Shaningwa a ngungumanekwa

Ø Shaningwa a lombwelwa a kaleke ekutho miilonga lyokansela moRundu

KENYA KAMBOWE NAJEMIMA BEUKES

Elelo lyopombanda moSwapo, olya pula amushanga gwongundu Sophia Shaningwa opo a kaleke ekutho miilonga lyookansela yatatu yelelo lyaRundu, omanga kwa tegelelwa oshizemo shomutumba ngoka tagu ningwa oshiwike twa taalela.

Shoka oshimwe shomomatokolo ga ningwa pethimbo lyomitumba dhomeendelelo dha ningwa nookansela yoSwapo melelo lyaRundu oshowo Okahandja kelelo lyongundu moombelewa oonene dhoSwapo mOvenduka.

Omapopyo guukombunda nokwaahena oshili oga ningilwa Shaningwa pethimbo lyomutumba ngoka gwa kwatelwa komeho kOmupresidende Hage Geingob.

Toini Hausiku, ngoka e li omukulukadhi gwomupeha amushanga gwoSwapo, Marco Hausiku, ngoka e li gumwe gwomookansela mboka ya kuthwa miilonga moRundu, okwa popi kutya omalombwelo gaShaningwa oge li iikonene yopaumwene na ka geli muuwanawa wongundu.

Kwiikwatelelwa koonzo, Hausiku okwa ula Shaningwa kutya oha fundju na okwa lombwele oonakukala momutumba kutya elombwelo lye opo Verna Sinimbo a kale mayola gwaRundu omolwa ekwatathano lyuukume ndyoka li li pokati kaamboka yaali.

“Hausiku okwa lombwele aantu ayehe mwa kwatelwa Geingob nkene Shaningwa ha yi metalelepo lyomonanguwi moRundu nokutsakanena naSinimbo ngoka aluhe he mu pe omulalo ngele e li metalelepo lyopaumwene nenge lyopambelewa,,” onzo ndjoka ya holola.

Hausiku natango okwa popi kutya olundji ngele opwa holoka okwaahauvathana momitumba dhelelo lyondoolopa yaRundu, Sinimbo oha dhimbulukitha oonakukala pomutumba kutya ye oku na ekwatathano ewanawa moSwapo.

Onzo oya holola kutya Shaningwa okwa tindi okuyamukula komapopyo ngoka, ta popi kutya ye iha yamukula komaulayi.



Oonkambadhala okumona Shaningwa odha ponyo, sho ongodhi ye inayi yamukulwa sigo oshowo onkundana ndjika ya nyanyangithwa.

Onzo oya tsikile kutya pethimbo lyomutumba ngoka Geingob okwa kala nokuula Isack Kandingi onga omayola sha etitha opo Sinimbo a lombwele aakuthimbinga kutya okwa pyakudhukwa okutaamba ompito yokukala oshilyo shelelo lyomutumba.

Ongundu yookansela momalelo gondoolopa yaRundu oshowo Okahandja odha tokola okwaaha landula omalombwelo gaShaningwa.

Pahapu dhomukwatakanithi gwoSwapo moshikandjo shaKahandja, Martha Mwandingi-Simeon, okwa popi kutya oya li yiithanwa opo ya ye komutumba gwomeendelelo nelelo lyopombanda mongundu, opo ya ka patulule oomitima dhawo.

Shaningwa okwa gandja omalombwelo kOkahandja opo elelo lyondoolopa ndjoka li lundululwe, namayola Johannes ‘Congo’ Hindjou ta kuthwa iilonga yuumayola nokuningwa oshilyo shelelo lyondoolopa, omanga Sophia Upithe ta hogololwa onga mayola.

Shaningwa okwa li a hala Gideon Uwu-Khaeb hogololwe onga omupeha mayola naHileni Iita onga omunashipundi gweleo lyondoolopa.

MoRundu, Shaningwa okwa gandja elombwelo opo Sinimbo a kale nompito ye yuumayola nomupeha gwe Ralph Ihemba.

Omalombwelo agehe ngoka inaga landulwa kookansela yongundu yoSwapo.

Mwandingi-Simeon okwa popi kutya Shaningwa ke na uuthemba wokugandja omalombwelo ge li ngaaka, ta gwedha po kutya oya tegelela oshizemo shomutumba gwelelo lyongundu.

Swapo okwa tokola okukutha miilonga ookansela ye yatatu moRundu, mwakwatelwa mayola omupe ngoka opo a hogololwa, Kandingu, shoka ya tindi okwiiyutha kelombwelo kutya elelo lyondoolopa ndjoka inali lundululwa.

Yamwe mboka ya kuthwa miilonga omupeha mayola gwondoolopa ndjoka, Hausiku, ngoka e li omukulukadhi gwomupeha amushanga gwoSwapo, Marco Hausiku oshowo Anastacia Shinduvi-Foya.

Kansela gwoAll People's Party (APP), Matheus Wakudumo osha li sha hogololwa ongaa oshilyo shelelo lyondoolopa.

Kandingu, Shinduvi naHausiku olya tokola okukonga ekwatho lyopaveta, sha landula ekutho miilonga lyawo.



Pethimbo lya faathana elelo lyaKahandja nalyo olya tndi okutula miilonga elombwelo lyaShaningwa na olya hogolulula Hindjou onga mayola omanga , Upithe, ngoka a tindi ehogololo lye kuFrederick Shimanda gwoUnited Democratic Front (UDF) , a popi kutya ookansela yakwawo oya zi mondjila sho ya hogolola Hindjou onga omayola.

Mwandingi-Simeon okwa popi kutya Shaningwa okwe ya idhimbike sho ye mu lombwele kombinga yomaihumbato gaahogololwa ye.

“Otwe mu lombwele kombinga yomaihumbato gawo omawinayi kutya otaga dhipaga po ondoolopa. Otwe mu tseyithile [Shaningwa] iinima ayihe ihe ine tu pulakena, ngashiingeyi otatu ningi ngiini? Swapo oku na ekotampango lye nomilandu na otwe dhi landula.”

Natango okwa holoka evundakano melelo lyaKhorixas, moka ookansela yoSwapo kwa popiwa kutya inaya hala okulandula elombwelo lyaShaningwa opo Elizabeth Geises a hogololwe onga mayola.

Geises okwa lombwele NBC kutya elelo lyopolotika mondoolopa ndjoka otali shunithwa pevi omolwa ekondjelo lyuuleli.

Okwa popi kutya onkalo ndjoka otayi yi nomoshipala niigongi yelelo lyondoolopa.