Ondholongo yonkalamwenyo komulumentu a dhipaga omukulukadhi nomwana

Oomvula hetatu konima yokudhipaga omukulukadhi gwe nokamwanamati komimvo heyali, Mbangu Vensislaus Mutero (53) ohela okwa tokolelwa ondholongo yonkalamwenyo mompangu yopombanda yaShakati.

Omupanguli Duard Kesslau okwa tokolele Mutero oomvula 21 molwa edhipago lyomukulukadhi gwe, Rosalie Shirenga Shitjoni, nondholongo yonkalamwenyo molwa edhipago lyokamwanamati, Aleksus Vipanda.

Nonande Mutero okwa hokolola mu Desemba, pethimbo lyoonkundathana dhi nasha netokolo, ndhoka omadhipago gomo 2015 oga li oshiponga, ompangu oye mu mono ondjo noye mu gapula negeelo enene.

Mutero okwa kalelwa a po komukalelipo gopaveta Absalom Shiningayamwe, omanga Advocate Victoria Shigwedha okwa kalele po Epangelo.

Shiningayamwe okwa pula egeelo lyondholongo yoomvula 30 pethimbo lyoonkundathana dhi nasha netokolo, omanga aatameneki ya hilile ketokolo lyondholongo yonkalamwenyo momadhipago agehe gaali.

Ekwatathano lya nika oshiponga

Namibian Sun okwa lopotele nale kutya Mutero, mo 25 Septemba 2015, okwa dhipaga omukulukadhi gwe nokamwanamati molwa efupa. Aahokanathani oya li mekwatathano lya nika oshiponga kwa lopotwa lya sipoelwa koku kondja olundji.

Mutero okwa yaha omukulukadhi gwe konima yokunyenyeta noonkondo, naasho okamwanamati kawo – hoka ka li mondunda onkwawo pethimbo ndyoka – ka zi mo komutopelo gondjembo, okwe ka yaha momutse woo.

Mutero okwa tseyithile ompangu mu Desemba kutya ye ohe yaanona yalwe yahamano.

Okwa gwedhwa ko kutya okwa longitha N$50 000 mefumviko lyomukulukadhi gwe nolyo kamwanamati, omanga elelo lyopamuthigululwakalo lyaGciriku olye mu futitha N$41 000 yi ‘hekeleke’ ezimo lyanakusa omukulukadhi gwe.

Omanga a li ha landitha oondhopi, kwa lopotwa ha mono ontanitho yo N$50 000 uuna ongeshefa ya li tayi ende nawa, ongeshefa oya teka po okuza mpoka, Mutero a ti.

Okwa tsikile okuhokolola kutya oosuwala ye oya hadhagula egumbo lye, nokutya iinima yongushu yo N$400 000 inayi monika we.

‘Kehe shimwe osha li nawa’

Mutero okwa lombwele wo ompangu kutya ye omunkundi, a kala noku ehama uuvu womutima okuza mo1997.

Okwa kala kepango okuza nale ngashingeyi ita vulu okulangela kombinga ye yokolumoho uuna a lala, osho a ti.

Kombinga yondjokana ye, omudhipagi a pangulwa okwa hokolola “Kehe shimwe osha li nawa sigo 'oposhiponga’”.

Shi ikolela kuye, konima sho a pewa ombooloha mo 2018, ezimo lyomukulukadhi gwe olye mu dhimine po, a gwedhwa po kutya oye mu fala wo kongeleka moRundu ongendhindhiliko lyokutsikila nonkalamwenyo.

Omuntu ngoka owala ine mu dhimina po oyinamweno, okwa hokolola.

Edhipago lyaa shi lyoshiningilawina

Pokati mpoka, manga i ifutila mo moondjedhililo , Mutero okwi iyadha a taaguluka oveta natango konima sho - mo30 gaDesemba 2019 – okwa lopotwa a pumu nokudhipaga aantu yane nohauto ye.

Iihakanwa oyo - Petrus Kongo Haingura (44), Muhafereni Patricia Musinga Haingura (38), Belindine Kasiku Haingura (1) na Phillip Poroto Haingura (5) – oya li taa taaguluka ondjila onene yoTrans-zambezi pethimbo ndjoka molukanda kwaNdama moRundu.

Yatatu yomakwaanezimo oya sile poshiponga, omanga okanona komimvo ntano Phillip oka ka sila koshipangelo konale molwa okweehamekwa kwe.

Mutero ota ku fekelwaa fadhuka okuza po oshiponga noku holeka oshihauto she okilometa yimwe okuza mpoka oshiponga sha ningilwa.

Nahugunina okwa ka kwatwa po.

Oshipotha shedhipago lyaa shi lyoshiningilawina inashi pwa natango.

- [email protected]

[email protected]