Uuministeli wUundjolowele otau ka longa natango ‘naanangeshefa aanashili’

KomutoolinkundanaOvendukaMinista gwuundjolowele Dr Esperance Luvindao ota ti uuministeli we natango otau ka longa naanangeshefa mboka “ye li nawa” mokumbestela iikwaniipangitho yopaunamiti noshowo oomiti dhaavu, ashike aanangeshefa mboka taya “yugu epangelo mombili” sho taya gwedhele oondando dhawo itaya ka longithwa nande.Luvindao okwa tseyitha kutya etokolo lyawo ndika otali longo nale, oshimaliwa sha konda poomiliona N$221 sha hupa po konima sho a ningi ominista konima yoomwedhi hamano.Ta popi kopolohalama yoThe Agenda koNTV, ndjoka tayi ka tumwa mombepo Osoondaha tu uka, Luvindao okwa ti kutya kashi shi shoshili kutya etokolo lye tali ka guma nayi oongeshefa dhaanangeshefa mboka haya mbestele iikwaniipangitho yopaunamiti noshowo omiti dhaavu– ngaashi aaniilonga taya kanitha iilonga yawo.“Kombinga yehokololo ndjoka tali hokololwa kutya Luvindao ke hole aanangeshefa. Onda hala okuyelitha kutya katu tonde aanangeshefa nande, onde ya simaneka noonkondo,” okwa ti.“Ashike, shika kashi oshiholelwa showala, omuti (opela) yongushu yoomiliona N$100 ashike ngoye oto yi landitha koomiliona N$450, shono kashi li nawa. Oto yugu epangelo. Kandi na uupyakadhi naaangeshefa noosupplier – noshotuu. Ngeshefa owala nawa.”Melelo lyaLuvindao, uuministeli wuundjolowele owa tameke okuya moonkundathana nomahangano gopaigwana haga nduluka omiti opo ya lande meukililo kugo gene – inaya longitha aanangeshefa yomoshilongo mboka oyo haya mbestele ko shito.Nonande ongawo, Luvindao ota ti uuministeli natango otau longo naanangeshefa yomoshilongo. “Otatu longo natango naanangeshefa yomoshilongo. Otwa topelela iitopolwa oshimaliwa opo yi mbestele omiti kaanangeshefa yomoshilongo pakathimbo.”Okwa gandja omalombwelo (omauthompango) ga yela kombinga yuuna ndoka epangelo tali ka longitha aanangeshefa oyendji yomoshilongo.“Ngele omuti (opela) ogwongushu yoomiliona N$100 noto tu pula oshimaliwa shi shi okuuvikiwa ko (okwiidhidhimikilwa), shono oshi li nawa. Nongele omiti oto dhi tu pe mbala, nasho oshi li nawa.”Okwa ti kutya ehokololo kutya okwaalongitha aanangeshefa mboka haya pula ondilo uuna taya mbestele iikwaniipangitho yopaunamiti noshowo oopela dhaavu molwaashoka otashi ka guma nayi eliko lyoshilongo, ehokololo ndjoka kali li mondjila lela.“Oshimaliwa shoka tashi hupu po otashi ka kutitha aapangi noondohotola odhindji, notashi ka longithwa woo mokwoopalekitha nokutungitha iipangelo iipe. Oshimaliwa shoka tashi hupu po itashi yi moondjato dhetu yene, otashi ka longithwa palwe. Ngele otatu ka tunga oshipangelo oshipe, nena omunangeshefa gwomoshilongo oye ta ka pewa otendela ndjoka. Onkene osha puka okutya otatu teya po eliko lyoshilongo sho tatu ungaunga naanangeshefa mbaka...”“Ngele ontanitho (oshimaliwa) yoye oyi shi okuuvikiwa ko, itatu ku mono lwaali. Ashike ngele oto yugu epangelo mombili itatu ku toka nande.”Minista okwa ponokelwa konima sho oemaila ye ndjoka a nyolele aanduluki yomiti yopaigwana ta pula oondando dhawo ya hutukile momake gaakwashigwana. Aasheki oya pula kutya omolwashike minista oye i ikwatela ko mwene komambestelo peha lyokweetha aanambelewa mboka ya pewa oshinakugwanithwa shoka oyo ye shi ninge yoyene.Luvindao okwa ti kape na sha konima ando osho she mu kwatitha komeho, ta ti okwa li u uvite kutya omunduluki ota ka yamukula mbala ngele okwa dhimbulula kutya etumwalaka olya nyolwa kuminista.“Oemaila ndjoka ya hutukile momake gaakwashigwana otashi vulika ya gandja ethano kutya oya tuminwa owala omunduluki gumwe. Ashike etumwalaka ndika olya tuminwa aanduluki oyendjiyendji, notwe shi ningile owina opo tu tale ngu ta yamukula ihe oku na ombiliha, e na omiti dhingi, note shi ningi mbala, nosho tuu.”Okwa ti kutya aaniilonga mboka ya pewa oshinakugwanithwa shoka, mwa kwatelwa iilyo yokakomtiye komambestelo muuministeli nayo oya nyolelwa oemaila ndjoka, opamwe nomahangano omakondololi ngoka haga tala ongushu yomiti nokudhi pa eziminino dhi pange aavu yetu.Oonkundathana dhaLuvindao meudhililo otadhi ka tumwa mombepo mOsoondaha koNetwork TV (DStv ochannela 285 nokoGOtv kochannela 25) potundi onti-20h00.

Uuministeli wUundjolowele otau ka longa natango ‘naanangeshefa aanashili’

Comments

Namibian Sun 2025-09-19

Please login to leave a comment

Uuministeli wUundjolowele otau ka longa natango ‘naanangeshefa aanashili’

Comments

Namibian Sun 2025-09-19

Please login to leave a comment

Login