Aalumentu ya ne ya kanena muukongo woonkwandambi dha yakelwa moAngola

Aalumentu ya ne otaku lopotwa ya kana uule woomasiku gatatu konima sho ya taaguluka okuya moAngola nelalakano lyoku landula aafuthi yiimuna mboka taku fekelwa ya hingi oongombe dhi li omu-13 dha yakwa. Omakanda oga taaguluka oongamba okuza momukunda gwedhina Diyogha moshitopolwa shaKavango-East mehulilo shiwike. Mwene gwoongombe, Boniface Mukwathi okwiinekela kutya uukwanegumbo we owa nunilwa owina okulwithwa, sha landula oshiningwanima sha faathana shomomwedhi gwaMaai omvula ya zi ko moka uukwanegumbo owo tuu mboka wa kanitha oongombe dhi li 81 pamukalo gwa faathana. Pakutala kwandje, shino oshiningilwawina nokututongola,” osho a popi. “Omolwashike shi na okuningilwa egumbo olyo tuu ndoka iikando iyali momukalo gwa faathana?” 

Eyakemo ndika olya dhimbululwa kongulohi yOsoondaha sho omusita a li ta edhilile oongombe, ye ta nongele kutya oongombe dhili omu-13 odha kolota po. Neinekelo kutya odha puka owala dho dhene, okwa shunitha oongombe oonkwawo koshigunda e ta lalakana oku dhi landula ongula yanakwasha. MOmaandaha, omapekapeko oga holola oompadhi ndhoka taku fekelwa dhaantu ya ne mboka ya hingi oongombe ndhoka. Omusita okwa landula oompadhi ndhoka konyala uule wookilometa hamano nenge heyali u uka kopapate komamanya hoka ka thinda koongamba dhaAngola, ye ta galuka ko omolwa uumbanda  yegameno lye.“Okwa li a tila oku tsikila oye awike, osho a shunine monima e teshi tu tseyithile,” Mukwathi ta ti. Mukwathi okwalombwele omumwayinamati naalumentu yalwe yatatu ya tsikile nokulandula iimuna mbyoka. Okuza mpoka inaya galuka we.“Otu li noku kambadhala oku kwatathana nayo, ihe oongodhi dhawo itadhi piti,” osho a lombwele oNamibian Sun. 

Kashishi omupya gowala

Oshiningwanima shika osha pendudha omadhimbuluko omawinayi geyako lyiimuna ndyoka lya ningilwe muMaai gwomvula ya zi ko, moka aakalimo yomomukunda taku lopotwa ya li ya landula oompadhi dhaafekelwa okuya moAngola nelalakano lyoku galula iimuna yawo. Otwa yelelwa kutya shika kashishi omupya gowala. Oshidhigu okwiidhimbika omafaathano gopokati kiiningwanima mbika iyali,” osho a popi. Omuwiliki gwomakonaakono giimbuluma mopolisi moshitopolwa shaKavango-East, Omupevi-Komishina Bonifatius Kanyetu, okwa koleke kutya oshipotha shuulunga wiimuna osha patululwa nale. Okwa ti kutya opolisi oyi li melongelokumwe nookuume kawo yopolisi moAngola nelalakano lyoku galula oongombe ndhoka dha yakwa nosho wo okukonakona onkalo ya kwatela mo oshipotha shika. Kanyetu okwa kumagidha wo aanafaalama ya longe nuukeka nge taya kutu aasita yoongombe mboka taya zi kombanda yoongamba, sho a holola kutya yamwe po otashi vulika taya longele kumwe nehangano lyaafuthi yiimuna yoku taaguluka oongamba.