Ya fumbikwa nomwenyo omanga taya hupu omuthima

ILENI NANDJATO

Aalumentu yaali, omunamimvo 29 Kashima Junias Hauwanga oshowo omunamimvo 36, Jacob Hangula oya hulitha konima sho ya gwililwa po kevi lyomuthima ngoka yali taya hupu.

Opolisi yaHangwena oya popi kutya otaku ningwa omapulaapulo nomakonaakono mOmpangulilo yopashitopolwa mEenhana opo ku talike ngele ope na ngoka taka geelwa omolwa omaso ngoka.

Oshiningwanima shoka osha ningilwa pomukunda Okatope.

Hauwanga naHangula oya thitikininwa kevi moshilambo shuule woometa hamano mOlyomakaya nomidhimba dhawo odha monika owala ongula yOsoondaha.

Omolwa enota noshikukuta momudhingoloko ngoka, Fellep Haipinge okwa ningi ekwatathano nomukokele ngoka e li omunambelewa gwomeya gwopamuthigululwakalo momudhingoloko ta popi kutya mepya lye omu na oonzo dhomeya.

Haipinge owa okwa yi natango mekwatathano nomukokele gumwe ngoka e na ontseyo menongonono lyoonzo dhomeya, opo e mu kwathele mokuhupa omuthima ye a vule okumona omeya giimuna ye oshowo gokulongitha megumbo.



Pahapu dhaHaipinge omukokele ngoka okwa kutu aalumentu yaali opo ya vule okutha omuthima ngoka mewiliko lye. Oya tameke okutha omwedhi gwa piti, ihe omupya omunene mOlyomakaya oya gwililwapo kevi shoka sha faalele oomwenyo dhawo.



Omunambelewa omukwatakanithi gwiimbuluma moshitopolwa shoka, Omupeha Komufala Sakaria Amakali, okwa popi kutya oshiiningwanima shoka osha holoka lwopotundi onti 14:00 mOlyomakaya, nomidhimba dhaalumentu mboka odha monika owala ongula yOsoondaha. Aalumentu yane mwakwatelwa omuwiliki gwawo oyali yiipyakidhila nokuhupa omuthima ngoka.

“Otwa yakula olopota kutya ope na aantu ya gwililwa po kevi omanga yali taya fulu omuthima. Otwa tumu meendelelo osheendo shaahupithi mboka ya wayiminwa kaanambelewa yomayakulo gopaulumomhumbwe okuza mondoolopa yaHelao Nafidi. Otwa tameke tatu ya kongo lwopotundi onti 15:00 ihe inatu yamona sigo kwa toko. Otwa tsikile esiku lyalandula na otwe ya mono lwopotundi onti 11:00. Ombululu yoshilambo shoka yali taya hupu oya li oshona noonkondo na otwa dhidhilike kutya inaya ninga oonkambdhala dha sha okukankameka evi naashoka osha nika oshiponga. Omulumentu omutitatu okwa hupu molwa okwa li ta zi mo moshilambo sho evi lya gwile meni lyoshilambo omanga omuwiliki gwawo a li kombanda, ta tala sho taya longo.”

Amakali okwa popi kutya opolisi otayi patulua epeko lyomakonaakono nOmpangulilo yEenhana otayi ka tokola ngele ope na ngoka taka pangulilwa nokupelwa ombedhi eso lyaalumentu mboka.



Haipinge okwa popi kutya okwa dhiki egumbo lye omvula ya piti, konima sho a hokana.

Okwa popi kutya kamu na omeya momudhingoloko gwawo, sha etitha opo ya ninge oonkambadhala dhokukonga omeya.

“Onda pula aaantu momudhingoloko kutya olye ta vulu okuhupilandje omuthima na oya pendje omukokele gumwe. Onda ningi ekwatathano naye na okwa kutu aanyasha yaali mboka yemu kwathele. Sho oshiningwanima shoka sha holoka kandali mo megumbo molwaashoka ohandi kala kEenhana hoka handi longele. Onda dhengelwa owala ongodhi kutya aantu yaali oya gwililwapo kevi moshilambo shoka yali taya hupu.”

“Onduuvu nayi noonkondo kwaashoka sha holoka po nakandi na iitya. Omuntu omutitatu onda lombwelwa kutya omushiinda owala ngoka a li takwathele opo iimuna ye nayo yi vule okukala tayi mono omeya okuza momuthima ngoka uuna omeya ga monika.”

Omukalimo gwomOkatope, Fillip Shaduka okwa popi kutya ompumbwe yomeya momudhingoloko gwawo oya nayipala konima sho ooyene yomithima ya tameke taya indike aantu ya kuthe omeya momidhima dhawo.

Okwa popi kutya omeya gomominino momudhingoloko gwawo oga pumba, na omolwa onkalo yoshikukuta mboka ye na omithima oya tameke taya indike aantu ya teke omeya momuthima dhawo sha etitha aantu ya ninge oonkambadhala dhokufula omithima dhawo.



Oonkambadhala okumona kansela gwoshikandjohogololo shoka, Johannes Hakanyome odha ndopa sho a popi kutya okuli moshigongi pethimbo a dhengelwa ongodhi.

Amakali okwa pula aantu kaya tule moshiponga oomwenyo dhawo ta ti pehala naya pule mboka ye na iilongitho yokutha omalambo ye ya kwathele.