Opaliamende itayi popile omaihumbato goLPM

ELLANIE SMIT

OVENDUKA



Opaliamende oya yelitha kutya itayi popile omaihumbato gonayi giilyo yomutumba ngoka, mbyoka yali ya pumbwa okukalekapo elandulathano nesimaneko.

Etseyitho ndyoka olya landula oshiningwanima sha ningwa momutumba ngoka oshiwike sha piti, pethimbo Omupresidende Hage Geingob a li ta tseyitha oshipopiwa she shopashigwana shopapangelo.

Omuleli gwongundu yoLandless People's Movement (LPM), Bernardus Swartbooi, oshowo omupeha gwe Henny Seibeb, oya li ya kuthwamo momutumba omolwa epiyaganeko ndyoka ya ningi.

Amushanga gwoNational Assembly Lydia Kandetu, okwa popi kutya oshikumungu shoka otashi ka ungaungiwa nasho kokomitye tayi ithanwa Privileges Committee, taku landulwa omilandu noompango dhomutumba.

Kandetu okwa popi kutya konima sho kwa gandjwa ompito yomapulo sha landula oshipopiwa shomupresidende, Geingob okwa tameke ta yamukula omapulo ngoka ga pulwa tango. Pethimbo ndyoka Swartbooi naSeibeb oya tameke taye mu yi melaka.

“Omupopi megumbo ndyoka (Peter Katjavivi) okwa pula elandulathano megumbo na okwa pula iilyo mbyoka yiihumbate nawa molwaashoka oya kala taya pogola omulandu omuti 116 oshowo 118 gwoompango nomalandulathano gomutumba,” Kandetu a popi.

Okwa tsikile kutya Swartbooi naSeibeb oya tsikile nokwiihumbata nayi nokupogola oompango sha etitha Katjavivi a pule eyambidhidho okutya kaanambelewa yekalekepo lyombili momutumba ngoka haya ithanwa Sergeant at Arms. Mboka yaali aniwa oya tindi okuthigapo omutumba.

Shoka osha etitha etulo miilonga lyomulandu onti 113 moka kwa pulwa eidhopomo lyoParliamentary Protection Services (PPS) nokweetitha mboka yaali ya kuthwemo momutumba koonkondo.

Ekuthomo momutumba lyiilyo mboka iyali olya etitha epiyagano, nomupopi okwa thikitha pehulilo omutumba ngaashi ompango tayi utha.