Ngurare a hekeleke uunona wanakusa Shiweda

Omuprima Elijah Ngurare okwa kwashilipalekele uunona mboka uyali wanakusa omukuluntutamaneki gwompangu moNamibia, Justine Shiweda, kutya epangelo otali tsikile nokuyayambidhidha manga taya kondjo nokwiidhidhimikila oshihete oshilulu shokusilwa kuyina ngoka a dhipagwa monkalo yi nyanyalitha. Uunona mbuka owa li oombangi dhotango dheponokelo ndyoka lya ningilwa yina omvula ya zi ko, manga ya li yuuka kiilonga nokosikola. Pethimbo lyetalelepo lyolukalwa lwayina ngoka a li omutamaneki gwomOndangwa mEtine lya piti, Ngurare okwa papatele uunona nokugandja ewi lyehekeleko. "Oye li ookuume kandje," omuprima a popi nomupopyo gwi inyengitha unene ngoka gwa nuninwa okuguna uunona osho wo yinakulu, ngoka a kala nokuya sila oshimpwiyu okuza peso lyayina. Ngurare okwa tanga wo aamwayinakadhona yaShiweda sho taya yambidhidha yina ngoka e li moluhodhi, osho wo sho ya tokola ya kuthe po oshinakugwanithwa shokusila uunona wanakusa oshimpwiyu. Mombapila yoshikumungu shika, Ombelewa yOmuprima Minista oya popi kutya Ngurare okwa pandula etotopo lyoshiketha shiimaliwa yosikola (education fund) shoka sha totwa po kookuume, kaasihenda osho wo kaakwanezimo nelalakano lyokuyambidhidha elongo lyuunona mbuka. Oshiketha shika oshi li iinyangadhalwa yopaumwene nokashi shi oshitopolwa shepangelo. Ngurare okwa popi kutya oshiketha shika otashi kwathele okugamena onakuyiwa yuunona mbuka konima yeso lyayina. Okwa kumagidha wo uunona wu tule ombunda moshihwa moosikola dhawo, ya kale taya kondjele oondjondhi dhawo, yo ya kondjele okugandja esimano enene kofamili nokuuvitha nakusa yina uuntsa. Eponokelo enyanyalithiShiweda okwa hulitha momasiku 7 gaFebuluali konima sho a ningi konyala oomwedhi ne moshipangelo konima sho a yahwa nondjembo nokutilwa uuzigo woasiti mOndangwa momasiku 17 gaKotoba 2025. Eso lye olyeeta omanyenyeto omanene moshilongo ashihe neipulo epe kombinga yegameno lyaatamaneki naaniilonga yalwe mboka taya longo moshikondo shuuyuki nuutamaneki. Okwa ponokelwa pondje yegumbo lye manga a li mondjila okuya kiilonga, sho aatamenekwa ya yaha osheenditho she nokuza mpono oye mu tile uuzigo wokukumukitha miipathi yuunona we.Shiweda okwa li a monithwa oshiponga oshinene nokwa kala ta panga oomwedhi noomwedhi sigo a hulitha kuuwehame mboka. Omakonakono kombinga yedhipago lye oge eta ekwato po lyaafekelwa oyendji omanga opolisi tayi tsikile nokukonga yalwe mboka taya fekelwa ye na olunyala mokulongekidha nomokulonga eponokelo ndika. Mwaamboka ya kwatwa po kombinga yoshikumungu shika omu na omunangeshefa Abner Mateus, ngoka Epangelo tali fekele kutya oye a li omulongekidhi omunene gwehangano lyedhipago lyaShiweda. Mateus okwiikala omatamaneko ngaka. Omakonakono ge li metifaEpangelo otali popi kutya Shiweda okwa ningi oshihakanwa omolwiilonga ye osho wo sho a kala a thikama ompinge nomaindilo gomboloha kaafekelwa miipotha mbyoka a li ha tamaneke. Oshikumungu shika osha hili wo omeho nomakutsi ogendji, omolwomakwatathano ngoka taga fekelwa pokati kaatamanekwa yamwe moshiningwanima shika nekonakono lya yooloka lyokombinga yuulingilingi womanyandeko wiimaliwa yi li moomiliyona (multimillion-dollar insurance fraud) muumbangalantu waNamibia.Omakonakono gopolisi otaga tsikile, moka ethimbo nethimbo iilyo yopolisi tayi landula aafekelwa mboka taya fekelwa ya kutha oombinga dha yooloka meponokelo ndika, mwa kwatelwa elando lyiihauto noondjembo osho wo okukwathela aakolokoshi mboka ya fadhuke po. Onkundana ompe moshikumungu shika oyomasiku owala ga piti sho opolisi ya kwata po Matatias Ndengu, ngoka a kala omufekelwa omukeepo moshiningwanima shika nokwa kala e li meholamo okuza muKotoba.Ndengu ota tamanekelwa okuhinga ohauto yoVolkswagen Polo ndjoka ya longithwa kaakolokoshi okufadhuka po konima yeponokelo lyaShiweda. Ekwatopo lye olye eta omwaalu gwaafekelwa mboka ye li miipandeko shinasha nomakonakono gedhipago ndika gu gwanithe po konyala aantu ayehe mboka opolisi tayi fekele ya li ya kwatathana mokulongekidha iilonga mbika. Eso lyaShiweda olyeeta oluhodhi olunene moshilongo ashihe, moka iilyo yepangelo, iilyo yongundu yoveta (oshikondo shuuyuki) osho wo oshigwana ashihe, ya tula po omapandulo gombili nokuulika esimano lyiilonga ye onga omutamaneki.Okwa li a pewa esimaneko lyahugunina lyopambelewa pethimbo lyoshituthidhimbuluko she, ye konima ta nangekwa mevululuko. desmarius@nma.com.na, tuyeimo@nmh-hub.com.na

Ngurare a hekeleke uunona wanakusa Shiweda

Comments

Namibian Sun 2026-10-23

Please login to leave a comment

Ngurare a hekeleke uunona wanakusa Shiweda

Comments

Namibian Sun 2026-10-23

Please login to leave a comment

Subscription Required to Access Content ×

Subscription Required to Access Content