AaNamibia yatatu mboka ya kwatwa po moAngola ya mangululwa

Aalumentu yatatu AaNamibia ya za moshitopolwa shaKavango West, mboka ya tulwa miipandeko moAngola muNovemba gwomvula ya piti, sho ya hwikepo aniwa ondunda yamwene gwomukunda gwomoAngola oya mangululwa mEtiyali lya piti.

Aalumentu mboka ya za momukunda Sivara oshowo Kasivi oya tulwa miipandeko komalelo moshilongo shoka momasiku 13 gaNovemba 2019 na oya kala yeedhililwa mondholongo yedhina Menongue central prison moCuando, moCubango Province, konima nkene ya tulwa miipandeko.

Omukalelipo gwaNamibia moAngola moMenongue, Mauritz Gawanab okwa koleke koNampa kutya aalumentu mboka oya mangululwa omolwa ompumbwe yuumbangi na otaya ningi omalongekidho gomikanda dhawo dhomalweendo opo ya thige po oshilongo shoka.

“Ngashiingeyi oyeedhiilwa moombelewa dhomatembu molwaashoka kaye na omikanda dhomalweendo.”

Otaku hokololwa kutya aalumentu mboka oya taaguluka omulonga gwaKavango shaaheli paveta pamwe naakiintu omugoyi mboka ya li ya mangululwa pakunkililo.

Gawanab okwa lombwele onzonkundaneki yoNampa kutya konima sho a nongele kombinga yekwatepo lyaalumentu mboka muJanuari nuumvo, okwa mono woo uuyelele kutya modholongo ndjoka omu na AaNamibia mboka ya tulwa miipandeko na inaya pangulwa konima nkene ya tulwa miipandeko.

Omukiintu gumwe OmuNamibia naye, ngoka a li a tulwa miipandeo moCalai, konima sho a tamanekwa kutya okwa dhipaga okanona ke okwa mangululwa mOmaandaha omolwa ompumwe yuumbangi natango.

Gawanab okwa kunkilile AaNamibia mboka yeli popepi nomulonga ya hulithepo okuya moAngola shaaheli paveta, nopehala naya longithe oongamba, molwaashoka Namibia naAngola iilongo iyali ya yooloka, yin a oompango dha yooloka natango.

Aalumentu mboka ya mangululwa okwa tegelelwa ya thike moshilongo mEtine okupitila koongamba dhaKatwitwi moshikandjo shaMpungu moKavango West.

NAMPA