Oombiga odhindji dhomekulo lyoshipangelo shaShakati ‘odha tekele mo2010’

Oombiga heyali dhomoombiga hetatu dhomekulo lyoshipangelo shaShakati nkene dha tekele okuza mo2010, nonkalo oya nayipala muJanuali nuumvo. Aaniilonga yomekulo noshowo aavu ngashingeyi oya lulilwa noonkondo.MOsoondaha, aaniilonga yaali haya longele mekulo oya pi konima sho ya fikwa koombiga ndhoka dhaa li nawa, shoka sha tukulutha omaipulo kombinga yegameno mekulo lyoshipangelo, aapopepi ya lombwele oshikundaneki shoNamibian Sun. Oombiga ndhika dhaa li nawa ohadhi yi moshipala elongekidho neteleko lyiikulya, omahokololo otaga ti iikulya yimwe oya gwilile pevi mekulo etayi toolwa po nokupewa aavu. Okampani ndjoka ya pewa otendela yokugandja iikulya oye ekelehi omapopyo ngaka, ashike aaniilonga yomekulo otaya ti osho.Oshipangelo nomunakontalaka taya ulikathana ominweOmukuluntu gwoshipangelo shaShakati Dr Ruben Kanime okwa ti kutya ina yakula olopota yasha kombinga yoombiga dha teka nenge aaniilonga ye ehamekelwa miilonga. “Ombelewa yandje inayi yakula olopota yasha kombinga yoombiga nenge aateleki ye ehamekelwa miilonga. Nonande ongawo, otandi ka konakono oshinima shika,” okwa ti.Kanime okwa fatulula kutya otendela yokutonatela iilongitho yomekulo oya pewa ehangano lyoStream Two Properties CC, omunakontolaka ngoka a pewa otendela yokuteleka moshipangelo.“Aateleki inaya kutwa koshipangelo shoshene. Onkene oshi li mondjila opo wu kwatathane naanambelewa yehangano ndjoka. Kakele, otatu ka konakona oshinima shika kombinga yeungaungo nokontalaka ndjika,” Kanime a ti.Stream Two, ehangano lyokOmuthiya, olya pewa otendela yoomiliona N$154 muApilili 2024 li kale hali gandja iikulya kiitopolwa Oshikoto nOshana.Meniindjela mehangano lyoStream Two, Benny Haupindi, okwa ti kutya ehhangano lyawo olya tseyithile ewiliko lyoshipangelo shaShakati kutya oombiga odha yonuka ihe oya lombwela kutya kape na manga oshimaliwa shokulanda oombiga oompe. “Shoka kashi li komapepe getu – shetu okusila okutonatela owala iilongitho,” okwa ti.Kanime okwe ekelehi omapopyo ngoka, ta ti omunakontalaka oku na oshinakugwanithwa shokutonatela nokulanda iilongitho iipe ngele ya teka. “Ngele kayu uvite ombili, omolwashike inaya gandja omakemo gawo pethimbo taya pewa otendela? Oye na omunambelewa (shivaasa) gwawo mekulo kehe esiku. Oya ndopa okuninga omakonakono,” okwa ti, okwa gwedha po kutya otaya ka kala noshigongi opo ya dhimbulukithe ehangano ndika kombinga yiinakugwanithwa yalyo.Omahokololo ga yoolokaAaniilonga mekulo oya ti konima yoshiponga shomOsoondaha, onyama ndjoka ya gwile pevi oya pewa aavu. Haupindi okwa ti hasho ngaaka, ta ti onyama ndjika yondjuhwa oye ekelwahi. “Onyama ndjoka oye ekelwahi. Naakonakoni yiikulya ando inaya pitika yi liwe,” okwa ti.Okwa gwedha po kutya aanakontalaka aakulu oya adhele oombiga ndhika dhi li monkalo ya nyayika, nehangano lyoStream Two olya kala nokulopotela ewiliko lyoshipangelo oshinima shika.Iinakugwanithwa yehanganoOkopi yonkontalaka ndjoka ya monika koshikundaneki shoNamibian Sun otayi ti omunakontalaka na tale nokutonatela iilongitho ayihe yomokombitha, na nyole omusholondondo gwiilongitho naaniilonga yomoshipangelo manga inaya tameka iilonga, nokutaamba ko oshinakugwithwa meudhililo shokulongitha nawa, okutonatela nokupungula iilongitho yomokombitha.Euvathano ndika olya kwatela mo kutya uuhasha nenge elongitho nayi lyiilongitha otali kala komapepe gomunakontalaka niilongitho otayi longithwa owala nelalakano lyokuteleka kakele ngele sha ziminwa nosha nyolwa pambapila.Aaniilonga naavu sho ya lulilwa, omapulo oga thikama natango kutya olye e na oshinakugwanithwa shiilongitho mbyoka ya kala ya teka uule woomvula omulongo.tuyeimo@nmh-hub.com.na

Oombiga odhindji dhomekulo lyoshipangelo shaShakati ‘odha tekele mo2010’

Comments

Namibian Sun 2025-10-09

Please login to leave a comment

Oombiga odhindji dhomekulo lyoshipangelo shaShakati ‘odha tekele mo2010’

Comments

Namibian Sun 2025-10-09

Please login to leave a comment

Login