Oongeleka tadhi ka tameka okufuta iishoshela yepangelo

kutya oongeleka nomahangano gokugandja omayambidhidho moshigwana ngoka inaga yama kepangelo otaga ka tameka okufuta iishoshela yepangelo, inali tambulwa ko nawa kaakomeho yoongeleka nomahangano ngoka, taya nyenyeta kutya otaya hupu nale nuudhigu okumona iiyemo.

Omahangano gooshali oshowo oongeleka odha popi kutya okufuta iishoshela yepangelo otayi ka etitha opo kaya vule we okugandja omayakulo ngoka taga pumbiwa koshigwana nepangelo itali vulu oku gandja.

Oompangela ndhoka dhi li metifa opo oongeleka, omahangano gooshali oshowo ngoka inaga yama kepangelo ga tameke okufuta iishoshela yepangelo okutala kiiyemo mbyoka hayi ningwa komahangano ngoka inadhi taambiwa ko kuyamwe po mboka taya gandja omaipopilo gonkalo yopaliko ndjoka ya taalela oshigwana.

Oompangela ndhoka odha tseyithwa kOminista yEmona lyaNamibia, Calle Schlettwein pethimbo a tseyitha omutengenekwathaneko gwelongitho lyiiyemo yepangelo yoshikakoshomvula yo2018/19 mEtitatu lyoshiwike sha piti.

Minista okwa popi kutya oompangela odhili metifa opo oongeleka nomahangano ga tumbulwa yiishangithe onga aafuti yiishoshela yepangelo.

Omusita gwongeleka yoAfrican Methodist Episcopal (AME) Maria Kapere okwa holola omaiyuvo ge kutya uuministeli owa li wa pumbwa okuya moonkundathana noongeleka tango omanga inawu ninga omatokolo gokuninga omalongekidho ngoka.

Kapere okwa popi kutya oongeleka ihadhi mono omayambidhidho gasha okuza kepangelo, inashi fa nale, a gandja oshiholelwa shongeleka yoDutch Reformed Church, ndjoka yali hayi mono omayambidhidho okuza kepangelo lyuukoloni lyaSouth Afrika.

“Epangelo ihali gandja omayambidhido gasha koongeleka, ihe ngele owa tala oongeleka otadhi dhana onkandangala onene monkalamwenyo dhaakwashigwana nokugandja omakwatho koshigwana.”

Kapere okwa popi kutya kwa haluka noonkondo koompangela ndhoka, ta pula kutya omatompelo geni po epangelo lya longitha opo li tokole okutula miilonga etokolo opo oongeleka nomahangano gooshali ga tameke okukala taga futu iishoshela yepangelo.

Menindjela gwoSPCA Namibia, Monique Redecker okwa popi kutya omahangano ngoka inaga yama kepangelo otaga kondjo nuudhigu okuhupa, na okuwete kutya okutula miilonga efuto lyiishoshela yepangelo komahangano ngoka otashi ka dhigupaleka onkalo ndjoka ya taalela nale komahangano ngoka.

Redecker okwa popi kutya oya uvithwa nayi ketokolo ndyoka, ta gwedha po kutya yo oyiikolela owala mooshali na kaye na iimaliwa yokufuta iishoshela yepangelo.

Omukomeho gwoLegal Assistance Centre, Tony Hancox okwa popi kutya omahangano ngoka inaga yama kepangelo ohaga gandja omayambidhidho omanene mokati koshigwana. Okwa popi kutya yo ohaya mono owala iimaliwa okupitila mooshali, na ohaya longitha iimaliwa mbyoka miilonga yawo.

Naye okwa popi kutya omahangano ngoka otaga nana nale nondatu okumona omayambidhidho gopaiyemo, nongele iishoshela mbyoka oya tulwa miilonga nena otashi ka tula omahangano ngoka moshiponga.

Omukomeho gwoInstitute of Public Policy Research, Graham Hopwood okwa popi kutya oku wete kutya okwa li kwa pumbwa okuningwa oonkundathana natango nomahangano ngoka, omanga inaku ningwa tseyitho ndyoka kuMinista Schlettwein.

Okwa popi kutya nonando ongaaka otashi kala pauyuuki ngele omahangano ngoka taga futu iishoshela miinyangadhalwa yopangeshefa mbyoka taga ningi. Okwa pula epangelo li ye oonkundathana nomahangano ngoka ko kutulwe miilonga omilandu ndoka tadhi vulu okuyambidhidha oompangela ndhoka.

Sho a ningi etseyitho ndyoka mEtitatu, Schlettwein okwa popi kutya omahangano geli momusholondondo gwontopolwa onti 16 yomahangano, otaga ka pumbwa okukala taga futu iishoshela yokongulu.

OGONE TLHAGE