Ohangwena otayi ikwatelele kuunamapya mokupatulula oshiketha shomapungulo goomilliona N$700

Uunamapya nelongo lyiikulya oyo ya talika ko unene mongundu yompangela ompe yOshitopolwa shaHangwena opo yi hile omapungulo gondando yi vule po poomiliona N$ 700 nokugandja oompito dhiilonga yopaumwene yi li konyala 5 000. Ondjungululwamulandu ndjika oyo yi li mOompangela dhOmapungulo goshitopolwa shaHangwena noDhondjila yEkatuko lyOonkambo, dhoka dha tseyithwa mOshituthiuliko shOongeshefa shaHelao Nafidi oshiwike sha zi ko. Ompangela ndjika oyo ya ulika oopoloyekandjayi dhi li 16 muunamapya, uunduluki, uuhaku, matalelopo noshikondo shoondunge dhokunduluka. Pamahokololo gaanduluki yOompangela ndhika, Monasa Advisory and Associates, oopoloyeka ndhika odhi na ongushu yoomiliona N$700. “Ompangela yOmapungulo ya ulika oopoloyekandjayi 16, nodha konda omapungulo go-N$700 miliona moomvula dhontumba twa taalela, negandjo lyiilonga ya thika po 5 000,” osho Jason Kasuto, Omunambelewa Omunene gwaMonasa Advisory and Associates a popi.Okwa ti Ombelewa yaNgoloneya otayi ka kwatathana niilyo yilwe opo ya lundulule oopoloyeka okuza meunganeko okuya metulomiilonga.Ngoloneya gwOshitopolwa shaHangwena, Kadiva Hamutumwa, okwa ti oshitopolwa osha pumbwa okweetha po okupopya kombinga yoompito dhasho, e tashi tameke oku dhi lundulula dhi ninge iiyemo yomagumbo.“Oomvula dhingi otwa popya kombinga oompito dhoshitopolwa shetu. Otwa popya kombinga yaantu yetu, oompito dhetu dhuunamapya, ehala lyetu lyondjungululwamulandu, ombepo yetu yuunangeshefa nosho wo uupepi wetu nomalandithilo gasimana gokonooli yaNamibia naAngola,” osho a popi. Hamutumwa okwa ti omapungulo oge na okutulwa melandulathano, okuhwahwamekwa nokuyambidhidhwa pashimaliwa opo ya tote iilonga yashili yopaliko. Okwa ti uunamapya owo tawu gandja esindano lyopaendelelo koshitopolwa, okupitila melongo lyiikulya, etulo lyongushu miimuna nokokukwatathanitha aanafaalama nomalandithilo. Iikondo yotangotango iikwawo oya kwatela mo iikwakweenda neandjakaneko lyiipindi, uunduluki, omatalelopo, iikwankondo yopaushitwe, Uukwateikolohi nomauyelele, elongo lyiinima nuunangeshefa waagundjuka. Ngoloneya okwa tsu omuthindo pompumbwe yokutunga omikala dhiiyemo dhomoshitopolwa, hoka aanafaalama taya gandja iilandithomwa noongeshefa ooshona tadhi gandja iipindi nomayakulo kaapunguli aanene, opo eliko lyi kale moshitopolwa. Helao Nafidi, shoka shi li komuhulo gondjila yoongeshefa oku uka koAngola, osha lalakanenwa okuninga osheelo shongeshefa shokukwatela po ompangela ndjika. Omapungulo ga nuninwa ondoolopa ndjika oga kwatela mo uulongelwa, eandjakaneko, elongo lyiikulya, uunduluki noshikondo sheyakulo lyopalukalwa. Minista mOmbelewa yOmupresidente, Charles Mubita, okwa ti ompangela ndjika kayi na okoolela owala moolaaka. “Ompangela yOmapungulo noNdondolondjila yEkatuko lyOonkambo oya ulika, nuuyelele wa yela nosho wo uunongo wa kwata miiti, omadhiladhilo taga vulu okukwathelwa koombaanga ngoka ge li komeho getu,” Mubita osho a popi. Okwa ti aayambidhidhi oya pumbwa okutula pombanda egandjo lyiikwaniipangitho, ehumithokomeho lyuunkulungu neyetopo lyomapungulo opo ya lundulule oompito dhi ninge oofaabulika, oofaalama, oongeshefa nosho wo iilonga. Ompangela ndjika oyi na etsokumwe nOmpangela Ontihamano yEhumokomeho lyOpashigwana yaNamibia (NDP6) nondungethaneko yo-2030.

Ohangwena otayi ikwatelele kuunamapya mokupatulula oshiketha shomapungulo goomilliona N$700

Comments

Namibian Sun 2026-09-21

Please login to leave a comment

Ohangwena otayi ikwatelele kuunamapya mokupatulula oshiketha shomapungulo goomilliona N$700

Comments

Namibian Sun 2026-09-21

Please login to leave a comment

Subscription Required to Access Content ×

Login

Subscription Required to Access Content