Oshikonga shomahwahwameko gegameno lyomoondjila sha manithwa

Omahwahwameko gegameno lyomoondjila ngoka ga ninga uule woomwedhi mbali moondjila dhaNamibia dhoka dha talika ko kutya odha nika oshiponga, oga etitha egandjo lyomageelo kaalongithi yoondjila gongushu yoomiliyon 4.5 omanga aantu yeli 219 ya tulwa miipandeko sho taya hingi ye li kohi yodhungo.

Aahingi yiihauto ye li po 34 373 oya ningilwa omakonakono pethimbo lyoshikonga shoka. Aahingi ye li po 24 457 oya konaakonwa momwedhi Aguste omanga 9 916 ya konaakonwa momwedhi Sepetemba.

Omahwahwameko ngoka ga tulwa miilonga omwedhi Aguste na oga hulu momwedhi Sepetemba oga li ga longitha oshimaliwa sha thika poomiliyona 3.5 na oga kala aanambelewa ya gwedhwa po ye li 64 okuza kiiputudhilo ya yooloka mboka ya tulwa mondjila yo B1 pokati kaNoordoewer oshowo Oshikango oshowo B2 pokati kOkahandja nOmbaye.

Omatulo miipandeko ge li po 259 oya ningwa pethimbo ndyoka moka aantu 248 ye li aalumentu omanga aakiintu ye li 9.

Omupopiliko gwopolisi yaNamibia, Chief inspector Kauna Shikwambi okwa popi kutya nokukoleka kutya omageelo ge li 4 350 oga gandjwa pethimbo lyomahwahwameko ngoka, sho kwa gandjwa omageelo 3 112 muAguste omanga muSepetemba gwa gandjwa omageelo 1 238.

Muule woomwedhi ndhoka, opolisi oya lopota iiponga yomoondjila yi li 940, omaso 2, omayehameko omanene ge li 85 oshowo omayehameko omashona ge li e 151.

Ehangano lyoMotor Vehicle Accident (MVA) fund olya koleke oshiwike shika kutya okutameka omwedhi gotango nuumvo sigo omasiku 11 gomwedhi Kotomba, okwa lopotwa iipotha yili 2 871 moondjila dhaNamibia.

Onga oshizemo shiiponga mbyoka, aantu 4 629 oya ehamekwa omanga kwa lopotwa omaso 411.

MVA fund okwa koleke kutya ngaashi omimvo dha piti oyendji mboka ya hulithile miiponga mbyoka ya lopotwa aalumentu ya kalela po oopresenda 72 nenge ye li 295 pamiyalu omanga aakiintu 115 ya kalela po oopresenda 28 ya hulithile miiponga.

Natango aanyasha okwa lopotwa oyo unene taya ningi iihakanwa yiiponga, sho kwa lopotwa kutya oyendji mboka ya hulithile miiponga aanyasha yoomvula dhi li po 16 no 35.

Oshitopolwa shaKhomas osho sha lopotwa iiponga oyindji yi li 1 101, sha landulwa koshitopolwa shErongo shoka sha lopotwa iiponga 318 noshitopolwa shaShana osha lopotwa iiponga 289.

Otjozondjupa omwa lopotwa iiponga 229, naantu 44 oya hulithila miiponga mbyoka. Aantu 42 oya hulithila mErongo omanga 40 ya hulithila moKhomas, Oshana oshowo Hardap.

Iiponga tayi ningilwa aayendi yokolupadhi nayo otayi londo pombanda sho kwa lopotwa iiponga 841 oshowo omaso 117 nomayehameko 781.

Iiponga yomaipumo mumwe oya lopotwa yi li po 784 moka aantu 87 ya hulithila omanga ye li 1 564 yeehamekwa. Iiponga yiihauto ya galangata oyi li po 754 nokweetitha omaso 148 oshowo omayehameko 1 598.

Aantu o 10 oya hulithila miiponga tayi kwatakanithwa niinamwenyo, mbyoka kwa lopotwa iiponga 87 oshowo omayehameko 156.

Omahwahwameko ngoka ga ningwa oga kwatelwa komeho kopolisi yaNamibia ano Nampol, melongelokumwe naanambelewa yoNRSC, MVA Fund, Roads Authority, Private Sector Road Safety Forum, oshowo iikondo yegameno lyomoondjila okuza mOvenduka, Ombaye, Swakopmund, Henties Bay, Keetmanshoop, Otjiwarongo, oshowo uuministeli wiilonga nomalweendo.

Omahwahwameko ngoka oga ningi woo elongo lyegameno moondjila.

Namibia okwa lopotwa shimwe shomiilongo yi na omaso taga etitha kiiponga yomoondjila geli pombanda noonkondo, sho konyala kehe omvula ha kanitha aantu ye li po 700 onga oshizemo shiiponga yomoondjila.

JANA-MARI SMITH