Elundululo lyoongombe 1 247 dhaKanepolo lya kalekwa kUuministeli

Uuministeli wuunamapya owa li wa kaleke elundululo lyoongombe 1 247 dhomomaliko gomunangeshefa omukulu nomukondjelimanguluko nakusa Simon 'Kanepolo' Mulunga konima sho aana ye ya pula kombinga yelunduluko lyuumwene.Onkatu ndjika oya landula omukanda gwa za momasiku 10 Desemba 2023, gwa za kOmbelewa yOohahende yoAusiku Attorneys, dhi li muukalelipo gwomwanamati gwaMulunga, Tangeni, nayakwawo 13, mboka ya holola omaipulo kutya Mesag Mulunga, ngoka a li omutseyi gweliko pethimbo ndyoka, okwa li ta lundulula oongombe dhahe dhiye kedhina lye mwene.Mokuyamukula hahende Tangeni Ausiku momukanda gwa za momasiku 19 Febuluali 2024, omukuluntuwiliki gwuunamapya gwa li po Ndiyakupi Nghituwamata okwa popi kutya omakonakono gOshikondo shOmayakulo gIimuna oga mona kutya elundululo olya longwa kaakuna omukanda gweliko nogomayamukulo ga za kOmbelewa yOmpangu yOpombanda.“Eindilo lyelunduluko lyuumwene woongombe dha shangithwa olya li lya ningwa momasiku 9 Aguste 2022 kOmbelewa yOlipota yOonyama (Meat Board), meindilo okwa monika kutya iimuna 1 247 oya li ya lundululwa mefiku tuu ndyoka lya-9 Aguste 2022."Omikanda dhoka dha gandjwa pamwe neindilo kOshikondo shOonyama odha li kaadhi na uuyelele wa gwana, molwaashoka omukanda gweliko nogomayamukulo gokutopola omaliko kOmpangu yOpombanda ka gwa li gwa gandjwa pamwe neindilo," Nghituwamata a shanga.Omukanda nguka kaa gu po ogu ulikitha nkene omaliko ganakusa ge na okutopolelwa aathigululi.Konima yokuninga omakonakono, uuministeli owa li wa gandja elombwelo opo elunduluko lyoshihako sho-Z000170D li kalekwe, wa tula iilonga ayihe yoshihako shika noya tula po oondjindikila ketaandelitho lyiimuna sigo opethimbo taya ka mona omalombwelo ga za kOmbelewa yOmpangu yOpombanda.“Na ku dhimbulukiwe kutya oongombe 1 247 ka dhi shi omwaalu gwashili gwoongombe dhi na omwenyo ngaashi sha nyolwa, molwaashoka ekonakono lyopofaalama popwene ka lya li lya ningwa, onkee opwa pumbiwa okuningwa omayalululo pofaalama popwene,” omukanda gwa lesha ngeyi.Uuministeli owa popi kutya omaimbo oge na ekwatathano noongombe dha sa nenge dha landithwa po kaadhi na oombapila mOmulandu gwEtotho nElandulo Lyiimuna moNamibia (NLITS).“Oshikondo shOonyama osha li sha lundulula iinima shi ikwatelela kuuyelele mboka wa li wa gandjwa kuyo,” Nghituwamata a popi.Oyana ya pataneke elundululoMomaipulo gayo gotango, oyana yaMulunga oya ti kutya Mesag okwa li ta kambadhala okulundulula iimuna omanga omaliko inaa ga topolwa.“Otu na omalombwelo kutya omutseyi gweliko gwangashingeyi gwomaliko ga tumbulwa metekolo, omusamane Mesag Mulunga, okwa fa ta kambadhala okulundulula uumwene wiimuna yanakusa wu ye kedhina lye mwene,” Ausiku a shanga.“Onkene otwa lombwelwa tu pule ombelewa yeni hulithe po nenge yi kaleke ethimbo omulandu kehe gukwatathana nelunduluko lyuumwene wiimuna yanakusa a tumbulwa, molwaashoka iinima mbyoka oyi na okushangithwa moshingundu shomaliko ganakusa omusamane Simon Mulunga,” osho a gwedha ko.Ausiku okwa popi kutya elundululo otali vulu okutula uuthemba waathigululi aakwawo moshiponga.Sho a kwatathanwa naye opo a gandje eityo lye, Mesag okwa tindi okupopya kombinga yoshinima shika.“Indi hala okupopya kombinga yoshinima shika. Onda li nde shi ku lombwele oshiwike sha zi ko kutya inandi hala okupopya kombinga yoshinima shika,” a popi.Oongombe odhi li oshitopolwa sheliko lyaMulunga, shoka sha kwatela mo ohambo yiimuna mOnalusheshete mOshitopolwa shaShikoto yagwana uunene woohektala 10 000 , omaliko galwe niiyenditho.Mulunga okwa hulitha momasiku 7 Desemba 2021, e na oomvula 74.Eliko lye olyo wo tali patanekwa mOmpangu yOpombanda kombinga yomukanda gwethigululo gwomasiku 13 gaMaalitsa 2020, ngoka gwa pe Mesag omaliko ogendji noopersenda 75% dhiimaliwa ayihe.Aamwayina 14 nomuselekadhi gwaMulunga, Alina Mbumbi, otaya pataneke uushili womukanda nguka, yamwe taya popi kutya eshaino lyahe otali vulu okukala lya lyandulukwa po paifundja.Mesag okwa dhiginina kutya omukanda nguka ogwa ulike ehalo lyahe, nonando Ombelewa yOmpangu yOpombanda oya ekelehi omukanda nguka molwaashoka kagwa li gwa manithwa nawa pamulandu gwOveta yomathigululo (Wills Act 7) yomumvo 1953.OSHILI: Mesag Mulunga. ETHANO: LYA GANDJWA

Elundululo lyoongombe 1 247 dhaKanepolo lya kalekwa kUuministeli

Comments

Namibian Sun 2026-10-26

Please login to leave a comment

Elundululo lyoongombe 1 247 dhaKanepolo lya kalekwa kUuministeli

Comments

Namibian Sun 2026-10-26

Please login to leave a comment

Subscription Required to Access Content ×

Subscription Required to Access Content