Oskola ompe yOngwediva Junior Secondary School inayi patuluka natango

Kape na natango uuyelele kombinga womatungo goskola ngoka ga koho oshimaliwa shoomiliyona 39, ihe natango oga thikama owala itaga longithwa.
Oskola ndjoka otayi adhika mondjila yaOndangwa- Ongwediva.
Aalongiskola, aanaskola yomoskola yaOngwediva Junior Secondary School oshowo aakwashigwana kaye shi kutya uunake taya tembukile moskola ompe ndjoka ya tungwa , tayi adhika owala oshinano shoometa dhontumba okuza momatungo ngoka yeli ngashiingeyi.


Omwedhi dha piti, omupevi minista gwElongo, Anna Nghipondoka okwa talele po oskola ndjoka na okwa uvithwa nayi konkalo moka tamu adhika oskola ndjoka.
Nghipondoka okwa uvaneke kutya otaka tala nokuninga omakonaakono kombinga yonkalo ndjoka na okwa popi kutya okuya poshikako oshitiyali shoskola omatungo ngoka otaga kala ga manithwa opo oskola ndjoka ya tungwa yi vule okulongitha.


Nonando ongaaka, sho omutoolinkundana gwoshikundnaeki shika sho a talele po oskola ndjoka oshiwike sha piti, okwa kundwa komukeeleli gwomaliko gwehangano lyaShilimela Security Company ngoka apopi kutya kape na omuntu a pitikwa okuya meni lyoskola ndjoka molwaashoka inayi patululwa pambelewa noshinyanga shiigongi inashi tungwa natango.
Nonando ongaaka kape na omainyengo gaantungi moskola ndjoka.
Oskola ndjoka oyali yi na okumanithwa nokupatululwa pambelewa muMaalitsa gwo-2014 ihe ehangano lyomatungo lyoWDL and Uukumwe Construction inali vula okumana okutunga nokondalaka yaawo oya kuthwa oonkondo.


Ngashiingeyi aalongiskola naanaskola otaya longelwa moongulu dhoskola ndjoka onkulu, ihe onkalo yomatungo oya nayipala nayi.
Oskola ndjoka tayi longitha ngashiingeyi kayi na olusheno, omakende oga tatuka nomakuma oga kulupa noonkondo okutothamo owala gamwepo gomomaupyakadhi moskola ndjoka.


Sho a ningilwa omapulaapula, oshiwike sha piti, omukomeho gwElongo mOshana, ina vula okugandja uuyelele washa kutya oskola ndjoka otayi manithwa uunake.
Nonando onkalo yoskola ndjoka oya nayipala noonkondo, ondjele yepito moskola ndjoka otayi shambula sho oskola ndjoka ya mono oopresenda 86.7 dhepito mondondo onti-10 omvula ya piti.
KENYA KAMBOWE