Okanona ka dhipagwa mOndjungulume

Olutu lwokanona kokamati koomvula omugoyi olwiitsuwa moshilambo momukunda Ondjungulume moshitopolwa shaMusati mEtitano.

Komanda gwopolisi yaMusati, Titus Shikongo okwa popi mOsoondaha kutya aantu yaali otaya ningilwa omapulaapulo shi na sha nedhipago lyokanona hoka.

Shikongo okwa popi kutya edhina lyoanona hoka oMalakia Tuhafeni ngoka a hulitha konima sho a dhengwa noshinima kaashishiwike moshipala.

Okwa ehamekwa noonkondo shoka sha etitha eso lye.

Olutu lwokanona hoka olwa adhika lwa fumbikwa ombinga yimwe moshilambo shili pooha nomugongo megumbo lyaandjawo.

Shikongo okwa popi kutya nakusa pamwe nokamwayinamati koomvula ne oya thigwa megumbo kuyinakulu ongula yEtine.

Sho a galuka lwopotundi onti 19h00 yinakulu okwa a dha owala megumbo muna okanona hoka okashona na oke mu lombwele kutya mumwayina okwa ya ontuku.

Ongula yEtitano lwopotundi onti 06h00, omukulupe ngoka okwa mono olutu lwaTuhafeni lwa fumbikwa moshilambo kohi yomuti. Okwa tseyithile aashinda mboka ya ka tseyithila opolisi.

“Omufekelwa keshiwike na kape na ngoka a tulwa miipandeko ihe omakonaakono otaga ningwa okumona nokutula miipandeko omufelekwa nenge aafekelwa,” Shikongo a popi.

Shikongo okwa pula oshigwana kwaamboka ye na uuyelele ya kwatathane nopolisi opo ku tulwe miipandeko aafekelwa nenge omufekelwa.