Ookamunsela 22 yoSwapo inaya hogulululwa

Ookamunsela 22 yoSwapo miitopolwa ine yokOnooli itaya ka kutha ombinga momahogololo gookamunsela muNovemba, konima sho oyendji yomuyo inaya hogololululwa momahogololo gongundu miikandjohogololo yawo.MOshana, ookamunsela yiikandjohogololo itano inaye shi pondola okuhogolululwa. Oyo nee Edmund Iishuwa gwoshikandjohogololo shaKatana, Joseph Mupetami gwoshikandjohogololo shaKatyali, Andreas Uutoni gwoshikandjohogololo shaNgwediva, Aram Martin gwoshikandjohogololo Oshakati Uuninginino naDavid Filipus gwoshikandjohogololo Okaku. Iishuwa, okwa mana oondjenda dhe oshiwike sha zi ko.Moshitopolwa shaShikoto, ookamunsela yahamano inaye shi enditha nawa momahogololo. Oyo nee Gottlieb Ndjendjela oshikandjohogololo Oshomeya, Hans Nambondi oshikandjohogololo Okankolo, Gideon Shikomba oshikandjohogololo Onyaanya, Samuel Shivute oshikandjohogololo Omuthiya, Josef Shilongo oshikandjohogololo Nehale lyaMpingana naPhillemon Ndjambula oshikandjohogololo Olukonda.Omukwatakanithi gwongundu yoSwapo moshitopolwa shaHangwena Phillemon Josua okwa koleke kutya Ferdinand Shifidi gwoshikandjohogololo shaNdola, Erikan Hainghumbi gwoshikandjohogololo shaNgela, Lonia Kaishungu gwoshikandjohogololo shaShikunde, Mateus Shikongo gwoshikandjohogololo shaNgenga, Johannes Hakanyome gwoshikandjohogololo shaHangwena naFestus Ikanda gwoshikandjohogololo shaMundaungilo ayehe oya dhengwa mo momahogololo goSwapo miikandjohovololo yawo.Josua okwa gwedha po kutya omanyenyeto nomakemo agehe ge ya po lwomufango gwokuhogolola ookandidate oga talika nokupotokononwa. Okwa gwedha po kutya omalongekidho gokuninga iikonga yomahogololo oge li metifa.Koshitopolwa shaMusati, ookamunsela yatano ye li koshipundi ngashingeyi itaya ka kutha ombinga momahogololo muNovemba. Oyo nee Andreas Shintama oshikandjohogololo Ruacana, Johaness Iiyambo oshikandjohogololo Ontamanzi, Gerhard Shiimi oshikandjohogololo Elim, Tylves Angala oshikandjohogololo Anamulenga naImmanuel Shikongo oshikandjohogololo Outapi.Shikongo okuulikwa koPresidente Netumbo Nandi-Ndaitwah a ninge ngoloneya gwoshitopolwa shaMusati.Shika oshe eta opo ku ningwe omahogololo ga gwedhwa po, ngoka ga li ko ohela kOutapi, oshilyo shoIndependent Patriots for Change (IPC) Fillemon Shikomba noshowo Selma Asino gwongundu yoSwapo, mbaka yaali oyo ya li taya thigathana po.‘Ombepo yelunduluko’Aalanduli otaya ti omwaalu omunene gwookamunsela ye li koshipundi mboka ya ndopa okuhogolululwa momahogololo gwongundu otagu ulike kutya oshigwana komutunda osha lundulula omadhiladhilo gasho. Yamwe oyi itaala kutya otashi holola okwaambilipalelwa kiilonga tayi longwa kukamunsela, omanga yamwe otayi ti otashi ulike twa pumbwa okugandja ompito kuyalwe opo ye tu lele.Oshiholelwa, kamunsela Mupetami gwokOkatyali’s Mupetami okwa yile koshipundi 1998.Omunawino miikwapolitika Ndumba Kamwanyah okwa lombwele oshikundaneki shoNamibian Sun kutya omwaalu omunene gwookamunsela inaaya hogolululwa momahogololo gongundu otagu holola kutya oshigwana inashi mbilipalelwa komayakulo tashi pewa.“Omwaalu nguka omunene noonkondo, unene tuu kongundu yoSwapo, ndjoka ya li yi igilila ookamunsela yawo haya hogulululwa. Shika otashi holola ombepo yelunduluko nomadhiladhilo kombinga yegandjo lyomayakulo,” Kamwanyah a ti.“Ngele owa kala to lele ihe oshigwana kashi wete ehumokomeho lyothaathaa, shono osho wa tegelela. Olyo etumwalaka enene kongundu yoSwapo kutya onkalo oya lunduluka kayi li we ngoshito. Monakuziwa ngele owa hogololwa ongakamunsela, osha li sha yela kutya oto vulu okushuna ko lwaali nenge lutatu.”Okwa holola woo kutya ookandidate dhi ithikamena po odha ninga odhindji – ookandidate odhindji ndhika odha li iilyo yoSwapo nenge natango omo dhi li mongundu – unene tuu koshitopolwa shaKavango Uuzilo, nowi uumbangi wa gwedhwa po wokwaauva ombili koshigwana.“Ookandidate dhi ithikamena po ndhika odhindji odho iilyo yoSwapo, naashoka tadhi ti okutya oya hala okweeta elunduluko nehumokomeho momidhingoloko dhawo,” okwa gwedha po.

Ookamunsela 22 yoSwapo inaya hogulululwa

Comments

Namibian Sun 2026-03-26

Please login to leave a comment

Ookamunsela 22 yoSwapo inaya hogulululwa

Comments

Namibian Sun 2026-03-26

Please login to leave a comment

Subscription Required to Access Content ×

Login

Subscription Required to Access Content