Mayola gwaHelao Nafidi e li muupyakadhi omolwomapopyo ge kombinga yiikondo yoparliamende ‘yEpangelo lyaSwapo’

Mayola gwondoolopa yaHelao Nafidi, Darius Shaalukeni, okwa pendutha ompata yopapolotika sha landula sho a popi kutya iikondo yoparliamende oya totwa po kepangelo lyelelo lyoSwapo nokayina okulongithwa mokulikola iitsa yopapolotika

Shaalukeni okwa ningi omapopyo ngaka mewi lyokepandja lyoFacebook sha landula etalelopo lyoshiwike sha ziko lyoshikondo shiikwainima yepangelo yooparliamende shaHelao Nafidi, hoka elelo lyondoolopa lya li lya konenenwa elongitho lyiimaliwa nuukalelipo walyo.

“Onga aakalelipo ya hogololwa kongunduleli yoSwapo, itatu tamukulula ko nuukalelipo pamulandu nelelo momalelo goondoolopa nosho wo miiputudhilo yilwe. Ashike, otatu nkondopaleke oongudhi dhika, sho oshigwana shetu oshina okukala sha tseya kutya iikondo yoparliamende oya totwa po kepangelo lyoSwapo nokayina  okulongithwa mokulikola iutsa yopapolotika,” osho a nyola. 

Omapopyo ngaka oga etitha omakemo kiilyo yoongundumpilameno, mbyoka ya popi kutya kansela gwoSwapo ota kwatakanitha iikwaniipangitho yelelo lyoParliamende nongunduleli. 

Ihe Shaalukeni okwa lombwele o-Namibian Sun uunambo kutya ka li e na elalakano lyokupopya kutya iikondo yooparliamende oyoSwapo, ihe okwa li ta popi uuleli wopapolotika mboka wa toto po iikondo mbyoka. 

Okwa popi kutya omapopyo ge oga pumbwa okuuviwa ko momukalo gwokutsikila ko kuuleli nokiiputudhilo yuukalelipo pehala lyuuyene wongundu. 

“Inandi popia kutya oshikondo oshoSwapo. Onda popi kutya osheya po kohi yepangelo lyoSwapo. Ngele Swapo oya tila eyelelo, andola inali pitika etotopo lyasho,” osho a ti.

“Ndika epangelo lya kwatelwa komeho koSwapo. Sho nokuli naamboka ya li ya hala ya kale ompinge noondunge ndhoka kaaya li po pethimbo iikondo mbyoka ya totwa po, yamwe yomuyo pethimbo ndoka oya li iilyo yoSwapo, ngashingeyi oya lundulula iikoto. Swapo okwa kala epangelo alike sigo onena ndjika,” osho a gwedha po.

Iithikamena

Shaalukeni okwa popile wo Elelo lyOndoolopa yaHelao Nafidi komapopyo kutya itali vulu okulalela po omamono goshigwana, ta popi kutya elelo ka lya li lya mono egandjo lyiimaliwa okuza kUuministeli wEhumokomeho lyIitopolwa yOondoolopa noyOkuushamba okuza moshikakomvula shiimaliwa sha ziko sigo omushika tu li.

“Oto ka inyengithila omayakulo kaakwashigwana ngiini ngele ina pu gandjwa sha? Oto ka gandja ngiini omayakulo taga pumbiwa uuna wa pewa oomiliona mbali dhokukwatela po omahalandoolopa gatano golomalukalwa? Kehe gumwe okwa pumbwa omeya ga yela, aantu owa pumbwa oolamba dholusheno momapandaanda. Shika osho omukundu ngoka nda taalela,” osho a popi. 

Okwa gwedha po kutya olopota yomayalulo gopashimaliwa yelelo inayi ulika iimaliwa ya kana po.

“Ito vulu okulongitha nayi shoka kuu na,” osho a ti.

Omuwiliki gwongundu yoAffirmative Repositioning, Job Amupanda, okwa gandja uusama kewi lyaShaalukeni, ta popi kutya iikondo yooparliamende oyi ikwatelela kEkotampango nokayi shi iilongitho yogundu tayi lele. 

“Inandi pumbwa okuninga oonkundathana dhopuukamba naantu kaaye shi okulesha nokushanga nawa. Oolopota yomuyalulindjayi gwiiniwe nomaliko gepangelo opo nale dhi li nodha yela lela. Osho shi lithe oshilongo shetu mevundakano. Inaya lesha Ekotampango noinaya uva ko kutya oparliamende otayi longo ngiini,” osho Amupanda a popi. 

Omukalelipo gwongundu yoIndependent Patriots for Change, Imms Nashinge, okwa tindi wo omadhiladhilo gaShaalukeni.

“Ngele otatu gandja omayele kutya oshinima shontumba kashi li pamulandu notatu gandja omayele opo omuntu a tulwe miipandeko, oshina okuningwa kaashi na kutya ngoye ogwongundu yini. Oshi li nokuli oshimbuluma lela okuwaana eipopilo lyomamona goshigwana,” osho Nashinge a popi.

Okwa indile oSwapo yi kuthe mo Shaalukeni, ta popi kutya omapopyo gaMayola oga ulika ethano ewiwinayi shi na sha nuunongo we welongitho lyomamona pamulandu.

“Opo oshilyo shi iholole momukalo nguka, ka shi shi nokuli oshi yolithi; oshi li ethikamepo eyemateki. Oku li omugundjunka nokwa pumbwa okukala e shi iinima hwepo,” osho Nashinge a popi.    

Ya tolokwa ku: Gottrieb Nambahu([email protected])