Nandi-Ndaitwah naShaningwa ‘ye li mewi limwe’

Omupresidente gwoSwapo Netumbo Nandi-Ndaitwah okwe ekelehi omapopyo kutya kaya uvitathane namushanga ndjai gwoSwapo Sophia Shaningwa, konima yiiwike yomafaafayeko sho Shaningwa inaa holoka kiinyangadhalwa yopashigwana nenge yoSwapo mbyoka omupresidente oye a li omupopi omunene gwesiku.Omwedhi gwa zi ko, oshikundaneki shoNamibian Sun osha kundanekele kombinga yiitudhi ya simana mbyoka ya kalwa kuNandi-Ndaitwah, ashike okwaaholoka kwaShaningwa okwe eta opo aantu ya tameke okupopya.Yimwe yomiituthi ya simana mbyoka Nandi-Ndaitwah a li ko ihe Shaningwa kali ko, ongaashi edhimbuluko lyevalo lyoSwapo eti- 65 lya dhimbulukilwa koKamanjab, edhimbuluko lyEsiku lyAaniilonga lya ningilwa mOshakati, oshituthi shokomumvo shOmagongo sha li kOmhedi kOshitopolwa shaHangwena noshowo oshituthi shokudhimbulukwa omukokoli presidente Sam Nujoma shoka sha li ko mOvenduka.Omaunambonambo, Shaningwa ina holoka kedhimbuluko lyotango lyokudhimbulukwa omadhipago ga-ki-na-henda sha li ko mOvenduka, hoka Nandi-Ndaitwah oye a li omupopi omunene gwesiku.Oshikundaneki shika osha kundaneke kutya okwaakala olundji kwaShaningwa piituthi mpoka pu na omupresidente Nandi-Ndaitwah otashi kwatakanithwa nokwaauvathana kwa ziilile moshigongi shopolitburo sha li ko pomathimbo mpaka. Moshigongi moka, iilyo yongundu ya za koshitopolwa shaTjozondjupa otaku hokololwa kutya oya holola omalimbililo gawo kombinga yiilonga yaShaningwa momahogololo haga ningwa mongundu.Iilyo mbyoka ya yemata oya li ya pula Shaningwa mwene ashike inayi yelelwa keyamukulo lye. Oya li anuwa ya fala ekemo lyawo kuNandi-Ndaitwah okupitila momusamane gwe, ondjai yomatanga moshipundi shevululuko Epaphras Denga Ndaitwah.Mokuyamukula, Nandi-Ndaitwah okwa li a hiya meendelelo oshigongi shopolitburo, naShaningwa okwa li a pulwa a fatulule shoka ha longo momahogololo mongundu. Shaningwa anuwa okwa li a ganda Nandi-Ndaitwah sho a pulakene komangungutulo ngoka inaga endela mombelewa yamushanga ndjai. Okwa li woo a holola okwaauva ombili kwe kombinga yeidhopo mo lyomusamane gwotango moshikumungu shika.Uukumwe Nonande ngawo, sho a li ta popi poshigongi shiikundaneki ohela mOvenduka, pamwe naShaningwa, Nandi-Ndaitwah okwa ti oshigongi niikundaneki osha li sha ningwa opo iilyo yoSwapo naakwashigwana ya kwashilipalekwe kutya aaleli yongundu oya kwatathana notaya longo neitulo mo okunkondopeka ongundu.“Otwa piyaganekwa kwaashoka tashi popiwa: kutya ngame namushanga ndjai gwongundu ihatu tsu tu thithe we,” Nandi-Ndaitwah a ti.Omupresidente okwa koleke kutya Shaningwa ina holoka piituthi mbyoka ya popiwa ashike okwa ti omadhiladhilo ngoka taga dhiladhilwa kaakwashigwana hago nande.“Okushi yelitha nawa, sho nda yile kedhimbuluko lyevalo lyoSwapo eti-65, amushanga ndjai okwa li a ya kefumviko lyomumwayinagona,” okwa ti.“Sho nda yile kedhimbuluko lyEsiku lyAaniilonga, amushanga ndjai okwa yile a ka taambe ko iilyo yimwe iipe tayi wayimine ongundu kOmbaye nOshiwakopo,” Nandi-Ndaitwah a gwedha po. “Sho kaa li po pesiku lyokudhimbulukwa omadhipago ga-ki-na-henda, amushanga ndjai gwetu okwa li koLuanda moAngola, molwoshigongi shoongundu ndhoka dha mangulula iilongo muupika niilonga ayihe mbyoka oya longwa kwamushanga ndi shi shi nawa nonde mu halela omayambeko, ongomupresidente gwongundu,”omupresidente a ti.Okulongela oshilongo nongundu Omupresidente okwa dhenge omuthindo kutya oya longelele pamwe nawa pethimbo lyiikonga yomahogololo.“Pethimbo lyiikonga yomahogololo, nangame namushanga ndjai otwa li tu na okukala twa kwatathana, oshoka otwa li tatu lalakanene oshinima shimwe pethimbo ndjoka– iikonga yomahogololo mbyoka ye enda nawa," okwa ti."Ngashingeyi sho iikonga yomahogololo ya hula nongundu yoSwapo oya sindana, ngame namushanga ndjai otu na iinakugwanithwa nomaimapyakidhilo ga yooloka. Omanga ngame tandi lele oshilongo, ye ota nana nokulonga iilonga yongundu tayi pangele," Nandi-Ndaitwah a fatulula. “Onkene osha yela kutya itatu vulu okukala piituthi atuhe aluhe, oshoka shika otashi ikolele kiilonga yetu ya yooloka mbyoka tu na.”Okwa dhenge omuthindo woo kutya ayehe yaali yonamushanga ndjai oyi itula mo mokunkondopeka ongundu nomokwaadha iilalakanenwa mbyoka ya hala okutsakanitha ngaashi tayi holoka momukandauvaneko gwongundu. - nikanor@nmh-hub.com.na

Nandi-Ndaitwah naShaningwa ‘ye li mewi limwe’

Comments

Namibian Sun 2025-06-16

Please login to leave a comment

Nandi-Ndaitwah naShaningwa ‘ye li mewi limwe’

Comments

Namibian Sun 2025-06-16

Please login to leave a comment

Login