Telecom ta hokolokwa a futitha omupenzeli iimaliwa yomayakulo ine ga mona uule woomwedhi heyali

Ehangano lyomakwatathano lyopashigwana, Telecom Namibia, otali ungaungwa nomalundilo gokupukitha aalandi mokutotulula omatsokumwe gomayakulo gopamalungula nokutsikila okufutitha aalandi nonando otaku popiwa kutya ihali vulu okutula mo omayakulo ngoka omolwompumbwe yiilongitho ya simana yomakwatathano gopaungomba. Shika osha thiga omupenzeli gumwe a longitha oshimaliwa she mokufuta omayakulo ngoka ina ga tulwa mo nando onale, manga a longitha wo oshimaliwa shilwe sha gwedhwa po opo a vule okukala e na omakwatathano. 

Sho a popi noshifo shoNamibian Sun moshiwike sha zi ko, omupenzeli gwomOutapi, Anna Kanime, okwa popi kutya okwa kala ta futu N$ 350 omwedhi kehe okuza muJanuali 2026 omolwomayakulo go-WiFi ngoka Telecom Namibia a ndopa okutula mo, nonando a li a pula ga lundululwe okuza kolukalwa lwe moWindhoek okuya kOutapi.

Kanime okwa popi kutya sho etsokumwe lye lyonale lya pu ko, okwa li a yi kuTelecom Namibia opo a lundululile omayakulo ge go-WiFi, nehangano olye mu tseyithile kutya oku na tango okushaina etsokumwe epe lyoomwedhi 36 (oomvula ndatu) manga elunduluko inaali ningwa. 

“MuJanuali 2026, onda li nda tokola okulundulula o-WiFi yandje okuza kolukalwa lyandje moWindhoek okuya kOwambo. Molwaashoka etsokumwe lyandje olya li lya pwa ko, onda lombwelwa kutya ondi na okushaina etsokumwe epe lyoomwedhi 36 manga elunduluko inaali ningwa,” osho a popi. 

Okwa popi wo kutya Telecom Namibia ineshi holola nando onale kutya oku na ompumbwe yiilongitho mbyoka ya pumbiwa okutula mo omayakulo ngoka manga inaaye mu pumbwa a shaine etsokumwe lilwe lyoomvula ndatu. 

“Pethimbo lyokuopaleka etsokumwe lyandje, inandi lombwelwa nando onale kutya ehangano kalina iilongitho yokutula mo o-WiFi yandje. Ngele oya li ya lombwele ndje shika, ando onda ninguluka momatokolo gandje,” osho a popi. 

Omanyolo ngoka ga tuminwa pokati kaKanime noshitopolwa shomayakulo gaalandi shaTelecom Namibia, ngoka ga monika koshifo shika, otaga ulike kutya Telecom Namibia okwa zimine edhiko ndika, noku li egameka kompumbwe yiilongitho yo-TD-LTE mbyoka kaayi mo moshilongo. 

Nonando eziminontseyo ndika opo li li, Kanime okwa popi kutya okwa kala owala ta tsikile nokufuta N$350 komwedhii uule woomwedhi heyali pwaana omayakulo go-WiFi ngoka a uvanekelwa, nokwa li wo a thiminikwa okulongitha oshimaliwa sha gwedhwa po mokulanda oondata dhomongodhi yopeke opo a kale e na omakwatathano gopamalungula. 

“Ethimbo kehe ndi na omapulo ko-Mobile Home yawo kOutapi, ohaye mu lombwele kutya na tsikile okufuta iifuta yokomwedhi omolwaashoka okwa shaina etsokumwe. Otashi limbilike lela kutya onda thikama metsokumwe ndika manga kaaku na omayakulo taga gandjwa,” osho a popi. 

Namibian Sun oku uvite wo kutya Kanime haye owala omulandi a gumwa koshikumungu shika, opu na wo aalandi yalwe muumbangalantu waNamibia mboka taku popiwa ya tegelela ethimbo ele opo ya tulilwe mo omayakulo gokointaneta omolwedhiko ndyoka lya kwatathana nuukalipo wiilongitho mbyoka ya pumbiwa. 

Kanime okwa popi kutya onkalo ndjika oya eta omutengi omunene gwoshimaliwa kuye e li omupenzeli, omolwaashoka okwa kala ta futu omayakulo gokointaneta yopegumbo ngoka inaa vula okulongitha manga pethimbo limwe ta landa oondata dhomongodhi opo a ye komalungula. 

“Ondu uvite nda kengelelwa. Dhiladhila okufuta oshimaliwa shokomwedhi manga wu na natango okulanda oondata. Ondu uvite nda kengelelwa!” osho a popi. 

Kanime ngashingeyi ota pula opo Telecom Namibia a hulithe po etsokumwe lye kaashi na egeelo lyasha nokugalula iimaliwa ayihe mbyoka a futu okuza muJanuali 2026, ta tsu omuthindo kutya aalandi kaye na okutegelelwa ya fute omayakulo ngoka ehangano lya ndopa okugandja. 

Oshikumungu shika otashi eta omanyenyeto omanene gegameno lyaalandi okutya ngele aalandi oya pulwa okushaina omatsokumwe gomethimbo ele nonando Telecom Namibia e na ontseyo kutya oku na ompumbwe yiilongitho ya pumbiwa okugandja omayakulo ngoka. Onkalo ndjika otayi eta omapulo ngele aalandi otaya pewa uuyelele wa gwana opo ya ninge omatokolo ge li mondjila manga inaaya ishaina ketsokumwe. 

Omwedhi gwa zi ko, Ehangano lyEkondololo lyOmakwatathano muNamibia (CRAN) olya tseyitha kutya aalandi yaTelecom Namibia otaya vulu okuhulitha po omatsokumwe gawo omolwomayakulo kaage li nawa nenge ompumbwe yomayakulo kaashi na okugandja iifuta yokuhenga po etsokumwe, shoka sha landula ekwatathano lyopambelewa nehangano ndyoka lya landula omanyenyeto goshigwana kombinga yegwemo lyomakwatathano, onkalo yomakwatathano kaayi li nawa osho wo ongushu yomayakulo gomakwatathano gopaungomba. 

CRAN okwa gandja wo elombwelo kuTelecom Namibia opo a tule miilonga omikalo dhomethimbo efupi uule woomwedhi ne opo a hwepopaleke omakwatathano, okupingena po iilongitho iikulu, okunkondopaleka omilandu dholusheno lwomeendelelo, okuhwepopaleka omakwatathano gopashigwana osho wo okunkondopaleka oonkambadhala dhokukondjitha eyako lyongopolo nomanyateko giitungilo. 

Sho a kwatathanwa naye okupitila montumwafo yopashinanena shinansha nomapopyo, omukuluntu gwomakwatathano gaayehe muTelecom Namibia, Nomvula Kambinda, okwa pula opo a kwatathanwe naye pangodhi. Nonando opwa li pwa ningwa elandulo lyongodhi nomapulo ga gwedhwa po gokuyelitha, ka kwali kwa monika eyamukulo pethimbo oshifo shika sha ya koshinyanyangidho.