'Simanekeni uuthiga waYa Toivo'

Omukalo omwaanawa AaNamibia taya vulu okulongitha mesimaneko lyependafule Andimba Toivo Ya Toivo okutsikila nokukalekapo uuthiga we wokukondjitha onkalo yokwaahathikapamwe netopolo lyeliko moshilongo shaahathikepamwe, uukwamuhoko nuulingilingi.

Ngoka omatumbulo gomuselekadhi gwaYa Toivo, Vicki Erenstein-Ya Toivo pethimbo a popi poshituthidhimbuluko shomusamane gwe shoka sha ningwa mehuliloshiwike sha piti moshilandopangelo. Vicki okwa lombwele aalilisa kutya na ya kondjithe okwaahathika pamwe, uulingilingi nuufukedhi. Okwa popi kutya emanguluko ndyoka lya monika itali tyapulwa ngele aaleli itaya longo mokuthitika omwaka ngoka guli pokati kaathigona naakengeli moshilongo.

“Otwa pumbwa okusimaneka uukumwe mbuka. Shika osha hala okutya uukwamuhoko kawu na ehala mokati koshigwana shetu. Tseni AaNamibia noshotango inatu pumbwa okupitika tu topolwe. Uukumwe waantu yetu otawu pula opo tu thitike omwaka ngoka tagu adhika pokati kaakengeli naathigona mokati koshigwana shetu. Uukumwe moshigwana owa simana mokwaadha omalalakano getu ngoka twa hala okwaadha.,” Vicki ta ti.

Omuselekedhi gwaYa Toivo okwa pula AaNamibia ya kale ye na esimaneko yo ya kondjithe noonkondo okwaaha thike pamwe.

Okwa tsikile kutya ekalekepo lyemanguluko lyoshilongo ongele owala oshigwana tashi longo nuudhiginini nokukondjitha uulingilingi.

“Shoka osha hala okutya, otwa pumbwa okulonga nuudhiginini nokukondjitha uulingilingi, okwiihole nuufukedhi. Ngoka ogwo owala omukalo tatu vulu okusimaneka nokukalekapo ombili yetu nokweetitha oshigwana shi tyapule ombili niiyimati yoshilongo.”

Ya Toivo okwa hulitha momasiku 9 Juni megumbo lyeVenduka, na okwa fumbikwa mOmawendo gOmapandafule mOlyomakaya ga piti.

Omupresidende Hage Geingob okwa koleke omapopyo gaVicki kutya, Aafrika oye na omutondi gumwe ngoka a tumbula kutya, okwaahathike pamwe meliko, oluhepo nuulingilingi.

Geingob okwa pula oshigwana shi hangane mokukondjitha aatondi mboka, opo aakwashigwana ayehe ya vule okutya pula iiyimati yemanguluko lyoshilongo.

Geingob okwa pula woo oshigwana shi simanake yaYoivo miilonga yawo ihe ha mokana owala.

“Otandi indile oshigwana shaNamibia shi simaneke ependa ndika lyekondjelomanguluko.

Omukalo omuwanawa okusimaneka nokutumbaleka ependafule ndika okupitila miilonga ya nuninwa okukondjitha omikundu ndhoka dha taalela oshigwana. Natu simanekeni oshilonga shoka a longo sha simana pakukondjitha omikundu ndhoka dhili mokati koshigwana shetu ngaashi uukwamuhoko, etopolo lyeliko kashithike pamwe noshotuu.”

OGONE TLHAGE