Muni gwaKahandja ke na mo sha meungaungo lyiimaliwa yoshigwana

"‘Ohamu pe oombwa dheni omeya ihe omwa nyengwa oku tu pa omeya. Opuwo! Otwa vulwa!” aakalimo yomOkahandja yi igidha pethimbo lyehololomadhiladhilo mEtitatu, taya holola okwaa uva ombili kwawo namuni gwaKahandja. Shika osha landula omanyenyeto gaakwashigwana gomontaneho, mboka ya patulula omayalulilombaanga noFNB muJanuali nuumvo nelalakano okulundulula onkalo yomomalukanda gaKahandja. Shi ikolela komunandjungu Sethy Gariseb, kape na olopota yasha kombinga yelongitho lyoshimaliwa, kombinga yoakaunta ndjoka kehe egumbo momalukanda Ekunde no5rand hali futu N$165. Okwa tumbula wo kutya aakalimo yomolukanda Promiseland mOkahandja oya gongele iimaliwa yawo, oya landa ominino dhomeya nokufula omikanka ngaashi yi indilwa kumuni mumvogu. Kakele, natango, kaye na omeya, ngoka Gariseb ta ti aakalimo oye ga pumbwa noonkondo. Aakalimo oya hala wo ezo miilonga lyaMayola gwaKahandja Beatrice Kotungondo, nolyOmukuluntupithi gwelelo lyondoolopa yaKahandja Alphons Tjitombo, omolwa okundopa kwawo okuungaunga nomaudhigu ga guma oshigwana, sho sha kala nokukambadhala okuungaunga nago oomvula omugoyi dha piti. Shi ikolela koonakuholola omadhiladhilo, oya tumbula kutya momalukanda gawo itaa ka pitika mu ningwe oshigongi shopapolitika sigo omakemo gawo gu uvika. “Yamwe yomune oyokokule, onkene ohamu nyengwa okukandula po omaupyakadhi getu, kamu na natse”. "Ihatu shainine ko iimaliwa koFNB"- Mayola gwaKahandja Kotungondo, momapulapulo gowina gokuyamukula omapulo ngaka, okwa ti muni ke na oshinakugwanithwa shokutopola iimaliwa yelelo yi li kombaanga yoFNB. Shi ikolela ku Mayola, opoloyeka yehumokomeho netendo( ethaneko lyuualita) wEkunde Extension 1, 2, 3, sigo 6, lya nuninwa aakalimo yomolukanda, inali kwatelwa montengenekothaneko yamuni yomumvo gwoshimaliwa 2023/24. “Otwi indile oshigwana shi kwate komeho monkambadhala yokugongela oshimaliwa shokweendeleka etendo lyolukanda Ekunde noya fute ko etata lyoshimaliwa shomuthaneki gwuualita" okwa ti. Oshoka aakalimo yomOkahandja oyu uvite kutya oprosesa otayi ende kashona nokaye na nkene taa koleke eyokomeho( iilonga) yamuni, oya eta po edhiladhilo kutya aakwashigwana naa patulule oakaunta yokugongela oshimaliwa sha pumbiwa shi endeleleke oprosesa yokuthaneka okaalita kolukanda. "Tse [muni], aakalimo (oonakumona uuwanawa) opamwe naNUST otwa gongalele tu kundathane eyokomeho lyegongelo lyoshimaliwa, mbyoka yi li miikaha yawo nelelo kali na mo sha oonkondo miimaliwa mbyoka. Oya koleke kutya oya gongela po N$207,000," mayola a fatulula. Okwa koleke wo kutya aakalimo yomomalukanda 5rand nOshetu ohaa mbaanga oshimaliwa shawo, taa longitha onomola yoplota ongoreferensa. "Otwa hala shi tseyike kutya elelo kali oonkondo miimaliwa mbika noihali yi shainine ko kombaanga," okwa dhenge omuthindo. Okwa fatulula kutya otaa longele kumwe noshiputudhilo shaNUST ku gandjwe oompito kaailongi ya manithe omadheulo gawo taye shi ningile kiilonga. Kotungondo okwa ndhindhilike kutya okutenda nokweeta po uualita ohaku kutha oomwedhi hamano nenge dha konda po, shi ikolela kooendjiniya dha longithwa. Mayola okwa holola wo okuuvite a ponokelwa molwa euvonayi lyawo sho inaa yamukula nomukandakemo gwawo. “ Ngame omulongiskola, ndi ipyakidhila nokulonga aalongwa ye li lwopomilongo ne, nokandi na ethimbo," okwa ti. "Hakutya kutya omukandakemo kagu niwe nago—ogwa ungaungiwa nago komupevi mayola. Kandi uvite ko kutya omolwashike ongame ya li ya hala kondandalunde. Osha fa ando hangame tandi kuutumbitha oshigongi shi na sha noonkundathana dhomukandakemo. Uudhigu wawo nangame owuni naanaa?" okwa pula.

Muni gwaKahandja ke na mo sha meungaungo lyiimaliwa yoshigwana

Comments

Namibian Sun 2026-09-30

Please login to leave a comment

Muni gwaKahandja ke na mo sha meungaungo lyiimaliwa yoshigwana

Comments

Namibian Sun 2026-09-30

Please login to leave a comment

Subscription Required to Access Content ×

Login

Subscription Required to Access Content