Ofamili yomOngwediva ya tindwa eindilo lyokuthikameka etidhomo lwawo molukalwa

Ompangu oya tula po kutya omuhungiliko gwiiniwe nenge omukalelipo gwomaliko ganakusa oye owala ta vulu okuya moohapu kombinga yomaliko ganakusa, kakele owala ngele opu na oonkalo dhi ikalekelwa odho dhi iteyela mo.Ompangu yoPombanda mOshakati oya tindi eindilo lyomeendelelo lya ningwa kaamwayinakadhhona yaali mboka ya li taya kongo okuthikameka ethigopo lwawo lyegumbo lyomOngwediva ndyoka lili mokati koontamanana. Ompangu oya hokolola kutya inaya gwanitha po iipumbiwa yopaveta okukondjitha uuyene weliko paankondo dhwawo yene, nonando opwa li omapopyo kutya egumbo olya li lya lundululwa paufudhime okuza momaliko ganakusa yina. Omupanguli gwopokathimbo, Marlene Tommasi okwa tseyitha etokolo ndika momasiku 29 gaApilili moshipotha moka mwa kwatelwa aamwayinakadhona, Ester Martin naEmerita Amagulu, taya tamaneke omunangeshefa Willbard Uushona Shiimi osho wo aatamanekwa yalwe, mwa kwatelwa Elelo lyoNdoolopa lyaNgwediva. Ompangu oya tula po kutya omuhungiliko gwiiniwe nenge omukalelipo gwomaliko ganakusa oye owala ta vulu okuya moohapu kombinga yomaliko ganakusa, kakele owala ngele opu na oonkalo dhi ikalekelwa odho dhi iteyela mo. Tommasi okwa hokolola kutya inapu monika oonkalo dha tya ngaaka moshikumungu shika.Martin (66) okwa li a pula ompangu opo yi keelele elombwelo lyetidho, yi talulule nokugandja etokolo lilwe kombinga yetokolo lya ningilwe nale pethimbo lyiihokolola moka Shiimi a li a sindana, osho wo okupitika aamwayinakadhona mbaka ya ye mo moshikumungu shika sha simana. Okwa popi kutya ina kala a tothwa mo pambelewa miihokolola yotangotango, nonando okwa kala e li megumbo moka okuza kevalo lye.Omikanda dhomompangu otadhi tseyitha kutya Martin okwa kala megumbo moka naanona ya li omu-10 osho wo uutekulu we omu-15. Okwa hokolola kutya okwa uvu owala kombinga yetidho ndika muMaalitsa sho omutseyithi gwompangu (deputy sheriff) a thikitha omanyolo ngoka tage ya utha ya ze mo megumbo.Oshilyo shofamili, Alina Elia, okwa tseyitha kutya ofamili oya kuthwa mo nale megumbo moka pethimbo oonkundana ndhika dha nyolwa. “Oye ya nopolisi e taye tu lombwele kutya natu ze mo. Ngashingeyi otwa thinanena owala mongulu yimwe mehalandjandja lyili popepi. Katu na shoka twa vula okukutha mo megumbo kakele owala kiipeleki mbyoka ya li ye tu ningila ongandjo yegumbo,” osho a popi.Omapopyo guulingilingiAamwayinakadhona mbaka oya popi kutya tangotango, evi ndyoka olya li kedhina lyaakuluntu yawo paLelo lyOpamuthigululwakalo gwOukwanyama, manga inali ninga oshitopolwa shondoolopa yaNgwediva na lwanima olya li lya gandjwa omagano kunakusa yina okuza kElelo lyoNdoolopa yaNgwediva.Yina sho a hulitha muJanuali 2022, otaku hokololwa ya mono kutya eliko lyotango olya li lya lundululilwa komwanakadhona gwaMartin, Jordan Mutatabikwa, osho wo omusamane gwe, Brian Mutatabikwa, manga inali landithwa Shiimi momumvo 2024 kondando yomiliyona N$1.285.Oya hokolola kutya omalundululo ngoka oga ningwa paufudhime, taya popi kutya omashaino gayina ngoka ge li komikanda dhelundululo lyeliko oga yooloka ko koshikahashaino she shoshito, oshoka okwa li keeshi okulesha nokunyola nokwa kala owala ha shaina nomunwe omunene nenge nokakombo (cross). Oya tsikile nokuhokolola kutya omutekulu okwa zimina kutya okwa kuthile po omikanda dhuuthemba dhayinakulu kaashi li paveta e ta shaina omikanda opo a shangithe eliko ndyoka medhina lye, nelalakano lyokukonga oshimaliwa shomayambulopo gomalukalwa gepangelo. Shiimi okwi ipatana ondjo ya sha, nokwa ti okwa landa evi ndika paveta okuza kooyene mboka ya shilipalekwa pamushangwa. Okwa popi kutya aamwayinakadhona mbaka oya dhikala okulopota eliko lyanakusa yina, nokukala megumbo moka ina ku ya pa uuthemba nenge uukwatya wokukondjitha omalundululo ngoka. Ompangu oya tula po kutya nonando omalundululo ngoka ga ningwa nale oga ka tseyithwa lwanima kutya otaga kandulwa po nokagena oonkondo, evi ndyoka oli na okugalukila momaliko ganakusa, shoka tashi ti kutya onkatu kehe yogalula evi ndyoka oyi na okweetwa po komukalelipo gwomaliko ngoka, kaashi shi owala kaathigululi paankondo dhawo. Eindilo olya tindwa, nekandeko kombinga yuukwatya wopaveta waamwayinakadhona olya yeluthwa. Kapu na elombwelo lyoofuto lya ningwa, neindilo lyomomukokomoko gwomalimbililo olya manithwa.Eindilo e pe Hahende gwofamili, Slogan Matheus, okwa popi kutya eindilo olyaalela owala komilandu dhopaveta oshoka Martin okwe li tula mo pauthemba we, pehala lyokukala omukalelipo gwomaliko ganakusa yina.“Oshikumungu shopaveta shoka sha tulwa po kompangu osha li owala shokudhika ethimbo, ihe ihashi hulitha po uuthemba waMeme Martin wokupula evi lye,” osho Matheus a popi.Okwa popi kutya onkatu ompe yompangu yoPombanda oya tulwa mo nale pehala lyaMartin, ngashingeyi e li omukalelipo gwomaliko pambelewa, nelalakano lyokutseyitha kutya omalundululo agehe gopaali kage na oonkondo osho wo okugalulila uumwene wevi momaliko ganakusa. Oshikumungu shika ngashingeyi opo shi li tashi tegelele okugandjwa komupanguli opo ku uthwe okomitiye yokutulapo omulandu gwomahokololo. Mayola gwaNgwediva, Naemi Amuthenu okwa popi kutya ekwatathano lyelelo lyondoolopa olya hulila owala pethimbo lya lundululile evi ndyoka kunakusa yina yaamwayinakadhona mbaka. Okwa tsikile ko kutya elanditho ndyoka lya landula ko olya li owala lyopaumwene (lyopakati kaantu yaali) na kalya li moonkondo dhelelo lyondoolopa.

Ofamili yomOngwediva ya tindwa eindilo lyokuthikameka etidhomo lwawo molukalwa

Comments

Namibian Sun 2026-09-10

Please login to leave a comment

Ofamili yomOngwediva ya tindwa eindilo lyokuthikameka etidhomo lwawo molukalwa

Comments

Namibian Sun 2026-09-10

Please login to leave a comment

Subscription Required to Access Content ×

Login

Subscription Required to Access Content