Namibian Sun

Aanyasha mboka oya popi kutya sha landula sho ongundu ya yakwawo ya thika 173, mboka ya mono omadheulo nangashiingeyi oya mona iilonga, oyo ya landula ko.

Konima nkene ya tameke okuunga oontanda dhawo pehala mpoka mo 2014, aanyasha mboka oya ningi iikolokosha poompito dhilwe opo ya dhiminike andola epangelo li tale komanyenyeto gawo.

Onkalo ndjoka oya lunduluka sho aanyasha mboka ya mono yakwawo ya thika po 150 ya tumwa komadheulo mo 2016 kepangelo, na oya mono iilonga konima yomadheulo miiputudhilo yepangelo ya yooloka.

Oya popi kutya ngashiingeyi oye na omukumo opo kaya longithe omikalo dhuuhwapindi opo andola yapewe ekwatho kepangelo.

Oshifokundaneki shoNamibian Sun osha yi moonkundathana naanyasha mboka poKandjengedi mpoka pe na oombelewa dhoSwapo mpoka ya unga oontanda naanyasha mboka oya holola onkalo ndjoka yiiyadha muyo konima nkene ya kala ya unga oontanda mpoka, oshowo omukumo ngoka ye na okuya mo 2018.

Stefanus Simeon okwa popi kutya omvula yo 2017 inayi ya endela nawa molwaashoka iinima inayi enda nawa ngaashi yali ya tegelela omolwa onkalo yokwaahena woo iilonga ndjoka ya taalela.

“Otwa tameke onkalo ndjika mo 2014 molwashoka katu na iilonga nomaindilo getu inaga talika. Otatu kala mpaka sigo twa tumwa komadheulo kiiputudhilo ya yooloka, na otu na einekelo kutya otatu ka tumwa kiiputudhilo.”

Okwa gwedha po kutya okuya kegumbo, kashi shi etokolo lye okuninga ngashiingeyi.

Simeon okwa tsikile kutya onkalo yethiminiko okuza kaakokele komikunda oshimwe shomiinima mbyoka itayi ya shunitha komagumbo.

“Oshili ooshoka kutya otatu mono iihuna huka.

Ka tu na we shoka tatu vulu okuninga molwaashoka ngele otwa shuna komagumbo aakuluntu otaya popi kutya otatu kongo shike, molwaashoka yakwetu oye shi pondola okumona iilonga pakukala ya unga oontanda nokuninga omahololomadhilaadhila, na oyeshi pondola onkene natse osho tu na okuninga,” Simeon a yelitha.

Okwa popi kutya otaka ya owala kegumbo uuna a mana omadheulo ge na okwa mona iilonga, opo nduno ta shuna a kasile oshisho ofamili ye.

Okwa popi woo kombinga yomaupyakadhi ngoka ya taalela kehe esiku ngaashi okukala inaya lya uule womasiku, ootenda dhawo ndhoka dha kulupa omolwa omutenya nomvula, oshowo okukala kaye na iimaliwa ya tumine komagumbo. Simeon okwa tsikile kutya pethimbo lyomuloka ngaashi ngoka tagu tameke ngashiingeyi ohaya sikile ootenda dhawo noonayilona opo kaya lokwe, ihe shoka itashi ya teya omukumo opo ya shune komagumbo.

Julius Kasheeta, okwa popi kutya ekondjo lyawo olya ninga ethimbo ngashiingeyi onkene epangelo nali pulakene komakemo gawo.

“Ngele owe tu tala otatu kulupa. Tse yamwe otuli nale moomvula dho 30 ihe katu na natango iilonga. Itatu pula tupewe iilonga yontumba andola tatu hogolola, otwa hala owala okukala tu na iilonga nokuyambidhidha kekoko lyeliko lyoshilongo,” Kasheeta a popi.

Kasheeta okwa popi kutya oye na omukumo kutya otaya ka tumwa komadheulo taga landula ko opo ya vule okupula komeho noonkalamwenyo dhawo.

“Otuli ongundu onshona ngashiingeyi, tu li owala 30, na otwa kala tatu ihumbata nawa ethimbo ele ngashiingeyi.

Epangelo nali tu tume komadheulo, lyo tali ikutha omukundu gwaanona yekondjelomanguluko komapepe.”

KENYA KAMBOWE