Eshina lyo-C-Arm lyo-N$4 Miliona lya hwepopaleka epango lyiipotha yiikwamasipa noontumba yi li 91 omwedhi kehe mOnandjokwe

Oshipangelo shOpokati shaNandjokwe ohashi ungaunga niipotha yiikwamasipa noontumba yi li po-91 omwedhi kehe, mwa kwatelwa omateko, nomazo pehala giikwamasipa, sigo okiiponga iinene tayi pumbwa etando. 

Omundohotola Akutu Munyika okwa holola ngeyi pethimbo lyoshituthi shegandjelo lyopambelewa lyeshina lyo-C-Arm lyongushu yo-N$4 miliona, lya gandjwa omagano kOshiketha shIiponga yOohauto (MVA Fund), mOshipangelo shaNandjokwe mEtiyali.

Ndohotola Munyika okwa tompele kutya, ongoshipangelo shoshitopolwa shoka tashi taamba aavu okuza mOshikoto noomiitopolwa yopuushiinda monopoly yoshilongo, oshipangelo ohashi gandja omakwatho guundjolowele kaavu omayovi moka mwa kwatelwa aavu ya mona iiponga noyena oompumbwe dhepango lyiikwamasipa noontumba.

“Omwaalu gwaavu mbuka otagu ulike esimano lyoshipangelo muumbangalantu waNamibia nogwa ulika ompumbwe onene yotekinolohi opo ku kwathelwe epango lya pyokoka,” a tseyitha.

Kombinga yoshilongitho oshipe, okwa popi kutya eshina lyo-C-Arm olyi li einyengi lyokukutha omafano ngoka taga ulikwa pethimbo olyo ndoka mokati komatando.

 Okwa gwedha ko kutya etulomiilonga lyalyo otaku ka hwepopaleka uunkulungu wometando, okukoleka emono lyomatokolo gopauhaku, nosho wo okuhwepopaleka epango lyaavu, unene tuu miipotha yiiponga niikwamasipa noontumba. 

Okwa ti omakwathelo giimaliwa gethike mpoka otaga kwathele muundjolowele uuwanawa, meshonopeko lyuulema, meendeleleko lyepango, sigo okweeta oshigwana shi na uundjolowele notashi longo nuudhiginini.

Nonando opwa gandjwa omagano ngaka, omundohotola Munyika okwa zimine kutya oshikondo shuundjolowele otashi tsikile okutsakaneka omashongo ogendji, mwa kwatelwa etaandelo lyoompumbwe dhomayakulo gomapango ga pyokoka, eyopombanda lyiiponga,uushona woonzo, nosho wo omayooloko goompito dhokumona omashina gopatekinolohi. Omashongo ngaka oga pumbwa omakandulo po.

“Manga tatu longo opo tu koleke omulandu gwetu guundjolowele, otwa pumbwa okwiitaala uushili mbuka manga tatu lalakanene oshigwana shi na uundjolowele  nehumokomeho,” osho a ti.    

Pethimbo lyoshipopiwa she shomoshituthi, Josua Nghipangelwa, Omukuluntuwiliki gwUuministeli wUundjolowele nOmayakulo gOnkalelo yOshigwana mOshitopolwa shaShikoto, okwa popi kutya sho kwa etwa eshina ndika e pe,Oshipangelo shaNandjokwe otashi yambula po ongushu yepango lyiiponga moshipangelo shepangelo.

Okwa ladhipike aapangi, oondohotola, naaniilonga ayehe yuundjolowele opo ya kwashilipaleke kutya aavu yiiponga mboka taya vulu okupangwa otaya mono epango lyoopala yo taya lalekwa moshipangelo.    

“Ngele otwa ningi ngawo, otatu vulu okukaleka po epango einekelwa nota li kalelelele mokushonopeka elundululilo lyaavu kiiputudhilo yilwe, molwaashoka epangelo oli na oonkondo dha gwana dhokugandja epango lyongushu yokolela,” osho a popi.

Neyambulopo ndika lyopauhaku, okwa ulika kutya Onandjokwe oyi ilongekidha okutaamba aavu taya zi moshipangelo shilwe shepangelo, mwa kwatelwa oTsumeb, Omuthiya, Eenhana, Okongo, noGrootfontein, mbyoka tashi vulika kaa yi na omashina giikwapango ya tya ngeyi. 

Manga shi li ngawo, omundohotola Seyoum B. Derbew, Omukuluntu gwEtando lyiikwamasipa noontumba, okwa pandula Oshiketha shIiponga yOohauto (MVA Fund) omolwomagano ngaka gopombanda geshina lyo-C-Arm kOshipangelo shOpokati shaNandjokwe. 

“Eshina ndika otali ka yambula po noonkondo eukililo, egameno, nosho wo epondolo lyetando lyetu lyoontumba niikwamasipa. Otwa pandula noonkondo elongelokumwe ndika notatu tsikile okulongitha eshina lyo-C-Arm okuhwepopaleka epango lyetando lyaavu yetu noshigwana shokokule,” osho a ti. 

Ya tolokwa ku: Gottrieb Nambahu ([email protected])