Oongombe dha kana mofaalama yoKavango otadhi limbilike

Ookamunsela yoshitopolwa shaKavango Uuninginino oya holola euvonayi lyawo kombinga yuuhasha waawiliki yofaalama yepangelo yoKavango Cattle Ranch, hoka iimuna tayi kana nokuyakwa po.Kamunsela gwoshikandjohogololo shaTondoro, Joseph Sikongo, okwa hokolola pethimbo lyomutumba nokakomitiye koparliamente ke na sha neliko newiliko lyomayakulo goshigwana, kutya oongombe otadhi kana nokuyakwa po, naaniilonga ita vulu okuhokolola oongombe odha yi peni.“Oongombe otadhi kana nokuyakwa po, naaniilonga itaa vulu hokolola mpoka dha yi. Omanyami ga tya ngiini ngawo? Uulodhi wa tya ngiini ngawo? Ofaalama ndjika oya fa omina. Ashike nkene omina tayi longithwa momeho getu inatu shi panda. Itatu vulu sha oshoka katu na oonkondo. Sho minista a ulike ewilikongundu, minista okwa li a pumbwa okukwatela mo elelo lyopamuthigululwakalo nelelo lyopashitopolwa oshoka oyo ooyene yevi ndyoka,” okwa ti.Omukuluntuwiliki gwoonzo dhopantu melelo lyoshitopolwa shaKavango Uuninginino Matheus Singambwe okwa ti kohi yewiliko epe, aaniilonga mofaalama ngashingeyi otaa ende iinano iile ya ka konge omayakulo ga pumbiwa. “Monale, mofaalama omwa li okastola haka tonatelwa kaaniilonga yoyene, shoka sha li oshipu okulanda iikulya popepi inaa pumbwa okweendagula. Ngashingeyi, molwa owala okashako kookilohalama 10 kuusila wepungu, aaniilonga oya pumbwa oku ka landa koondoolopa dhopepi, ngele kOshaanda, kOshomeya, nenge kokule kule, koRundu,” okwa ti.Omalandithilo taga kaleleleOmunafaalama moKavango Uuzilo, Olavi Mahina, okwa holola ompumbwe yomalandithilo gopambelewa taga kalelele ngoka taga gandja oompito dhomahwahwamekopindiko aluhe okuza pokumuna sigo okokulanditha.“Otatu tseyithile okakomitiye kutya eshongo tu na olyo okwaa po komahwahwamekopindiko golela taga opalele notaga kalelele. Otwa hala ya fale ekemo lyetu moparliamente. Oshiholelwa, ngele ngame omunafaalama, onda pumbwa okukaleka po ongeshefa yandje okupitila muunafaalama. Shika otashi ti nandi hwahwameke nokupindika iimuna yandje, noku yi landitha po nokufutwa opo ndi fute omikuli kehe dhOmbaanga yuunamapya, okufuta aaniilonga yandje, nokutula mo omalongithopungulo natango mofaalama yandje,” Mahina a ti.“Ashike, moKavango Uuninginino kamu na omalandithilo golela gokutsa omukumo aanafaalama yi indile omikulo komahangano gopaipindi nenge koombanga ngaashi Ombaanga yuunamapya. Nopwaa na omalandithilo ge shi okwiinekelwa, aanafaalama itaa vulu okukaleka po oofaalama dhawo," Mahina a gwedha po.Okwa gwedha po wo kutya opwa pumbiwa okahala (okatopolwa) meni lyOmusinda Omutiligane.“Omakonakono gopetameko oga ningwa nale moshikumungu shika. Otwa pumbwa oku shi tula miilonga paku eta ondhalate yomusinda omutiligane ponkatu tayi kwatele mo oofaalama dhi li pokati koofaalama dhiipindi noofaalama dhaakwashigwana. Shika otashi pitika aantu yetu ya hwahwameke nokupindika iimuna yawo kombanda yomusinda omutiligane, shoka tashi eta ekoko lyeliko lyopashitopolwa. Ngashingeyi, iimuna otayi munwa, ashike okukala omuniimuna ashike itashi piti,” okwa dhenge omuthindo.

Oongombe dha kana mofaalama yoKavango otadhi limbilike

Comments

Namibian Sun 2025-06-17

Please login to leave a comment

Oongombe dha kana mofaalama yoKavango otadhi limbilike

Comments

Namibian Sun 2025-06-17

Please login to leave a comment

Login