Plaaslike genetika op wêreldvlak, bewys Du Preez Wild-veiling

Du Preez Wild se jaarlikse veiling by die Outjo Wildsfees het weer bewys dat die Namibiese wildbedryf sterk en veerkragtig is, met uitstekende pryse wat behaal is vir ’n wye verskeidenheid wildspesies. Du Preez Wild, in samewerking met Namibia Livestock Auctioneers (NLA), het bykans 250 diere suksesvol aan ’n entoesiastiese groep kopers opgeveil.Dirk du Preez van Du Preez Wild het sy tevredenheid oor die dag se verrigtinge uitgespreek. “Ons het 248 diere by die veiling gehad. Net ’n paar lotte het nie verkoop nie,” het Du Preez gesê. Die veiling het ongeveer 100 geregistreerde deelnemers gelok, met 55 bieërs in die saal en 45 wat aanlyn deelgeneem het.Gert van Wyk, die eienaar van NLA, het die positiewe atmosfeer beklemtoon: “Dit was ’n voorreg om hier in Outjo te wees. Ten spyte van die uitdagings van die afgelope paar jaar, het die wildbedryf steeds goed presteer. Die bedryf presteer tans goed.”INDRUKWEKKENDE PRYSEDie veiling het ’n gemiddelde prys van ongeveer N$25 000 per dier behaal, wat die hoë gehalte van die wild en die sterk mark weerspieël. Die hoogste prys van die dag was N$280 000 vir ’n sewejarige renosterbul, wat die uitsonderlike gehalte van die wild wat aangebied is, beklemtoon.In 2013 is ’n sewejarige renosterbul vir N$270 000 op ’n SwiftVee-veiling verkoop, en tydens ’n 2024-veiling in die Krugerwildtuin was die gemiddelde prys van drie volwasse bulle net onder R150 000 per dier.’n Ewe merkwaardige prys is behaal vir die vyfjarige swartwitpensbul, Canyon (lot 38), wat N$210 000 opgelewer het, met ’n indrukwekkende horinglengte van 49" en ’n punt-tot-punt-wydte van 57".Die prys van N$210 000 plaas Canyon in die middel-hoë-reeks vir 49"-horings in die topvlak-kategorie waar pryse wissel tussen N$220 000 en N$260 000. ’n Vyfjarige bul met sulke horings is uiters skaars en vergeleke met Suid-Afrikaanse markdata, presteer Canyon op of bo die markvlak vir sy horingtipe.Byvoorbeeld, die gemiddelde veilingprys van 13 swartwitpense wat aanlyn deur Wildswinkel op 9 April 2025 verkoop is, was N$96 000, met die hoogste prys van N$330 000 vir ’n bul genaamd Ambrose (52 3/8") verwek deur Mulobezi (51").Verder het die swartwitpensbul F250 (48,5”) N$170 000 opgelewer, terwyl verskeie ander volwasse bulle pryse tussen N$100 000 en N$140 000 per dier behaal het.Ander spesies wat goed gevaar het, sluit in tsessebe teen N$80 000 vir een ram en twee koeie, en lechwe teen N$74 000 per ram. Die bastergemsbokke het ook sterk vertoon, met volwasse bulle wat N$120 000 (lot 17) behaal het en koeie tot N$95 000.VERSKEIDENHEID LOK KOPERSDie veiling het ’n wye verskeidenheid wildspesies aangebied – van teelgroepe tot spesiaal uitgesoekte volwasse bulle. Koedoes het N$16 000 vir koeie en N$38 000 vir bulle opgelewer. Die beste gemsbok-verkoper was Ina-Mari (lot 26) vir N$50 000.’n Besondere hoogtepunt was die Damara-dik-dikpare (lot 53 en 54), wat onderskeidelik N$20 000 en N$25 000 per dier behaal het, wat opnuut die groeiende belangstelling in hierdie skaars spesie aandui.Van Wyk het die bedryf se huidige toestand geprys: “Die bedryf is lewendig, daar is baie kopers en die diere is in uitstekende kondisie danksy die goeie reënjaar. Ek glo almal sal puik diere ontvang wanneer hulle afgelewer word.”Du Preez het die sukses toegeskryf aan die vertroue wat kopers in gevestigde name soos NLA en Du Preez Wild het. “Ons kliëntebasis en die gehaltediens wat ons lewer, spreek boekdele. Daarom kom hulle telkemale terug.”Du Preez het sy dank uitgespreek teenoor die veiling se borge – Securitas, John Deere, FNB, Hollard, Hoffman’s Farm Implements en Namibia Helicopter Services – wat die geleentheid moontlik gemaak het. Hy het ook NLA geloof vir hul samewerking.Van Wyk het afgesluit: “Ek wil ook ons dank uitspreek teenoor die Outjo Wildsfees. Dankie vir die geleentheid wat julle aan boere en die gemeenskap bied. "Ons het sulke platforms nodig. Ek wens Dirk sterkte toe met die aflewerings en glo dat volgende jaar ook ’n reusesukses sal wees.”

Plaaslike genetika op wêreldvlak, bewys Du Preez Wild-veiling

Comments

Namibian Sun 2025-08-28

Please login to leave a comment

Plaaslike genetika op wêreldvlak, bewys Du Preez Wild-veiling

Comments

Namibian Sun 2025-08-28

Please login to leave a comment

Login