Omahangano gaaniilonga ga kalela po aaniilonga yepangelo oga ti epangelo olya enda pambambo aaniilonga osho wo omahangano omakalelipo gawo, sho lya ningi etekolo li na sha noshiketha shomaakulo gopaunamiti shaaniilonga yepangelo, sho kwa tegelelwa ya tameke okulongitha iipangelo yepangelo, taga ti etokolo ndika olya ya pambambo omautho gonkalo yiilonga yaaniilonga

Etokolo ndika olya eta okalamauka mokati kaaniilonga yepangelo sho ngeyi esiku lyahugunina lyesiku lyo 01 Apilili 2026 li li pokuthika moka iilyo yoshiketha sho Public Service Medical Aid Scheme (Psemas) tayii hulu okukonga omaakulo gopaunamiti kiipangelo yopaumwene.

Mboka ya kwatela komeho omakemo ngaka aaleli yomahangano gakalela po aaniilonga yepangelo sho taya ti oya endwa pomunkulo sho kwa ningwa etokolo ndika,

Elunduluko ndika oli li oshitopolwa shondunge-thaneko yehumokomeho yongundu yoSwapo yoomvula ntano yongushu yoshimaliwa shithike poobiliona N$85.7 ndjoka tayi lalakanene okuyambulapo iipangelo yepangelo nuukilinika opo yi ye pamuthika gumwe niipangelo yopaumwene.

Omakonaakono taga tala epyakudhuko moshinima muka oga ningwa nale noga totha mo iipangelo yontumba mbyoka tayi ka tamekithwa elunduluko ndika. Oshinima shika osha li sha etwa puuyelele moshigongi sha li pokati koPsemas osho wo aakuthimbinga moshikondo shuundjolowele shopaumwene

Kohi yelundululo ndika lya thanekwa, iipangelo yepangelo otayi kala wo tayi tula mo omaindilo gopashimaliwa uuna ya panga aavu ngaashi naanaa iipangelo yopaumwene hayi ningi.

Ashike Psemas okwa holola ta pu kala uudhigu mokuungaunga noshinima shika sho ngeyi yaana omufango gwoondando gu vule okufuta omaindilo gopashimaliwa tag aka tulwa mo.

 “Tse inatu lombwelwa sha”

Oshinima shika osha kumitha omahangano gaaniilonga ngoka ge na oshinakugwanithwa okukalelapo uuwanawa waa niilonga.

Amushangandjayi gwehangano lyaalongi lyedhina Namibia National Teachers’ Union (Nantu) Loide Shaanika okwa ti ehango oshinima shika olye shi uvu ashike miikundaneki.

Oka ti: “ Otwa lesha ashike oshinima shika miikundaneki”.

Shaanika ta fatulula tati Nantu okwa li moonkundathana nokomisi yiilonga yepangelo ano Public Service Commission peha lyuuministeli wuundjolowele no ya koleke kutya ka pwa li oonkundathana dhopambelwa dha li dha ningwa molwa elunduluko ndika.

Okwa ti: “ Otaa ti esiku 1 Apiilili olyo esiku lyahugunina. Ngiika opo ngaa ta ye ya kutse ye tu lombwele. Sigo oompaka inatu tseyithilwa sha onkene itandi vulu okutya kosha koshinima shika”.

Okwaahaya moonkundathana nomahangano gaaniilonga osha etele omaipulo aaleli yomahangano kutya epangelo olya hala ashike okulalakanena okwaa ha longitha oshimaliwa oshindji peha lyokutala kongushu yuundjolowele waaniilonga yalyo.

Omunandjungu momahangano gaaniilonga omukulu nokuli oshilyo shongundu yoSwanumomutumba gopashigwana Evilastus Kaaronda okwa holola omaipulo kombinga yelongitho lyoshitumbula shiipangelo “yimwe ya tothwa mo” osho wo omatompelo geeta eutho ndika.

Ta pula ta ti: “Yimwe ya tothwa mo” osha hala okutya ngiini?”

 “Ngele oshinima shika otashi kwatakanithwa noonkalo oombwanawa dhiipangelo nokukala tayi vulu okugandja omaakulo ga dhenga mbanda, nashi kambadhaliwe tu tale ngele otashi zi. Ihe ngele otashi tula uundjolowele waaniilonga moshiponga, nashi ta li ke ngaa nawa manga”.

Kaaronda okwa ti epangelo olya fa lya hala “okutenda ondhikwa omunona inaa valwa”, ta gandja omadhiladhilo kutya iipangelo yepangelo nayi tulwe tango pamuthika omwaanawa manga inaa ku tulwa omangambeko gelongitho lyiipangelo yopaumwene,

Ota ti: “ Oshinima oshaanawa okuyambulapo iipangelo yepangelo tango manga inaa tu tembuka ko yaayakuli yuundjolowele yopaumwene”.

Ethindakano tali holoka moshikondo shoka tashi shongola nale

Ehangano lyaapangi lyedhina The Namibia Nurses Union (Nanu) nalyo wo olya keme ta li ti oshinima shika oshanika oshiponga unene tuu sho oshikondo shuundjolowele mepangelo shi na nale omaudhigu ogendji.

Amushangandjayo goNamu Junias Shilunga okwa holola ta ti etokolo ndika “ina li pya” ta ti iipangelo yepangelo ohayi yakula nale omwaalu gwaakwashigwana gut hike poopelesenda 80.

Ta kunkilile ta ti okuthiminikila aaniilonga yepangelo kiipangelo yepangelo otashi eta ethindakano unene tuu sho oshikondo shaa na aaniilonga ya gwana, iiyalulilo inaa yi gwanena osho wo omatando ogendji inaa gu pwa natango

Shilunga ta ti: “ Out na nale ompumbwe yaapangi, yoondohotola osho wo yiiyakulitho yoyeneyene”.

Okwa fekele tati shika osha tala owala ogugalulila iimaliwa mepangelo sho ya kala hayi yi kiipangelo yopaumwene.

Shilunga ta kunkilile kutya okweetapo eutho ndika enene inaakuningwa oonkundathana dholela otashi teya po einekelathano pokati kepangelo naaniilonga yalyo.

Sho ngeyi esiku lyahugunina 1 Apiilili ta li hedha popepi, po inaa pu ningwa oonkundathana natango, otashi eta okalamauka okanene monkalo yiilonga.