Okakomitiye taka ka ungaunga noshikumungu shomahogololo gwAaswapo mOshomeya

Okakomitiye pitithi kongundu yoSwapo moshitopolwa shaShikoto oka tokola okwiithana aakomeho yongundu mboka ye li mokakomitiye hoka ta ke ki inekelelwa oshinakugwanithwa shokuungaunga noshikumungu shomahogololo ngoka gi ipyakidhilwa nago mOshomeya.

Shoka osha popiwa komukwatakanithi gwongundu yoSwapo moshitopolwa shaShikoto Armas Amukwiyu, sho a li ta popi noshikundaneki shoNMH mokugandja uuyelele kombinga yoshikumungu shomahogololo gokOshomeya shoka sha li miikundaneki pomathimbo mpaka.

“Oshikumungu shoka inashi ungaungiwa nasho natango. Otwa tegelela owala iilyo ayihe yi gwane po opo tu kaye moonkundathana nokukandula po omukundu nguka. Ope na okakomitiye hoka ka pewa oshinakugwanithwa shokuungaunga noshikumungu shika,” Amukwiyu a ti.

Amukwiyu okwa holola woo kutya okakomitiye haka okuungaunga nale niikumungu oyindji yomoshitopolwa nomaudhigu ngaka oga kandulwa po.

Kombinga yoshikumungu shokOshomeya, oshe etwa puuyelele kOmukwaswapo Shalipo ya Shalipo, ngoka a li ta talele omahogololo ngoka ga li momasiku 25 Juni. Ota ti kutya ookandidate dhimwe inaadhi sokononwa nawa odho tadhi hogololwa.

Mombilive ya nyolwa momasiku 26 Juni ya nyolelwa Amukwiyu, Ya Shalipo okwa hokolola kutya omunambelewa gwomahogololo okwe etha omawi ga yonuka ga yalulwe.

Pethimbo ndiyaka, Amukwiyu okwa koleke koshikundaneki shoNMH kutya ombilive okwe yi yakula nokwa gwedha po kutya okakomitiyepitithi moshitopolwa otaka ungaunga nasho.



Onkatu ombwanawa



Ya Shalipo okwa ti woo kutya pethimbo lyokusokonona ookandidate muukamunsela wiikandjohogololo nowoomondoolopa, Amukwiyu okwa tseyitha kutya oohailwa yamwe inaya gwanitha po iipumbiwanima mbyoka tayi pulwa—yamwe oya ndopa okugandja oodokumende ndhoka ya pulwa, omanga oohailwa yamwe inaya adha sho tashi pulwa.

"Ndjika oya li onkatu ya simana nombwanawa yokukwashilipaleka kutya ope na uuyuuki. Kakele, otashi limbilike kutya oshe ende ngiini nomolwashike omadhina gooihalwa mboka ga tulwa momusholondondo gwookandindate monomola yotango, oshoka otashi ulike kutya osho sha li ngaaka nopethimbo taya sokononwa," Ya Shalipo a ndhindhilike.

Okwa gwedha po kutya omunambelewa gwomahogololo okwa tseyitha kutya ope na owala ombapila yimwe yokuhogolola ndjoka yi na omadhina gookandidate heyali—aalumentu yane naakiintu yatatu—nomuhogololi kehe okwa tegelelwa a hogolole omulumentu gumwe naakiintu yaali. Oombapila dhokuhogolola ndhoka dhi na uukombo uushona nenge wa pitilila otadhi talika kutya omawi ga yonuka.

Aalumentu mboka ya li moshihogololitho oyo Mathew Hangula, Linekela Shetekela, Oscar Norich naObed Kuhanga, omanga aakiintu mboka ya li taya hogololwa oyo Talishi Haihambo, Ella Nghifindaka, naMina Enkono.

Epuko lyopauntu



Ya Shalipo okwa ti kutya omuhogololi gwotango okwa ti kutya okwa hogolola owala ookandidate mbali.

"Ndyoka olya li epuko lyopauntu, ashike omunambelewa gomahogololo okwa mweneke manga omahogololo nokwa pula ayehe ya li mosaala ya gandje epitikilo opo ombaapila yokuhogolola yi patululwe mo nomuhogololi a opaleke epuko lye, nosho sha ningwa," okwa hokolola.

Nonande omunambelewa gwomahogololo a kala nokutumbula olundji kutya oombapila dhokuhogolola owala ndhoka dhi na uukombo utatu odho tadhi ka yalulwa, omawi ogendji ga yonuka nago oga yalulwa—oombapila dhimwe omuntu gumwe ashike a hogololwa hayatatu ngaashi elombwelo tali ti, shi ikolela Ya Shalipo.

"Onda limbililwa, omunambelewa gwomahogololo okwa pitike ngiini omawi ngaka ga yonuka ga yalulwe, nonande oga taaguluka shi iwitikile ompango yomahogololo ndjoka a fatulula nokuyeleka nawa petameko lyomahogololo."



Omankankameno inaga faathana



Ya Shalipo okwa ti shoka sha ningwa po oshi li ompinge nomakankameno gokulonga nuuyuuki, gokuvulika noguudemokoli mongundu mboka tau thamunwa mekotampango lyongundu yoSwapo.

"Ongongundu yopapolitika ya tungilwa komakankameno gonyati, natu kwashilipaleke kutya omilandu adhihe dhongundu otadhi ulike uushili nonkalo ya faathana," okwa ti.

"Otandi indile neifupipiko enene opo omapuko ngaka ga talike nomeho omanene kaanambelewa, nokomongula aanambelewa yomahogololo naya dheulikike nenge naya longwe po nawa okwiiyutha komilandu dhomahogololo ndhoka dha tulwa po. Omilandu dhomahogololo nadhi simanekwa nokutulwa miilonga shili opo iizemo yomahogololo yi taambiwe ko pwaa na omangongoto," okwa ti.

Ya Shalipo okwa ti kutya ombilive ye okwe yi nyola mombepo ombwanawa nomolwohole ye yongundu yoSwapo. Okwa holola omukumo gwe kutya omitungilo dhongundu otadhi ka nkondopekwa—hakusuwakithwa—okupitila miilonga tayi longwa noshili nonawa. Okwa gwedha po kutya omahogololo gomonakuyiwa ookandidate nadhi sokononwe nawa manga inadhi ulikwa opo ku yandwe okungwangwaneka oshigwana nolwaamambinga mokuhogolola.

[email protected]







[email protected]