Oskola ompe yi li amwasha

MuJuli gwo-2012 ehangano lyomatungo lyedhina Uukumwe Construction olya pewa otendela yokumanitha lyoskola yOngwediva Junior Secondary School muule woomwedhi 18, ihe okondalaka ndjoka oya li ya kuthwa oonkondo petameko lyomvula ndjika sha landula sho ehangano ndyoka lya ndopa okumanitha iilonga pethimbo uule woomvula mbali.
Oshiwike sha piti Uuministeli wElongo owa gandja eyamukulo ndyoka wa gandja oomwedhi ntano dha piti kutya euliko lyomutungi ngoka taka manitha iilonga mbyoka natango oli li metifa.


“Sha landula sho okondalaka yotango ya hulithwa po, uuministeli otawu ningi eindilo opo kuulikwe omutungi gulwe okuza kElelo lyOotendela. Uuna omalongekidho ngoka ga manithwa nena uuministeli otawu ka ninga ehiyo opo omahangano gokutunga ga nige omaindilo gokumanitha iilonga mbyoka. Uuministeli otawu ka tseyithila oshigwana uuna iilonga ya manithwa,” Omukomeho gwElongo mOshitopolwa shaShana, Hileni Amukana ta ti.
Aanaskola otaya tsikile nokulongelwa moongulu dhoskola dhi na omakende ga tatuka, noombuli dha kulupa dhoka hadhi lokelwa pethimbo lyomuloka. Nonando oskola ndjoka kayi na olusheno oye shi pondola okupita ondondo onti-10 omvula ya piti, noopresenda
86.7% . Moshipopiwa shaNgoloneya gwaShana shoka shi li oshipopiwa shopapangelo moshitoplwa inamu popiwa oskola ndjoka nonando omaupyakadhi ga taalela ooskola dhilwe moshitopolwa oga gumwa kashona.
Sho oshikundaneki shika sha ningi oonkambadhala okuya meni lyoskola ndjoka ya tungwa, osha indikwa mo meni kosekuriti ndjoka ya popi kutya meni inamu pitikilwa omuntu molwaashoka ehala inali patululwa natango pambelewa. Nonando oongaka meni lyehala ndyoka kamu na aatungi andola taya longo nokumanitha iilonga mbyoka ya pumbwa okumanithwa.
Namibian Sun okwa nothelwako kutya, opoloyeka ndjoka oya tamekwa sha landula omathiminiko okuza kongeleka ndjoka yakala tayi hiilitha omatungo gawo koskola ndjoka okutameka moomvula dho-1960.


“Oskola ndjoka hatse ya tungilwa. Otwa kala twa tegelelwa ethimbo ele noonkondo okuza mo-2013 ihe natango katu shi kutya oshikwashikwe tashi ningwa po,” gumwe gwomaalongiskola moskola yaOngwediva Junior Secondary School ta ti.
Omupeha gwElongo, Anna Nghipondoka, okwa li uuvithwa nayi konkalo yoskola ndjoka pethimbo a li atalele po oskola ndjoka, na okwa uuvaneke kutya otaka tala koshikumungu shoka.
Nonando ongaaka aalogiskola naanaskola moskola ndjoka inaya teka omukumo na otaya gwanithwa po iinakugwanithwa yawo yoskola.


KENYA KAMBOWE