Okumonithwa iihuna kwethimbo nuule okwe etele ndje ndi thigwe po komadhiladhilo’- omufekelwa nakuyaha aantu koHenning Crusher a lombwele ompangu

Tuutileni Mikka, omulumentu ngoka ta tamanekelwa edhipago lyomuhona gwe noshowo onkambadhala yedhipago lyomuhona gwe omukwawo mongeshefa yedhina Henning Crusher mOndangwa omumvo gwa zi ko, okwa lombwele Ompangu yaMangestrata gwaNdangwa oshiwike shika kutya okumonithwa iihuna kwethimbo ele miilonga okwe e mu etele a thigwe po komadhiladhilo nokwa nyengwa okukondolola omadhiladhilo ge.Mikka (49) ota ningi eindilo lyombooloha pambelewa konima sho ta tamanekelwa iipotha ngaashi: edhipago, onkambadhala yedhipago, okuyaka po ombasikela yaantu, okuninga omatilitho nokuumba ondjembo mokati kaantu. Ota tamanekelwa okuyaha nokudhipaga John Myburgh (43) nokweehameka noonkondo Johan Richter (44), mbaka yaali oya li aahona (oomeniindjela) ye moHenning Crusher.Koshipala shOmupanguli Mangestrata Nelao Ya France, Mikka okwa ti ke shi shoka she mu adha esiku ndjoka lyoshiningwanima, okwa fatulula oshiningwanima shoka ongethimbo ndjoka “omadhiladhilo ge ge mu thigi po.”Okwa dhimbulukwa nkene ethimbo nuule a kala ta hepekwa kaahona ye mbaka Myburgh naRichter. Oshikando shimwe, okwa ti, okwa pewa ombedhi nonande ombedhi kayi shi ye sho oondhopi dhaa li nawa dhongushu yoN$250,000 dha landithwa komuhona gwe. Moshiningwanima oshikwawo, okwa li a lombwelwa a tumbe oye awike ongudhi onene, ndjoka ya pumbwa okutumbwa koshihauto nenge kaantu oyendji. Mikka okwa hokolola kutya omuhona gwe gumwe okwe mu yolo mOshimbulu moshinima shika, shoka she mu thigi a sa ohoni.“Sho nda yi meni ongudhi ndjoka itayi vulu okutumbwa komuntu gumwe oshoka naantu yane ihaye yi vulu. Onda pula opo embakumbaku li kwatha ndje ashike onda lombwela ndi yi tumbe ongame awike ti. Okwa li a tumbula ngeyi: Ons maak jou warm laat jy weet kutcha wie is shilumbu,” okwa ti. Mikka, ngoka a kala nondjembo yi na ombapila uule woomvula omugoyi noinaa uvikila nande osha nale, okwa ti kutya okwa vulwa nokuvulilwa momasiku 4 Kotoba 2024. Okwa lombwele ompangu kutya okwa li ta li okakuki e ka pewa komuniilonga pamwe naye sho Myburgh e mu lundile noku mu lombwela kutya ota taaguluka oompango dhomiilonga sho ta li pethimbo lyoowili dhiilonga. Lwanima, okwi ithanwa a ye kombelewa opo a ka shaina ekumagidho lyotango ndjoka a pewa, ndjoka a tindi oku li shaina, oshoka ota ti ina pogola nandenande.“Ina pa ndje ompito ndi mu yamukule nenge ndi ipopile nokwiikanyuna. Okwa kala owala ta ti nandi shi ya ningile oshipu, oshoka onda adhika nde ya lopota koombelewa dhaaniilonga ngohela,” Mikka a hokolola. Okwa ti kutya okwe ya indile opo yu uvathane, oshoka okwa fatulula kutya iilonga okwe yi pumbwa opo a kale ti ikwatha nokukwatha aapambele ye, ashike Myburgh ine mu pupa nokwe mu undulile pondje.Mikka okwa lombwele ompangu kutya okwa tameke ta kakama nokulila noonkondo oshoka ehepeko alihe e enda mulyo miilonga mbika okwe li dhimbulukwa. Okwa ti kutya okwa li e na elalakano lyoku ka kutha mo iinima ye mokaskopa kaantu nokuthiga po iilonga yaantu, ashike okwe ki idha ya adha owala a galukila pombelewa yaahona ye, a pugalala.“Itandi dhimbulukwa sho sha ningwa po. Onda ka mona owala aantu ya lala—gumwe okwa kuutumba, omukwawo okwe egamena koshitaafula,” Mikka a ti, a lulilwa noonkondo. Okwa gwedha po kutya sho a ka godhipukwa, okwa kwatwa kuumbanda. Sho a dhimbulula iihuna mbyoka a longa, okwa fadhuka po a kayila okathanguthangu kaantu u uka kopolisi, opo e ki ilopote kutya okwa longa omuyonena.Aatamaneki oya tokola oku ka ulika okavidio koshiningwanima shika shokuyahwa kwaanambelewa. Epulakeno lyombooloha otali ka ningwa momasiku 28–29 Auguste opo ompangu yopashitopolwa yi kundathane kombinga yoshipotha shika, naayehe mboka taya ka gongala ya vule okutala okavidio hoka.Ahende Tony Bock oye a kalela po epangelo, omanga Mikka okwa kalelwa po paveta kuahende Samson Enkali okuzilila kehangano lyoKadhila Amoomo Legal Practitioners.

Okumonithwa iihuna kwethimbo nuule okwe etele ndje ndi thigwe po komadhiladhilo’- omufekelwa nakuyaha aantu koHenning Crusher a lombwele ompangu

Comments

Namibian Sun 2025-07-15

Please login to leave a comment

Okumonithwa iihuna kwethimbo nuule okwe etele ndje ndi thigwe po komadhiladhilo’- omufekelwa nakuyaha aantu koHenning Crusher a lombwele ompangu

Comments

Namibian Sun 2025-07-15

Please login to leave a comment

Login