Gemeenskap span saam om brand te blus

Annerine Feierabend Dinsdag, 20 Oktober 2020 was sowaar ’n dag om te onthou op Outjo!Heel onverwagse ridders op hul “wit perde” wat eintlik rooi brandblussers en emmers water was, het verstommend vinnig gereageer toe die Privaatskool Moria se stoorkamer aan die brand geslaan het. Svenia Herholdt, ’n graad 8-skolier en koshuisinwoner, was die eerste om onraad te merk toe sy rook uit die skool die lug sien verkleur het. Sy het kopgehou en blitsvinnig vir mnr. Loutjie Grobler, die skoolhoof, asook Outjo se brandweer gebel het.Grobler het aanvanklik gedink die koshuiskinders besig is om ’n grap te maak, maar het nogtans soos ’n wafferse Kayalami-renjaer die straat afgejaag en was skaars ’n minuut later by die skool. Hy en Kevin Germishuys, ’n graad 9-leerder wat uit die dorp se kant ook dadelik op die bolle rook gereageer het terwyl hy op pad krieketveld toe was, het spoedig oor die hek geklim. Die koshuis was ook in rep en roer, soos die groot seuns, elk gewapen met ’n brandblusser, skool toe gestorm het. Emmers water is ook aangedra. Met die inspanning en spanwerk tussen groot en klein is die vlamme geblus en die brandweer se bystand het die brand finaal oorwin.Privaatskool Moria se toekoms is beskerm te danke aan die dapper Outjo-gemeenskap en sy brandweermanne. Ondersoek is ingestel om te bepaal hoe die brand sy ontstaan gehad het en die bevinding was ’n elektriese kortsluiting. Die skool sal al die nodige maatreëls instel om toekomstige gevaarsituasies te voorkom. “Kinders moet geleer word hoe om brandsituasies te hanteer. Die ou geboue op die perseel sal vervang word en die skool gaan in meer brandbestrydingstoerusting belê,” het Grobler gesê. Die mees uitstaande feit was dat die bekende karakter van Outjo en sy mense opnuut sterk na vore gekom het, soos Grobler dit perfek verwoord: “Ons staan saam, veral vir hierdie skool – Privaatskool Moria.”

Gemeenskap span saam om brand te blus

Comments

Namibian Sun 2025-05-02

Please login to leave a comment

Gemeenskap span saam om brand te blus

Comments

Namibian Sun 2025-05-02

Please login to leave a comment

Login