Oshigwana inashi panda Mwene gwomukunda u ulikwa kelelo lyUukwambi

Omukwashigwana gumwe ina mbilipalelwa Adolf Katangolo, okwa nyolele elelo lyUukwambi opo lyaa tale ko euliko nelangeko lyaJesaya Develias Pokolo ongelenga, molwomatompelo ogendji nomolwashoka oshigwana inashi nyanyukwa.

Mombilive yesiku eti 5 Juni, ya nyolelwa Elenga enene Herman Ndilimani Iipumbu, Katangolo, okupitila maakalelipo ye yopaveta yehangano lyoKadhila Amoomo Legal Practitioners, okwa kondjitha uushili nokulonga nawa meuliko lyaPokolo.

Shi ikolela koshikalimo shombilive ndjika, euliko ndika otashi vulika li taaguluka Okatendo 10(1) nOkatendo 10(2) kOveta yOmalelo goPamuthigululwakalo yomo2000.

Katangolo ota ti kutya Pokolo ke na uumwene wevi momukunda ngoka u ulikwa a lele, oshoka ye oha zi mo momukunda gwi ili.

Ombilive otayi ti woo kutya oshigwana inashi yiwa nasho moonkundathana.

Aantu oyendji ngele haayehe, inaya kala ya tseya ngele ope na euliko nelangeko lye,” oshikalimo shombilive tashi ti shi, okwa li ta gandja omayamukulo kombinga yomapulo ga pulilwe moshigongi shoshigwana opo sha ningilwe.

Omatompelo ga gandjwa

Omakemo gamwe ngoka ga gandjwa ongaashi oshipotha shaPokolo sho ta popilwa shokutula mondhalate ehala lyaayehe . Katangolo ota nyenyeta kutya nonande Pokolo okwi indilwa a kuthe po ondhalate ye, natango ine shi ninga.

Pokolo ota popilwa woo uulunga wiimuna, nokwa li a patululilwa oshipotha nOpolisi yaNamibia. Ota lundilwa woo kutya okwa landitha po omaliko gaantu ashike inaga gandja oshimaliwa shaantu.

“Mbyoka yimwe yomiikoya yoshili mbyoka ta popilwa, aakalelipo yopaveta taya ti, “shi na sha naashoka, omuyakulwa gwetu ota kondjitha euliko nelangeko lyomuntu ngoka kee na nuuwanawa waalelwa ye komutima.”

Katangolo oti indile Iipumbu opo a tye euliko lyaPokolo kali li nawa noku pitike aakwashigwana ya hogolole omuleli gwawo ngoka ya hala, ta ti shoka otashi ka gamenena po uudemokoli wopekota nokukaleka aakwashigwana ye na einekelo maaleli yawo.

Elelo lyopamuthigululwakalo lyUukwambi olya pewa omasiku gatano opo li kale lya yamukula keindilo ndika lyopaveta. Elelo ka lya li lya yamukula sho oshifo sha yi komanyanyangidho.