Uuministeli wUundjolowele wa katukile Noa oonkatu shi na sha nekwatonkonga

Uuministeli wUundjolowele owa tameke oonkatu dhomageelo gomeni dhiilonga mUuministeli e tadhi katukile ndohotola gwomoshipangelo shaNandjokwe ngoka a holoka mOmpangu yaMangestrata yaNdangwa ohela ta tamanekelwa oshipotha shekwatonkonga, ta li tseyitha kutya omalundilo ngaka ka ge na etsokumwe noondondo dhomaihumbato dhoka dha tegelelwa kaaniilonga yuundjolowele. 

Moshinyolwa, Uuministeli owa popi kutya otawu tala ko omalundilo ngaka taga popilwa Ndohotola Dennis Iipumbu Noa gwomimvo omi-31 "nepangulo enene", tawu shi hokolola kutya "oshilimbiliki kamana" noka ge li pamilandu ndhoka dha tegelelwa kaaniilonga yuundjolowele. 

Nonando Opolisi yaNamibia otayi ningi omakonakono giimbuluma shi na sha nomalundilo ngaka, Uuministeli owa popi kutya owa tameke oomilandu dhawo dhomeni pampangu yOveta yIilonga yEpangelo noompango dhoka dhi na sha noshinima shika. 

“Uuministeli owa ngunyine omikalo adhihe dhomapogolo gopaipala e tawu ikalekele po euvaneko lwawo lya kadhama mokukwashilipaleka omahala guuhaku ga gamenwa, ge na esimaneko noge li pandondo yopambelewa kaavu, kaaniilonga nokoshigwana,” osho wa popi.

Noa owa holoka lwotango kOmpangu yamangestrata Nelao ya France mEtiyali.  

Epangelo, lya kalelws po komutamaneki Aina Magano Mwaala, olya tindi etulemo lyomboloha, tali popi kutya oshi na oshipotha sha kola naNoa ngele a mangululwa ota vulu okupiyaganeka omakonakono gopolisi mokwiidhopa moombangi. Etamaneko olya holola wo omaikwato kutya ota vulu okutondoka, omolwuunene woshipotha negeelo ndyoka ta ka pewa ngele a monika ondjo.

Ompangu oya tseyithilwa kutya omakonakono oge li natango poonkatu dhopetameko, sho opolisi pethimbo ndika inayi mona natango oompito dhoombangi hamano, nokulongekidha omathano nokumona oolopota dhopaunongononi ndatu. 

Omuyuuki sigo a monika ondjo

Hahende omugameni Allan Homela owa popi kutya Noa oku na okupewa omboloha, ta popi kutya e li ndohotola gwopaunamiti ngoka e na iilonga yi niwe ompumbwe.Owa kumagidha ompangu opo yi kaleke po uuthemba we wopaveta lyokukala omuyuuki sigo a monika ondjo onga shi li pamulandu. 

Ya France owa undulile oshipotha shika keti 17 Juli opo ku pulakenwe eindilo lyomboloha e ta tula Noa mondholongo. Oshipotha osha undulilwa ishewe keti 29 lya Kotoba opo opolisi yi manithe omakonakono gayo. 

Oshipotha shekwatonkonga shoka tashi tamanekelwa Noa osha holoka konima yoomvula mbali sho a sindana eshipotha she shopetameko shekwatonkonga shoka sha kwatela mo omuvu gwomimvo omu-18 moshipangelo sha Katutura mOvenduka.

muNovemba 2024, Ompangu Yopombanda oya ekelahi ndjo ye negeelo lyoomvula mbali mondholongo, sho ya mono kutya Epangelo inali vula okugandja uumbangi wa wothaathaa nowa gwana nolopota yopaunongononi inayi yambidhidha etamaneko lyepangelo. Ompangu oya tseyitha emangululo lye lyomeendelelo.  

Oshipotha shika oshipe kashi na ekwatathano noshipotha oshikulu, shoka sha zi momalundilo gopetameko muApilili gomumvo 2021.