Oombelewa dhelongo mOshikoto nadhi tembuke ko kOshana - Kathindi

Ngoloneya gwoshitopolwa shaShikoto, Sacky Kathindi okwa wayimine oongundu yaamboka ya hala nokuhalela opo oombelewa dhelongo moshitopolwa dhi tembuke ko kOndangwa koShana.Kathindi okwa popi oohapu ndhoka pethimbo a li ta gandja oshipopiwa kombinga yonkalo yoshitopolwa, naashika osha ningilwa mOmuthiya. Ina sila ko nande mokupopya kombinga yonkalo ndjoka tayi ehameke.Nonande okuuvite uugumbo sho oshitopolwa she shi enditha nawa mumvogu mondondo 11, shi li puutango, Kathindi okwa longitha ompito ndjoka okupopya kombinga yoombelewa dhelongo dhi li kOndangwa.“Nonande ondi uvite uugumbo kombinga yiizemo niilonga iiwanawa yoshikondo shelongo mOshikoto, otashi yemateke sho oombelewa dhelongo dhaa li moshitopolwa shetu, ihe odhi li kOndangwa kokulekule, ookilometa 90km okuza mOmuthiya (oombonge dhOshikoto),” Kathindi a ti.“Sho oombelewa dhelongo dhi li kOndangwa ohashi yi moshipala egandjo lyomayakulo notashi etele wo ondooolopa yaMuthiya yaa koke nawa paliko.”“Okutembuka kwoombelewa dhelongo okwonale. Elelo lyoshitopolwa shetu oli itula mo lya mana mo opo li kwashilipaleke kutya oombelewa dhelongo odhe ya mOshikoto.”Pokati mpoka Kathindi okwa ti momwedhi gwa zi ko okwa yile naanambelewa ye kOvenduka opo ya kale poshitaafula shoonkundathana naminista gwelongo naanambelewa aakuluntu muuministeli wElongo, Omadhiladhilo omape, Aagundjuka, Omaudhano, Uungomba nOmithigululwakalo taya kundathana kombinga yoshikundathanwa shika sha simana. “Onda nyanyukilwa sho tandi mu teyithile kutya Uuministeli tau tu yambidhidha moshinima shika netsokumwe oondika kutya omalongekidho naga ningwe opo oombelewa dhi tembukile kOshikoto,” okwa ti.Kakele muMei 2024 oshikundaneki shoNMH osha kundanekele kombinga yoshikumungu shika, okartikela hoka oko okamwe komuuartikela owundji wa nyanyangidhwa kombinga yoshinima shoka, uuartikela wumwe owonale (2018).NMH okwa kundanekele kutya etompelo oombelewa dhelongo dhi li mOshana natango omolwoopoloyeka dha simana ndhoka dha mwenekwa kepangelo mo2017, onkene oombelewa dhelongo odha kala mOndangwa nonande ehala mpoka tadhi tungwa mOmuthiya opo li li nomapekapeko oga ningwa nale.Kathindi haye ashike inaa mbilipalelwa koshinima shika, aakuluntuwiliki yelongo noshowo oongoloneya aakulu oya kala nokwiindila opo oombelewa dhi tembuke ko kOndangwa ashike inapu ningwa sha. Henok Kankoshi, ngoloneya omukulu gwoshitopolwa shaShikoto gumwe gwomwaamboka ya tya ko sha kombinga yoshikumungu shika, moshipopiwa she shonkalo yoshitopolwa mo2018 okwa li a dhenge omuthindo kombinga yesimano lyokukala noombelewa dhelongo dhi li moshitopolwa momwene.Omashongo gamwe ga li po pethimbo ndjoka, nogo twa taalela nonena woo ongaashi iinano iile mbyoka aanambelewa ye na okweenda opo ya ye kOndangwa, oshikwawo uuministeli welongo ohau longitha oshimaliwa oshindji mokufuta omauwanawa haga pewa aanambelewa mboka taya yi kOndangwa.Etungo lyoonguluskola olyo lya simana uneneMumvogu sho oshikundaneki shoNMH sho sha ningi omapulapulo kombinga yoshikumungu shika, uuministeli owa tile, molwoshimaliwa tashi nyanyangwa, uuministeli owa taalelwa komashongo ogendji, unene tuu kombinga yetungo lyoonguluskola, ndhoka dha simana unene nodha pumbiwa meendelelo.“Uuministeli owa taalelwa keshongo enene lyompumbwe yoshimaliwa, unene tuu oshimaliwa shontengekothaneko yomayambulo po melongo,” uuministeli wa tile.“Oshimaliwa ohashi topolwa sha tala koompumbwe dhilwe dhe endelela dha pamba elongo lyolyene, onkene oompumbwe dhiikwambelewa ohadhi ya monomola ontiyali,” uuministeli wa fatululile.“Natango otu na omusholondondo omule gwoonguluskola ndhoka dha pumbwa okutungwa oshikwawo otu na oopoloyeka dha simana twa kala nadho nale, ashike inadhi tulwa miilonga sigo onena omolwoshimaliwa shoka tashi nyangwanyangwa.”“Otwa zimina kutya oshinano oshile shili shoka shi li pokati kombelewa naayakulwa yawo nohashi yi moshipala lela egandjo lyomayakulo ashike otatu tsikile nokutalulula nokutala nawa koompumbwe dhetu adhihe opo tu longe payuuki.” kenya@nmh-hub.com.na

Oombelewa dhelongo mOshikoto nadhi tembuke ko kOshana - Kathindi

Comments

Namibian Sun 2026-03-26

Please login to leave a comment

Oombelewa dhelongo mOshikoto nadhi tembuke ko kOshana - Kathindi

Comments

Namibian Sun 2026-03-26

Please login to leave a comment

Subscription Required to Access Content ×

Login

Subscription Required to Access Content