ouniversiti momatungo gaMeatco mEpandulo Meat Market mOkahandja.

John gwoADDI Investment, okwa shangele ACC omukanda ngoka natango gwa topolelathnwa koWhatsApp – moka a popi kutya oku na uumbangi kutya Sankwasa okwa talelepo ohotela ndjoka moKahandja, pamwe naapunguli yaMalayisia.



John okwa popi kutya etalelepo ndyoka okwe li ningi pamwe nomunambelewa okuza kuuministeli wiilonga, Henry Mwoka.

John natango okwa popi kutya Sankwasa okwa uvanekele aatalelipo mboka kutya otaya vulu okulongitha etungo ndyoka lya kala eliko lyepangelo okuza momvula yo 1985, ihe olya li lya yonagulwa komulilo.

Okwa tsikile kutya omukalelipo gwaNamibia koMalaysia, Anne Namakau Mutelo, okwa holola aatalelipo mbyoka ya za koMalayisia kutya aanangeshefa mboka ya pumbwa okuninga ongeshefa moNamibia.

John okwa popi kutya omolwa onkalo ndjoka okuwete kutya omupeha minista okwa pumbwa okulandula omilandu dhomondjila ngele okwa hala okugandja po ehala lyepangelo kehangano lyopamunwene lyaMalaysia.

Okwa tsikile kutya uukwamuhoko otawu dhana natango onkandangala moshikumungu shoka, molwaashoka Sankwasa oshowo Mutelo, opamwe naanambelewa yalwe yaali okuza muuministeli wiilonga ayehe oya za moshitopolwa shaZambezi.

Mutelo okwa ukitha omapulo agehe ngoka ga ningwa kuSelma Ashipala-Musavyi, ngoka e li omunambelewa omukomeho muuministeli womakwatathano gopondje.

Sankwasa ina yamukula komapulo ngoka a ningilwa.