Aakomeho yaNIMT ya dhipagelwa piilonga

Aaniilonga moshiputudhilo shoNamibian Institute of Mining and Technology (NIMT) oya holola ehaluko lyawo noluhodhi olunene sha landula sho Omutotipo nomukomeho gwoshiputudhilo shoka Eckhart Mueller (72) pamwe nomupeha gwe, Heimo Hellwig (60), ya yahwa okusa moArandis.

Sho olukongo lwanakulonga oshimbuluma shoka talu tsikile, oshiputudhilo osha pata manga omiyelo sigo oshiwike twa taalela.

Omupeha komufala gwopolisi yErongo, Erastus Iikuyu okwa pula kehe ngoka e na uuyelele moshiningwanima shoka opo a gandje uuyelele kopolisi.

Edhipago ndyoka li nyanyaleka olya ningwa lwopotundi onti 06:00 ongula yOmaandaha konima shoMueller naHellwig ya thiki poombelewa onene dhoshiputudhio moArandis.

Opolisi oya koleke kutya iikuti ya thika pomugoyi ya za kombistoli yonine-millimetre oya adhika pomithimba ndhoka mbali.

Iikuyu okwa popi kutya otashi ulike kutya iikuti mbyoka oya umbilwa popepi.

“Oonakusa ayehe oye na iilalo yooholo momitse oshowo momapunda.”

Oondjato dhaalumentu mboka yaali odha adhika pehala lyoshiningwanima na kape na shoka taku konenenwa sha yakwapo.

Mayola gwondoolopa yaArandis, Risto Kapenda okwa lombwele iikundaneki kutya edhipago ndyoka otali ulike lya longekidhwa na okwa holola kutya okwa haluthwa koshiningwanima shoka.

Kapenda okwa popi kutya Mueller omuntu ngoka ina tungwa po owala oNIMT ihe okwa yambidhidha woo metungo lyondoolopa yaArandis. “Kali owala a simana kondoolopa yaArandis ihe omoNamibia alihe.”



Oombangi

“Onda uvu omitopelo dhoondjembo,” Gertrud Naobes, moshiputudhilo shoka a lombwele oshikundaneki shoAllgemeine Zeitung (AZ), mOmaandaha.

Sekuriti ngoka naye uuvu omitopelo okwa tondoka uuka kuNaobes konima yoominute dhontumba, te mu pula a dhengele opolisi.

Konima yethimbo okwa yi pehala mpoka pwa yahelwa aalumentu mboka na okwa a dha Mueller, hulitha nale omanga Hellwig, e na omwenyo.

“Hellwig okwa kambadhala okupopya sha ihe ka li ta vulu okupopya okwa ulike owala nonyala nokonima okwa hulitha.”

Opolisi oya tendeko ehala lyoshiningwanima naanaskola pamwe naaniilonga oya tseyithilwa ya ye komagumbo.

“Epulo kali shi kutya olye e shi ningi ihe omolwashike?. Omadhipago ngoka otaga ulike ga ningwa onga iikonene nenge edhipago lya longekidhwa,” omukwashigwana gumwe a popi.

Omukuntuskola moshiputudhilo shoka, Ralph Bussel okwa popi kutya NIMT otaka kala a pata uule woshiwike.

“Oshidhigu okutsikila niilonga ngaashi shito mpaka, unene oshidhigu sho aakomeho yetu yaali ya kuthwa po omukalo ngoka gu nyanyaleka.”

Elelo lyopombanda moshiputudhilo olya ningi omutumba mOmaandaha na olya tsukumwe opo oshiputudhilo shi ka patuluke owala mEtiyali lyomasiku 23 gaApilili.



ERWIN LEUSCHNER