Omananathano molwuukwaaniilwa ohaga topola aantu - Sankwasa

Ominista yOmapendulopo gIilando nOmikunda Sankwasa James Sankwasa okwa londodha oshigwana kombinga yeindjipalo lyomalelo gopamuthigululwakalo omape ga hala okutaambiwa ko kepangelo naaleli yago ya gwedhwa po, okwa londodha kutya onkalo ndjoka ohayi lyatele pevi nokweeta oonkuluhedhi nomithigululwakalo dhetu dhaa simanekwe.Ta popi peegululo pambelewa lyOmutumba omuti-26 gwoLutu lwOmalelo goPamuthigululwakalo mOndangwa mOmaandaha, Sankwasa okwa yematele omananathano momalelo gopamuthigululwakalo, unenenene sho ekondjelo netaambathano lyelelo hali potokononwa kompangu. Okwa ti iipotha mbyoka oyo “ootakatika dhokutopola aantu” ndhoka hadhi yono ombili nengungumano moshilongo.Okwa dhenge omuthindo kutya oveta hayo omukalo tagu opalele gwokupongolola iikumungu ya pamba uukwaniilwa nelelo lyoshilongo, okwa ti kutya euliko nelangeko lyaakwaniilwa nali ningwe pamilandu nopamautho gopamuthigululwakalo ngoka ga tulwa po.“OngAayafrika, otu na oonkuluhedhi nomithigululwakalo dhetu ndhoka hadhi landulwa uuna aakwaniilwa taya tothwa mo nokuulikwa ya lele oshilongo, ndhoka twa kala tu na nomanga Aatiligane ano iilumbu inayi ya menenevi lyetu,” Sankwasa a ti.Okwa dhenge omuthindo kutya euliko, ekoleko nenge okupingena po omukwaniilwa naku ningwe mokwiiyutha kooveta dhopamuthigululwakalo ihe hamokulongitha omikalo dhilwe ndhoka dhaa shi dhomuthigululwakalo gwetu.“Monena kehe gumwe okwa hala okuninga omukwaniilwa nonande ke shi gwomezimo lyaawa nenge pamuthigululwakalo ina adha natango,” okwa ti. “Omuntu oho tsikile ngiini nokuninga oshinima shoka tashi teya po oshigwana nonande to shi zimine kutya ku uvite ombili?”Ooveta dhopamuthigululwakalo Sankwasa okwa dhenge omuthindo kutya aakwaniilwa ihaya hogololwa ihe ohaya ulikwa pakwiiyutha koonkuluhedhi dhetu noshowo koveta yetu yopamuthigululwakalo. Okwa longitha oshiholelwa shetokolo lyOmpangu yoPombandambanda mo2023, etokolo ndjoka tali sitha uunye omalelo gopamuthigululwakalo gaa potokonene uukwaaniilwa wago okupitila moohofa dhoshinanena, ta ti olundji etokolo lyompangu ohali nayipaleke onkalo nokweeta omatopoko natango peha lyokuhanganitha oshigwana.Minista ookwa dhimbulukitha aaleli yopamuthigululwakalo iinakugwanthwa yawo ngaashi ya ndjandjukununwa kOveta yOmalelo goPamuthigululwakalo yomo2000, oveta ndjoka ya nkondopeka aakwaniilwa nomalenga omanene kutya oyo aakalekipo naagameni yoveta yopamuthigululwakalo nokwa tegelela ya kaleke po ombili nelandulathano noshowo onkalo nawa miigwana yawo.Sankwasa okwa ti epangelo olya tseya nawa kombinga yomashongo ga taalela aaleli yopamuthigululwakalo ngaashi okulonga nokuungaunga niipambele yevi mevi lyaayehe, nokuuvaneke kutya otaka tsikila nokukwathela aaleli yopamuthigululwakalo ya kandule po omaupyakadhi ngaka.Omutumba nguka guule woshiwike, notagu hulu mEtitano, ogwe egululwa pambelewa mOmaandaha kOmupresidente Netumbo Nandi-Ndaitwah.

Omananathano molwuukwaaniilwa ohaga topola aantu - Sankwasa

Comments

Namibian Sun 2026-01-19

Please login to leave a comment

Omananathano molwuukwaaniilwa ohaga topola aantu - Sankwasa

Comments

Namibian Sun 2026-01-19

Please login to leave a comment

Subscription Required to Access Content ×

Login

Subscription Required to Access Content