Aalimi yomahangu ya pewa ompito yotango moshilongo

Ehangano lyoKavango East Regional Farmers Union (KERFU) olya tothamo omaupyakadhi ngoka taga ka indika nokuya moshipala aalimi yomahangu opo ya vule okulanditha omahangu gawo koAgro-Marketing and Trade Agency’s (AMTA).

Kwa indikwa elando lyomahangu okuza pondje yoshilongo

NAMPA

Omunashipundi gwoKERFU, Adolf Muremi okwa popi ngaaka, pethimbo a ningwa naye oonkundathana konzokundaneki yoNampa kombinga yetokolo lyoAMTA okulanda po omahangu gaanafaalama.

AMTA, okupitila moNational Strategic Food Reserves, okwa tseyitha oshiwike sha piti kutya otaka landa po omahangu gaanafaalama okuza keteyo lya piti.

Muremi okwa popi kutya etokolo ndyoka lya ningwa okuya oshipala eeto lyomahangu oshilongo okuza pondje yoshilongo ewanawa noonkondo, molwaashoka otali gandja ompito kaanafaalama yomoshilono opo ya vule okulanditha po omahangu gawo.

Okwa popi kutya nonando ndyoka etokolo ewanawa nompito ombwaanawa kaanafaalama yomoshilongo, okwa popi kutya ope na omaupyakadhi gamwe po ngoka taga ka ya moshipala aanafaalama yomoshilongo opo ya vule okulanditha po omahangu gawo kuAMTA, unene mboka ye li kokule noompungululo.

Okwa popi kutya iiyenditho yokufala omahangu koompungulilo ndhoka oyo tayi ka kala omukundu omunene.

Muremi okwa gandja omayele opo AMTA a kale nomahala gopakathimbo mpoka aanafaalama taya vulu okufala omahangu gawo, na okwa tsu omukumo aanafaalama mboka ye na iiyenditho opo ya longithe ompito ndjoka nokukalanditha po omahangu gawo kehangano ndyoka.

AMTA okwa tseyitha woo kutya uuministeli wuunamapya owa gandja kehangano ndyoka iimaliwa mbyoka ya pumbiwa opo yi vule okulanda ko omahangu kaakwashigwana, go ga vule okupungulwa, moompungulilo dhuuministeli ndhoka tadhi silwa oshisho kehangano lyaAMTA.

Nonando ongaaka ehangano olya tseyitha kutya aanafaalama mboka taya landitha po omahangu gawo naya kwashilipaleke kutya oga yela go kage na uupuka.

Uuministeli owa tula miilonga eindiko lyokulanda omahangu pondje yoshilongo sigo kwa landwa po omahangu ngoka ge li mokati kaanafaalama yomoshilondo, naamboka haya tsu nokulanditha omausila oya pulwa opo ya lande omahangu gawo okuza kaanafaalama yomoshilongo.

Omunambelewa gwa AMTA e na oshinakugwanithwa shokusila oshisho iitopolwa yaKavango, Thomas Konstantin, okwa popi kutya omahala gopakathimbo ngoka taga popiwa otashi vulika gaka kale itaga vulu okuningwa omolwa omvula, molwaashoka kape na iinima yokupungula iilya mbyoka.

“Otwa pumbwa iinima yokupungula omahangu getu.

Nonando ongaaka okwa popi kutya aanafaalama otaya vulu okuya pomahala ngaashi Omega, Shadikongoro oshowo Shitemo Green Scheme mpoka pe na oompungulilo.