Aanaskola 7 500 ya ningi omategelelo muule woomvula ndatu

Aanona yoskola ya thika po, 7 500 oya thigi po ooskola pokati komvula yo-2014 no 2016 konima sho ya ningi omategelelo.

Kwiikwatelelwa komiyalu dhoka dha pitithwa kUuministeli wElongo, aanaskola 4 000 oya thigi po ooskola omolwa omategelelo mo-2016,okuyeleka naanaskola 1 843 mboka ya thigipo ooskola mo-2015, mo-2014 aanaskola 1 797 oya thigi po ooskola.

Oshitopolwa shaHangwena osha lopota omwaalu omunene gwaanaskola 1 552 ya ningi omategelelo sha landulwa kOmusati ngoka gun a aanaskola 1 162 ya ningi omategelelo noKavango East 948.

Oshitopolwa sha //Karas osha lopota omwaalu omushona guli 100 omanga oHardap 187, Erongo 176, Khomas 280, Kunene 399 nOmaheke 245.

Aanona yaamati mboka ya thigi po ooskola omolwa omategelelo oyeli owala 138 muule woomvula ndhoka ndatu. Ominista yElongo, Katrina Hanse-Himarwa oya popi kutya uuministeli itawu pewa we oombedhi omolwa aanaskola mboka taya ningi omategelelo, ihe okwa popi kutya aavali naya yelithe kutya osha ende ngiini aanaskola ya ningi omategelelo omanga haya zi momagumbo gawo.

Hanse-Himarwa okwa popi kutya uuministeli otawu longo kehe shoka tawu vulu opo aanona mboka ya tsikile nomailongo gawo ihe okwa pula aavali naasilishipwiyu ya kuthe ko oshinakugwanithwa.

Omulandu omupe gwelongo otagu utha opo aalongi ya kuthe ombinga metsomukumo lyoofamili opo dhi kuthe ombinga mooprogramma dhopashigwana dha nuninwa okukondjitha eningo lyomategelelo mokati kaanaskola.

Omulandu dhoka odha nuninwa okuyanda omategelelo mokati kaanona yaanaskola, etopolo lyomauyelele, okuhiya oofamili naakwashigwana kiigongiilonga yi na sha noshikumungu shoka, okutsa omukumo oofamili dhi vule okuya moonkundathana naanona kombinga yiihulo, oshowo iikundathanwa yilwe.

Kwiikwatelelwa koForum for African Women Educationalists Namibia (FAWENA) aalumentu mboka ya tseyika noshilukadhina “sugar daddies” oyo taya pewa ombedhi omolwa omategelelo ngoka.

Omukwatakanithi gwoFAWENA na okwa li nale ominista yonkalo nawa yaanona Marlene Mungunda okwa popi kutya omiyalu ndhoka dhi li po itadhu vulu okutotha mo kutya aanona yaanaskola aamati oyo ya gandja omategelelo, molwaashoka mboka ohaya thigi po owala ooskola uuna aanona yaakadhona ya pula opo ya thige po oskola.

Omategelelo gamwe ogeli oshizemo shomakwatonkonga, ihe ihaga lopotwa molwaashoka aavali ohaya kala ye na ohoni yokulopota iipotha mbyoka.

“Ngoka omahokololo omadhigu molwaashoka miitopolwa yaKavango, aanona yamwe otaya ikutha omwenyo molwaashoka oya tindwa koofamili dhawo konima sho ya ningi omategelelo omolwa ohoni ndjoka haya etele oofamili. Moshitopolwa shaZambezi shoka shi li uushiinda niilongo yilwe, aanona ihaya ningi owala omategelelo ihe kwatwa woo kombuto yoHiV,” Mungunda a popi.

Omunapolotika ngoka okwa popi kutya oluhepo oshimwe shomiinima tayi etitha onkalo yomategelelo mokati kaanona yoskola, oshowo onkalo yokwaahena iilonga ndjoka ya thikama poopresenda 34.

“Ope na aakuluntu mboka haya tsu omukumo aanona yawo opo ya kale taya yi momakwatathano naasamane aakuluntu onga omukalo gwokumona iiyemo. Bernardus Harageib, omukomeho gwomahungomwenyo moLifeline/Childline okwa koleke kutya aalumentu aakuluntu oyo taya pewa ombedhi monkalo ndjoka naanona mboka ihaya kala ye na emanguluko lyokukundathana kombinga yiihulo ya gamenwa.



JEMIMA BEUKES